ក្រុមមន្ត្រីគណបក្សកាន់អំណាច បានប្រកែកមិនទទួលយកការអះអាងរបស់គណបក្សប្រឆាំង អំពីការឈ្នះការបោះឆ្នោតឃុំសង្កាត់ និងការបោះឆ្នោតជ្រើសតាំងតំណាងរាស្ត្រនៅពេលខាងមុខ ដោយបានហៅលោក សម រង្ស៊ី មេដឹកនាំគណបក្សប្រឆាំងថា ជាបុគ្គលមានទោស និងមានចេតនាចង់តែអុជអាលឲ្យមានទំនាស់ក្នុងសង្គម។
លោក សម រង្ស៊ី ប្រធានគណបក្សសង្គ្រោះជាតិ ដែលបាននិរទេសខ្លួនទៅក្រៅប្រទេស បានធ្វើការអធិប្បាយលើទំព័រហ្វេសប៊ុករបស់លោកនៅថ្ងៃសុក្រនេះថា ក្រោយពីបោះឆ្នោតថ្នាក់ជាតិ នៅថ្ងៃ ២៨ កក្កដា ២០១៨ ខាងមុខនេះ លោកមានបំណងធានាឲ្យមានការផ្ទេរអំណាចពីគណបក្សកាន់អំណាចទៅគណបក្សរបស់លោក ដោយរលូន និងដោយសន្តិវិធី ហើយលោកក៏នឹងធ្វើអ្វីៗទាំងអស់ដើម្បីសម្រេចគោលបំណងនេះ។
ការធ្វើអធិប្បាយរបស់ លោក សម រង្ស៊ី គឺដើម្បីឆ្លើយតបទៅនឹងក្រុមអ្នកវិភាគដែលបានផ្ដល់ការអធិប្បាយក្នុងន័យមួយចង់បន្ទោសរូបលោក ថា លោក សម រង្សី មិនប្រុងប្រយ័ត្ន មានមោទនភាពខ្លាំងពេក និងមិនមានលក្ខណៈប្រាកដនិយម ដោយហ៊ានលើកពីបញ្ហាផ្ទេរអំណាចនៅឆ្នាំ២០១៦នេះ។
យ៉ាងណាក៏ដោយ លោក សួស យ៉ារ៉ា អ្នកនាំពាក្យគណបក្សប្រជាជនកម្ពុជា ប្រាប់ VOA ថា ជីវិតនយោបាយរបស់លោក សម រង្ស៊ី តែងតែប្រឈមមុខនឹងការដាក់ទោសពីតុលាការ។
លោកនិយាយថា លោក សម រង្ស៊ី មានបំណងផ្លាស់ប្តូររបបគ្រប់គ្រងប្រទេសដើម្បីឲ្យរូបលោករួចផុតពីការជាប់ឃុំតែប៉ុណ្ណោះ។
លោកអះអាងថា មេដឹកនាំគណបក្សប្រឆាំងរូបនេះ ហាក់ដូចជាមិនចង់ឃើញភាពចុះសម្រុងក្នុងសង្គមខ្មែរនោះឡើយ។
«គាត់មិនមែនជាមនុស្សដែលមានសិទ្ធិពេញលេញ ដើម្បីនិយាយអ្វីដែលលក្ខណៈស្របច្បាប់ លក្ខណៈនៃសន្តិភាពរបស់ប្រជាជន សុខដុមរមនារបស់ប្រជាជន គាត់អត់និយាយកើតទេ។ អញ្ចឹងគាត់និយាយអ្វីតែពាក្យអុជអាល ធ្វើម៉េចដុតកម្ដៅសង្គមឲ្យមាន»។
លោកបន្ថែមថា ការលើកឡើងរបស់លោក សម រង្ស៊ី គឺមិនអាចជឿបាននោះទេ។
ដោយមិនបានឆ្លើយឲ្យចំទៅនឹងសំណួររបស់ VOA ដែលសួរថា តើគណបក្សប្រជាជនកម្ពុជា មានការបារម្ភពីការបាត់សំឡេងគាំទ្រដែរឬទេនោះ លោក សួស យ៉ារ៉ា តំណាងរាស្ត្រគណបក្សប្រជាជនកម្ពុជា បានឲ្យដឹងថា រចនាសម្ព័ន្ធគណបក្សកាន់អំណាចនៅតែរឹងមាំ ដែលនាំឲ្យគណបក្សនេះនៅតែបន្តធ្វើឲ្យសង្គមខ្មែរជឿនលឿនប្រកបដោយសន្តិភាព ស្ថិរភាពនយោបាយ និងការលើកកម្ពស់ជីវភាពរបស់ប្រជាជន។
ក៏ប៉ុន្តែ លោកសម រង្ស៊ី ដែលបានរងការធ្វើទុក្ខបុកម្នេញតាមប្រព័ន្ធតុលាការបានថ្លែងបន្តនៅលើទំព័រហ្វេសប៊ុកអំពីការបង្កើតរដ្ឋាភិបាលថ្មីក្នុងន័យដើមថា៖
