ការធ្លាក់ចុះសេដ្ឋកិច្ចនៅក្នុងប្រទេសចិន កំពុងមានធ្វើឲ្យមានផលប៉ះពាល់យ៉ាងខ្លាំងដល់ប្រទេសឡាវ។ ប្រទេសចិនត្រូវបានពណ៌នាដោយធនាគារពិភពលោកថា «មានការរីកលូតលាស់សេដ្ឋកិច្ចដ៏លឿនបំផុត» នៅក្នុងតំបន់អាស៊ីខាងកើតនិងតំបន់មហាសមុទ្រប៉ាស៊ីហ្វិក។
ការរីកចម្រើនខាងអាជីវកម្មអណ្តូងរ៉ែមួយទសវត្សរ៍នេះ រួមបញ្ចូលជាមួយនឹងការអភិវឌ្ឍន៍ដ៏ឆាប់រហ័សនៃថាមពលវារីអគ្គីសនី បានធ្វើឲ្យប្រទេសឡាវមានអត្រាកំណើនសេដ្ឋកិច្ចជាង៧ភាគរយក្នុងមួយឆ្នាំ ដោយបានធ្វើឲ្យទិន្នផលជាតិបានកើនឡើងជាងទ្វេដងនិងបង្កើតការងារចំនួន៥សែនការងារ។
ប្រទេសដែលដើរតួនាទីដ៏សំខាន់នៅក្នុងការធ្វើឲ្យសេដ្ឋកិច្ចរីកចម្រើននោះគឺប្រទេសចិន។ របាយការណ៍កាលពីពេលថ្មីៗនេះរបស់ធនាគារពិភពលោកស្តីពីសេដ្ឋកិច្ចរបស់ឡាវ បានប្រាប់ឲ្យដឹងថាឥទ្ធិពលរបស់ចិនកំពុងបន្តកើនឡើង។ ចិនជាអ្នកវិនិយោគនាំមុខមួយដែលមានគម្រោងដែលមានទឹកប្រាក់ ៦.៧ពាន់លានដុល្លារចាប់តាំងអាជីវកម្មរ៉ែ ថាមពល កសិកម្ម ធនាគារហើយនិងពាណិជ្ជកម្មនិងសំណង់អគារសម្រាប់ពាណិជ្ជកម្ម។
នៅឆ្នាំ២០១៥ ឡាវបានជាប់បំណុលបរទេសជាង៤០ភាគរយជាមួយចិន ដែលបំណុលនេះបានកើនឡើងពី ៣៥ភាគរយកាលពី៣ឆ្នាំមុន ដោយមានថវិកាផ្តោតលើគម្រោងហេដ្ឋារចនាសម្ព័ន្ធនិងថាមពល។
ក៏ប៉ុន្តែ សញ្ញានៃផលប៉ះពាល់ពីការយឺតយ៉ាវខាងសេដ្ឋកិច្ចនៅក្នុងប្រទេសចិន បានធ្វើឲ្យមានការធ្លាក់ចុះពាណិជ្ជកម្មទ្វេភាគី នេះតាមការបញ្ជាក់របស់ពួកមន្រ្តីជាន់ខ្ពស់ឡាវ។ ពាណិជ្ជកម្មទៅវិញទៅមកមានចំនួនទឹកប្រាក់ ១.៣ពាន់លានដុល្លារនៅឆ្នាំ២០១១ បានឡើងទៅដល់៣.៦ពាន់លានដុល្លារនៅឆ្នាំ២០១៤។ ក៏ប៉ុន្តែបានធ្លាក់ចុះមកត្រឹម ២.៧៨ពាន់លានដុល្លារកាលពីឆ្នាំទៅ។
លោកLaohoua Cheuchingមន្រ្តីជាន់ខ្ពស់ក្នុងក្រសួងឧស្សាហកម្មនិងពាណិជ្ជកម្ម បានប្រាប់បណ្តាញព័ត៌មានឡាវកាលពីពេលថ្មីៗនេះថា គេត្រូវការកិច្ចផ្តួចផ្តើមថ្មីដែលកើតចេញពីការធ្លាក់ចុះសេដ្ឋកិច្ចនេះ។
លោកLaohouaបាននិយាយបន្តទៀតថា ការធ្លាក់ចុះសេដ្ឋកិច្ច មួយផ្នែកបណ្តាលមកពីការយឺតយ៉ាវសេដ្ឋកិច្ចសាកលលោក។ ឡាវបាននាំចេញទៅប្រទេសចិនដោយផ្តោតលើរ៉ែនិងកសិកម្ម ខណៈដែលការនាំចូលសំខាន់ៗមានម៉ាស៊ីននិងគ្រឿងអេឡិចត្រូនិក៕
