លោកស្រី Choi Soon Sil ដែលជាមិត្តភក្ដិជិតស្និទ្ធរបស់លោកស្រីប្រធានាធិបតីកូរ៉េខាងត្បូង Park Geun hye និងដែលត្រូវបានចោទប្រកាន់ពីបទលួចបន្លំថវិកានោះ បានបង្ហាញខ្លួននៅក្នុងសវនាការសាកសួររបស់តុលាការនៅថ្ងៃចន្ទនេះ នៅក្នុងទីក្រុងសេអ៊ូល ប្រទេសកូរ៉េខាងត្បូង។
រដ្ឋអាជ្ញាបាននិយាយថា លោកស្រី Choi Soon Sil បានបង្ខំឲ្យក្រុមហ៊ុនកូរ៉េធំៗផ្ដល់ថវិការាប់សិបលានដុល្លារអាមេរិកទៅឲ្យមូលនិធិពីរកន្លែងដែលកាន់កាប់ដោយលោកស្រីផ្ទាល់។ លោកស្រីត្រូវបានចោទប្រកាន់ថា បានបង្ហូរសាច់ប្រាក់មួយចំនួនចូលទៅក្នុងក្រុមហ៊ុនឯកជនរបស់លោកស្រី និងតាមរយៈកិច្ចសន្យាបន្ទាប់បន្សំមួយចំនួន។
កន្លងមក លោកស្រីបានបដិសេធនូវការចោទប្រកាន់អស់ទាំងនេះ។
ការខឹងសម្បារបស់ប្រជាពលរដ្ឋកូរ៉េខាងត្បូងកន្លងមកពាក់ព័ន្ធនឹងរឿងអាស្រូវនេះ គឺដោយសារលោកស្រី Choi ត្រូវបានប្រព័ន្ធផ្សព្វផ្សាយនានាបានបង្ហាញថា លោកស្រីបានគ្រប់គ្រងដោយសម្ងាត់លើការរៀបចំគោលនយោបាយរបស់លោកស្រី Park Geun Hye ដោយគ្មានតួនាទីណាមួយនៅក្នុងរដ្ឋាភិបាលនោះទេ។
រដ្ឋអាជ្ញានៅក្នុងរឿងក្ដីនេះ បានបង្ហាញថា លោកស្រីប្រធានាធិបតី Park Geun Hye គឺជាឧក្រិដ្ឋជនមួយរូបនៅក្នុងការស៊ើបអង្កេត និងបានអះអាងថា លោកស្រី Park មានការពាក់ព័ន្ធជាមួយនឹងលោកស្រី Choi នៅក្នុងការបញ្ជាអ្នកដែលនៅក្រោមបង្គាប់លោកស្រីឲ្យដាក់សម្ពាធលើក្រុមហ៊ុនសាជីវកម្មកូរ៉េនានា ដើម្បីផ្ដល់ថវិកាដល់មូលនិធិកីឡា និងវប្បធម៌របស់លោកស្រី Choi៕
