ពលរដ្ឋកូរ៉េខាងត្បូងរាប់ម៉ឺននាក់បានចូលរួមធ្វើបាតុកម្ម៤ចុងសប្តាហ៍ជាប់ៗគ្នា ដើម្បីទាមទារឲ្យលោកស្រីប្រធានាធិបតី Park Geun-hye ចុះចេញពីតំណែង។
ប៉ូលិសបានថ្លែងថា មនុស្សប្រមាណ១សែន៧ម៉ឺននាក់ បានចូលរួមធ្វើបាតុកម្មនៅក្នុងទីក្រុង សេអ៊ូល ដែលជារដ្ឋធានីរបស់កូរ៉េខាងត្បូង។ ប៉ុន្តែក្រុមអ្នករៀបចំធ្វើបាតុកម្មបានថ្លែងថា ចំនួនអ្នកចូលរួមបាតុកម្មមានរហូតដល់ទៅ៦សែននាក់។
ក្រុមបាតុករភាគច្រើនមិនប្រើអំពើហិង្សានោះទេ។ មានឆាកបណ្តោះអាសន្នមួយត្រូវបានរៀបចំឡើង ហើយបានក្លាយទៅជាកន្លែងប្រមូលផ្តុំគ្នា មានមេក្រូ មានឈុតឆាកកំប្លែង និងក្រុមតន្ត្រីរ៉ុក ដូចជាក្រុម Deulgukhwa ជាដើម។
ក៏មានសេចក្តីរាយការណ៍មកថា មានមនុស្សពាក់រូបតុក្កតាផ្សេងៗដើម្បីទាក់ទាញកុមារ ដែលបានធ្វើឲ្យការធ្វើបាតុកម្មនេះក្លាយទៅជាព្រឹត្តិការណ៍ដែលក្រុមគ្រួសារអាចនាំកូនៗរបស់ពួកគេទៅចូលរួមបាន។
នៅពេលល្ងាច ក្រុមបាតុករបានស្រែកថា «Park Geun-hye ចុះចេញទៅ» ហើយពាក្យមានកាន់បដា ទាន និងទូរស័ព្ទដែលមានស្រោម មានភ្លើងពណ៌ នៅខាងក្រៅវិមានប្រធានាធិបតី។
ពលរដ្ឋកូរ៉េខាងត្បូងមកពីទូទាំងប្រទេសបានធ្វើដំណើរឆ្ពោះទៅកាន់រដ្ឋធានីដើម្បីចូលរួមធ្វើបាតុកម្ម។
ការធ្វើបាតុកម្មនេះគឺជាសកម្មភាពចុងក្រោយគេបំផុតដើម្បីទាមទារឲ្យលោកស្រី Park ចុះចេញពីតំណែង ដោយសារតែរឿងអាស្រូវពុករលួយ ដែលបានធ្វើឲ្យរដ្ឋបាលរបស់លោកស្រីជាប់គាំង។ អត្រានៃការគាំទ្រលោកស្រីធ្លាក់ចុះ៥ភាគរយ។
ការស៊ើបអង្កេតទៅលើករណីប្រើប្រាស់អំណាចដើម្បីទាញយកប្រាក់រាប់លានដុល្លារ ដែលត្រូវបានចោទប្រកាន់ថាធ្វើឡើងដោយមិត្តភក្តិដ៏យូរអង្វែងរបស់លោកស្រីគឺលោកស្រី Choi Soon-sil ដែលបានធ្វើឲ្យប៉ះពាល់យ៉ាងធ្ងន់ធ្ងរដល់មុខមាត់នយោបាយរបស់លោកស្រី Park ថាជាមេដឹកនាំពុករលួយ ហើយបានធ្វើឲ្យលោកស្រីកាន់តែនៅដាច់សង្វែងពីគេនិងគ្មានអំណាច។ ពួកគេត្រូវបានចោទប្រកាន់ថាបានដាក់សម្ពាធទៅលើក្រុមហ៊ុនពាណិជ្ជកម្មរបស់កូរ៉េខាងត្បូងនានា ដើម្បីឲ្យផ្តល់ប្រាក់ ៧០លានដុល្លារឲ្យទៅមូលនិធិដែលគ្រប់គ្រងដោយលោកស្រី Choi។
លោកស្រី Choi ត្រូវបានចោទប្រកាន់ថាប្រើប្រាស់អំពើអូមអាមដើម្បីជះឥទ្ធិពលទៅលើលោកស្រី Park និងគ្រប់គ្រងទៅលើបុគ្គលិករបស់លោកស្រី បើទោះបីជាលោកស្រីមិនមានតួនាទីនៅក្នុងជួររដ្ឋាភិបាលក៏ដោយ៕