«រដ្ឋាភិបាលស្របច្បាប់ដឹកនាំដោយគណបក្សសង្គ្រោះជាតិ នឹងធានាសុវត្ថិភាព និងភាពថ្លៃថ្នូរចំពោះសមាជិក ឬអតីតសមាជិកគណបក្សប្រជាជនកម្ពុជាទាំងអស់ ហើយយើងក៏នឹងផ្ដល់លទ្ធភាព និងឱកាសឲ្យជនជាតិខ្មែរគ្រប់រូប ចូលរួមក្នុងការរៀបចំប្រទេសកម្ពុជាឡើងវិញ ដើម្បីឲ្យមានការអភិវឌ្ឍពិតប្រាកដទូលំទូលាយប្រកបដោយសមធម៌ និងយុត្តិធម៌»។
លោក ឈាង វុន មន្ត្រីនាំពាក្យតំណាងរាស្ត្រគណបក្សប្រជាជនកម្ពុជា បានច្រានចោលការលើកឡើងរបស់លោក សម រង្ស៊ី។
លោកបានប្រាប់ VOA ថា គំនិតនៃការរៀបចំរដ្ឋាភិបាលថ្មីដើម្បីនាំប្រទេសរបស់គណបក្សសង្គ្រោះជាតិ គឺគ្រាន់តែជាការស្រមើស្រមៃរបស់គណបក្សប្រឆាំងនេះតែប៉ុណ្ណោះ។
«ចង់និយាយថា ណែ៎ស្អី ដែលគាត់និយាយថាគាត់ឈ្នះឆ្នោតអីៗហ្នឹង ជារឿងស្រមើស្រមៃ។ រឿងស្រមើស្រមៃជារឿងមួយ ដែលគាត់កំពុងតែយល់សប្ដិ ហើយកំពុងតែយល់សប្ដិថា អ្ហូ៎គាត់អាចចាត់ចែងកិច្ចការងាររដ្ឋធំៗនៅកម្ពុជាបាន។ ចាត់ចែងយ៉ាងម៉េចឥឡូវមានទោសជាប់គុកហើយរត់ចេញពីស្រុកខ្មែរ គណបក្សក៏ដកសេចក្ដីទុកចិត្តពីគាត់នៅក្នុងរដ្ឋសភ លែងមានតួនាទីអីហើយ បាត់ទាំងអភ័យឯកសិទ្ធិនៅរដ្ឋសភាទៅទៀត»។
ការអះអាងពីជោគជ័យនៅក្នុងការបោះឆ្នោតរបស់គណបក្សប្រឆាំងនាពេលខាងមុខនេះ មិនត្រឹមតែត្រូវបានធ្វើឡើងដោយលោក សម រង្ស៊ី នោះទេ លោក អេង ឆៃអ៊ាង តំណាងរាស្ត្រគណបក្សសង្គ្រោះជាតិបាន ប្រាប់ VOA កាលពីថ្ងៃព្រហស្បតិ៍ផងដែរថា គណបក្សប្រឆាំងមានជំនឿថា នឹងឈ្នះការបោះឆ្នោត ហើយគណបក្សនេះត្រៀមខ្លួនផ្លាស់ប្ដូរមន្ត្រីក្នុងក្របខ័ណ្ឌនយោបាយ តែមិនផ្លាស់ប្ដូរមន្ត្រីបម្រើការក្នុងរដ្ឋបាលសាធារណៈនោះទេ។
«យើងផ្លាស់ប្ដូរក្របខ័ណ្ឌមន្ត្រីនយោបាយទេបាទ។ ចំពោះមន្ត្រីរដ្ឋបាលគឺអត់ទេ គឺយើងនឹងរៀបចំធ្វើម៉េច ឲ្យរដ្ឋបាលរបស់រដ្ឋទៅជាស្ថាប័នអព្យាក្រឹត ធ្វើការបម្រើប្រជាពលរដ្ឋមិនមែនបម្រើបក្សទេ»។
លោក ឈាង វុន អ្នកតំណាងរាស្ត្រគណបក្សប្រជាជនកម្ពុជា បានប្រតិកម្មថា លោក អេង ឆៃអ៊ាង កំពុងភូតកុហកសកម្មជនរបស់គណបក្សប្រឆាំង និងមន្ត្រីរាជការដែលកំពុងមានតួនាទីក្នុងជួររដ្ឋាភិបាលដែលដឹកនាំដោយគណបក្សប្រជាជននាពេលបច្ចុប្បន្ន។
ទោះជាយ៉ាងណា លោកបានបញ្ជាក់ថា គណបក្សកាន់អំណាច នឹងមិនចាញ់ការបោះឆ្នោតនោះទេ ដោយសារគណបក្សនេះបានដាក់ចេញគោលនយោបាយដែលជួយដល់ជីវភាពប្រជាពលរដ្ឋកម្ពុជាជានិច្ច។
