ព្រះរាជអាជ្ញានៃតុលាការក្រុងភ្នំពេញ បានកោះហៅនាងខុម ចាន់ដារាទី ឬ «ស្រីមុំ» ដែលគេចោទថាជាស្រីកំណាន់របស់លោក កឹម សុខា ប្រធានស្តីទីនៃគណបក្សជំទាស់ឲ្យចូលបំភ្លឺទាក់ទិននឹងករណីផ្សេងមួយទៀតនាថ្ងៃសុក្រសប្តាហ៍ខាងមុខ។ នេះបើយោងតាមដីកាកោះដែល VOA បានទទួលនាថ្ងៃសុក្រ។
ការកោះហៅរបស់សាលាដំបូងរាជធានីភ្នំពេញគឺមិនបានប៉ុន្មានថ្ងៃ បន្ទាប់ពីនាយកដ្ឋានប្រឆំាងភេរវកម្មរបស់ក្រសួងមហាផ្ទៃបញ្ចប់សំណុំបែបបទរបស់ខ្លួន ទាក់ទិននឹងបណ្តឹងបរិហារកេរិ៍្តរបស់នាងធី សុវណ្ណថា។
តាមដីកាកោះរបស់លោកព្រះរាជអាជ្ញារង សៀង សុខ ដែលចេញកាលពីថ្ងៃទី២២ខែមីនា ហើយ VOA បានទទួលនាថ្ងៃសុក្រ បានកោះអញ្ចើញនាង ខុម ចាន់ដារាទី ចូលបំភ្លឺ នាសាលាដំបូងរាជធានីភ្នំពេញនាថ្ងៃទី០៨ មេសាខាងមុខ។ លោក សៀង សុខ ក៏បានសរសេរផងដែរថា ការចូលបំភ្លឺនេះគឺ «ដើម្បីសាកសួរពីដំណើររឿង របាយការណ៍របស់សមត្ថកិច្ចនៃនាយកដ្ឋានប្រឆំាងភេវរកម្មនិងឧក្រិដ្ឋកម្មឆ្លងដែន បង្ហាញថាមានករណីផ្តល់សក្ខីកម្មក្លែង និង មានអំពើពេស្យាចារ»។
កាលពីខែកន្លងទៅ ខ្សែអាត់សំឡេងសាសងស្នេហាដែលគេចោទថាជា សំឡេងពិត របស់លោកកឹម សុខានិង ស្ត្រីវ័យក្មេងម្នាក់ឈ្មោះ«អាមុំ» ត្រូវបានគេបង្ហោះក្នុង គណនីហ្វេសប៊ុក នឹងត្រូវបានគេផ្សាយតាមបណ្តាញព័ត៌មានក្នុងស្រុកផងដែរ។ ដោយមានការប្តឹងផ្តល់របស់នាង ធី សុវណ្ណថា តុលាការក្នុងភ្នំពេញបានបញ្ជូនឲ្យនាយកដ្ឋានភេរវកម្មនៃក្រសួងមហាផ្ទៃធ្វើការស៊ើបអង្កេត។ កាលពីថ្ងៃទី១១ខែមីនាកន្លងទៅ ខុម ចាន់ដារាទី បានចូលបំភ្លឺនៅនាយកដ្ឋានភេរវកម្ម ដោយមានការចូលរួមពីមេធាវីរបស់នាងផងដែរ។ នាង ខុម ចាន់ដារាទី ក៏បានបដិសេធថារូបនាងមិនមានទំនាក់ទំនងផ្លូវភេទជាមួយ នឹងលោកកឹមសុខាប្រធានស្តីទីគណបក្សជំទាស់ទេ។
VOA មិនអាចធ្វើទំនាក់ទំនងសុំក្តីអធិប្បាយពី លោកព្រះរាជអាជ្ញារង សៀង សុខ ដែលចេញដីកាកោះលើ «ករណីផ្តល់សក្ខីកម្មក្លែង និង មានអំពើពេស្យាចារ» របស់នាង ខុម ចាន់ដារាទី នេះបានទេ។
អ្នកស្រីទ្រី ឈួន មេធាវីរបស់នាង ខុម ចាន់ដារាទី ប្រាប់ VOA នាថ្ងៃសុក្រនេះថាលោកស្រីមិនមានអ្វីធ្វើការអធិប្បាយលើ ករណីកោះហៅថ្មីនេះទេ ដោយវាជារឿងពីរខុសគ្នាពីករណីបណ្តឹងបរិហារកេរិ៍្ត។
យ៉ាងណាក៏ដោយលោក នី សុខា ប្រធានផ្នែកស៊ើបអង្កេតរបស់សមាគមសិទ្ធិមនុស្ស Adhoc ដែលផ្តល់មេធាវីការពារដល់នាង ខុម ចាន់ដារាទី ឬ ស្រីមុំ ក្នុងករណីទីមួយនោះ បានប្រាប់ VOA ថា សមាគមរបស់លោកនឹងបន្តជួយនាង ខុម ចាន់ដារាទី បន្តទៀត លើករណីនោះ។ លោក នី សុខា បន្ថែមថា ករណីរបស់នាងខុមចាន់ដារាទីគឺគ្រាន់តែជាជនរងគ្រោះក្នុងករណីនយោបាយដែលគេភា្ជប់ទៅជាមួយលោក កឹមសុខា ប្រធានស្តីទីនៃគណបក្សសង្គ្រោះជាតិនោះ។
លោក បញ្ជាក់ថា៖ «ខ្ញុំគិតថា បើសិនជាអ្នកនយោបាយយកបញ្ហាហ្នឹងទៅជាល្បែង ក្នុងការរកប្រជាប្រិយភាពរៀងៗខ្លួន ខ្ញុំគិតថាគឺហ្នាហ្នឹងខុសហើយ។ មិនមានអ្វីដែលយើងគួរតែយើងយករឿងហ្នឹងទៅភ្ជាប់នឹងបញ្ហាហ្នឹងនោះទេ ពីព្រោះថាយើងយកអនាគតរបស់នារីម្នាក់ដែលគាត់ អត់មានដឹង អីសោះយកទៅពាក់ព័ន្ធនឹងរឿងនយោបាយ ហើយក៏ដូចជាគាត់ អត់មាន បានប្រព្រឹត្តអ្វីទំាងអស់ហ្នឹង ហើយយើងយកទៅផ្សារភ្ជាប់ នៅក្នុងបញ្ហាដើម្បី យល់ទៅរុកគួនគ្នាក្នុងរឿងនយោបាយ ខ្ញុំយល់ថាហ្អាហ្នឹងខុសហើយ»។
លោក នី សុខា បញ្ជាក់ចំពោះ ករណីរបស់នាង ខុម ចាន់ដារាទី គឺមិនមាន អ្វីទាក់ទិននឹងការផ្តល់សក្ខីកម្មក្លែងក្លាយនោះទេដោយនាងគឺជាចុងចោទ ហើយទីពីរទៀតចំពោះអំពើពេស្យាចារគឺនាងមិនបានប្រព្រឹត្តអ្វីនោះដែរ៕