ការផ្ដល់ទស្សនៈអំពីការចង់បានអំណាច និងការរក្សាអំណាចរបស់អ្នកនយោបាយនៃគណបក្សទាំងពីរ កើតមាននៅមុនការបោះឆ្នោតក្រុមប្រឹក្សាឃុំសង្កាត់ ដែលគ្រោងនឹងធ្វើនៅក្នុងរយៈពេលតែប្រមាណប្រាំមួយខែទៀតតែប៉ុណ្ណោះ។
នៅក្នុងការបោះឆ្នោតជ្រើសតាំងតំណាងរាស្ត្រឆ្នាំ២០១៣ គណបក្សប្រជាជនកម្ពុជា ទទួលបានកៅអីចំនួន៦៨ ខណៈដែលគណបក្សសង្គ្រោះជាតិ ទទួលបានកៅអីចំនួន ៥៥នៅរដ្ឋសភា។
ការកើនឡើងកៅអីរបស់គណបក្សប្រឆាំង ត្រូវបានគេជឿថា បណ្ដាលមកពី គណបក្សនេះមានកម្មវិធីនយោបាយល្អ ដែលមានដូចជាការសន្យាដំឡើងប្រាក់ខែដល់មន្ត្រីរាជការ និងកម្មករ ការផ្ដល់ប្រាក់ឧបត្ថម្ភដល់មនុស្សចាស់ ការលើកស្ទួយជីវភាពប្រជាកសិករតាមរយៈការការពារតម្លៃកសិផលរបស់ពួកគេជាដើម។
ការធ្លាក់ចុះនូវចំនួនអ្នកគាំទ្ររបស់គណបក្សប្រជាជនកម្ពុជាយ៉ាងគំហុកកាលពីឆ្នាំ២០១៣ ត្រូវបានអ្នកឃ្លាំមើលនយោបាយខ្មែរ សន្និដ្ឋានថា ដោយសារប្រជាពលរដ្ឋខ្មែរ ចង់បានការផ្លាស់ប្ដូរគណបក្សកាន់អំណាច ហើយពួកគេមិនចង់ឃើញលោក ហ៊ុន សែន បន្តកាន់អំណាចជានាយករដ្ឋមន្ត្រីរបស់កម្ពុជាតទៅទៀត។
លោក អ៊ូ វីរៈ ប្រធានវេទិកាអនាគត ដែលជាមជ្ឈមណ្ឌលសិក្សាស្រាវជ្រាវគោលនយោបាយក្នុងស្រុក ប្រាប់ VOA ថា កិច្ចខំប្រឹងប្រែងរបស់គណបក្សនយោបាយ ក្នុងការតស៊ូមតិដើម្បីឈ្នះការបោះឆ្នោតត្រូវបានលើកទឹកចិត្តក្នុងសង្គមប្រជាធិបតេយ្យ។
ទោះបីជាមានការលើកទឹកចិត្តអ្នកនយោបាយឲ្យធ្វើការតស៊ូមតិគ្នាក្ដី លោក អ៊ូ វីរៈ ឲ្យដឹងបន្ថែមថា នយោបាយកម្ពុជា អាចប្រឈមនឹងភាពរកាំរកូសម្ដងទៀតដែលអាចរារាំងដល់កិច្ចសន្ទនានយោបាយរវាងគណបក្សទាំងពីរក្នុងការដោះស្រាយវិវាទនយោបាយដែលនៅសេសសល់ ក្រោយពីការលើកលែងទោសលោក កឹម សុខា ប្រធានស្ដីទីគណបក្សសង្គ្រោះជាតិ។
លោកបញ្ជាក់ថា អ្នកនយោបាយខ្មែរច្រើនយកអារម្មណ៍មកដោះស្រាយបញ្ហា។
«វាអាចដែរដោយសារនយោបាយស្រុកយើងហ្នឹង វានយោបាយតាមអារម្មណ៍។ អញ្ចឹងវាអាចដែរការធ្វើការងារមួយចំនួន វាអាចពាក់ព័ន្ធដែរ ដោយសារយើងធ្វើការងារទៅតាមអារម្មណ៍ មិនមែនតាមប្រជាពលរដ្ឋ ឬមួយតាមខ្លឹមសារច្បាប់អីចឹង។ អញ្ចឹងជាទូទៅ អាហ្នឹងវាអាចជាបញ្ហាមួយដែរ»។
ក្រុមអ្នកឃ្លាំមើលស្ថានភាពនយោបាយទាំងក្នុង និងក្រៅប្រទេសថ្លែងថា អំពើអយុត្តិធម៌ក្នុងសង្គមនានា ដូចជាការបណ្ដេញប្រជាជនចេញពីផ្ទះសម្បែងដើម្បីការអភិវឌ្ឍ ការបំផ្លិចបំផ្លាញធនធានធម្មជាតិ និងគម្លាតសេដ្ឋកិច្ចដ៏ធំរវាងអ្នកមាន និងអ្នកក្រ បានរួមចំណែកដល់ការធ្លាក់ចុះប្រជាប្រិយភាពរបស់គណបក្សប្រជាជនកម្ពុជា ដែលបានកាន់អំណាចជិត៤០ឆ្នាំមកហើយនេះ៕
