សាលាដំបូងរាជធានីភ្នំពេញ នៅព្រឹកថ្ងៃចន្ទនេះ បានសម្រេចកាត់ទោស លោក ស៊ាង ចែត មេឃុំនៃគណបក្សប្រឆាំង នៅខេត្តកំពង់ចាម ឲ្យជាប់ក្នុងពន្ធនាគាររយៈពេល ៥ឆ្នាំ ពីបទសូកប៉ាន់សាក្សី ក្នុងសំណុំរឿងអាស្រូវស្នេហាលួចលាក់របស់លោក កឹម សុខា ប្រធានស្ដីទីគណបក្សសង្គ្រោះជាតិ ជាមួយអតីតនារីកាត់សក់ម្នាក់ឈ្មោះនាង ខុម ចាន់តារ៉ាទី ហៅស្រីមុំ។
លោក ស៊ាង ចែតមេឃុំស្រក ស្រុកកំពង់សៀម ខេត្តកំពង់ចាម ដែលជាមេឃុំមកពីគណបក្ស សម រង្ស៊ី ត្រូវបានតុលាការក្រុងភ្នំពេញសម្រេចឃុំខ្លួនបណ្ដោះអាសន្ន កាលពីខែមេសា តាមចម្លើយរបស់នាង ខុម ចាន់តារ៉ាទី ដែលអះអាងថា លោកមេឃុំបានឲ្យលុយម្ដាយនាងចំនួន ៥០០ដុល្លារ ដើម្បីកុំឲ្យនាងនិយាយប៉ះពាល់កិត្តិយសរបស់លោក កឹម សុខា។
លោក សំ សុខគង់ មេធាវីការពារក្ដី លោក ស៊ាង ចែត ចាត់ទុកថា ការកាត់ទោសនេះ មានលក្ខណៈធ្ងន់ធ្ងរ ហើយថា ក្រុមមេធាវី នឹងពិនិត្យលើកិច្ចការផ្នែកច្បាប់បន្ថែម ដើម្បីជួយដល់កូនក្តី ដែលក្រុមមេធាវីយល់ថា មិនបានប្រព្រឹត្តបទល្មើស ដូចការចោទប្រកាន់នោះទេ។
«ការផ្ដន្ទាទោស ប្រាំឆ្នាំនេះ ឃើញថាមានលក្ខណៈធ្ងន់ធ្ងរ ហើយនិងមិនអាចទទួលយកបានទេ ទាំងកូនក្ដី ទាំងមេធាវីហ្នឹង។ ហើយកូនក្ដី ហើយនិងមេធាវី នឹងជួបពិភាក្សា និងពិគ្រោះអំពីបញ្ហាផ្លូវច្បាប់ ក៏ដូចជាសិទ្ធិហ្នឹង ចំពោះពេលវេលាហ្នឹង ឬក៏សិទ្ធិក្នុងការប្ដឹងឧទ្ធរណ៍ ចំពោះសាលក្រមហ្នឹង»។
ការកាត់ទោសលោក ស៊ាង ចែត បានកើតឡើងតែប៉ុន្មានថ្ងៃ ក្រោយពីលោក កឹម សុខា អ្នកតំណាងរាស្ត្រមណ្ឌលខេត្តកំពង់ចាម ទទួលបានការព្រះរាជទានលើកលែងទោសពីព្រះមហាក្សត្រខ្មែរតាមការស្នើសុំពីលោកនាយករដ្ឋមន្ត្រី ហ៊ុន សែន។
លោក លី សុផាណា អ្នកនាំពាក្យសាលាដំបូងរាជធានីភ្នំពេញ បដិសេធមិនធ្វើការអធិប្បាយ។
អ្នកឃ្លាំមើលស្ថានភាពសិទ្ធិមនុស្សនៅកម្ពុជា ថ្លែងថា លោក ស៊ាង ចែតដែលត្រូវបានតុលាការកាត់ទោស នៅព្រឹកថ្ងៃចន្ទនេះ នឹងអាចទទួលបានការដោះលែងតាមការចរចាផ្នែកនយោបាយ នៅ ក្រោយពេលដែលព្រះមហាក្សត្រខ្មែរព្រះបាទនរោត្តម សីហមុនី បានព្រះរាជទានលើកលែងទោសដល់លោក កឹម សុខា កាលពីថ្ងៃទី២ ធ្នូកន្លងទៅនេះ។
លោក អំ សំអាត ប្រធានការិយាល័យស៊ើបអង្កេតនៃអង្គការការពារសិទ្ធិមនុស្សលីកាដូ ប្រាប់ VOA នៅថ្ងៃចន្ទនេះថា តុលាការត្រូវបំពេញ និងបញ្ចប់នីតិវិធី ដោយការសម្រេចកាត់ទោស លោក ស៊ាង ចែត។
លោកបន្ថែមថា លោក ស៊ាង ចែត អាចនឹងទទួលបានការដោះលែងឲ្យមានសេរីភាព នៅពេលមានការចរចានយោបាយរវាងគណបក្សប្រឆាំង និងគណបក្សគ្រប់គ្រងប្រទេសនោះ។
«ទោះយ៉ាងណាក៏ដោយ ខ្ញុំគិតថា វាសញ្ញាណមួយល្អ ដែលសង្គមស៊ីវិលយើងមើលឃើញគឺ សញ្ញាណវិជ្ជមានមួយនៃការលើកលែងទោសទៅដល់ឯកឧត្ដម កឹម សុខានោះណា៎។ អញ្ចឹងខ្ញុំសង្ឃឹមថា ដំណើរការតទៅទៀត អ្នកនយោបាយទាំងអស់ហ្នឹង គេអាចនឹងចរចាគ្នាផ្នែកនយោបាយ ហើយលោក ស៊ាង ចែត នឹងអាចត្រូវបានលើកលែងទោសផងដែរ មើលទៅបាទ»។
ក្នុងសំណុំរឿងស្នេហាលួចលាក់របស់លោក កឹម សុខា ដដែលនេះ មានមន្ត្រីសិទ្ធិមនុស្សជាន់ខ្ពស់បួនរូបរួមមានអ្នកស្រី លឹម មុនី លោក យី សុខសាន្ត លោក នី សុខា លោក ណៃ វ៉ង់ដា និងលោក នី ចរិយា អគ្គលេខាធិការរងនៃគណៈកម្មាធិការជាតិរៀបចំការបោះឆ្នោត (គ.ជ.ប) បានបន្តស្ថិតនៅក្នុងការឃុំខ្លួនបណ្ដោះអាសន្នក្នុងពន្ធនាគារ។
តុលាការកំពូលកាលពីសប្ដាហ៍មុន បានសម្រេចច្រានចោលបណ្ដឹងសុំនៅក្រៅឃុំរបស់ពួកគេ។
ភ្លាមៗក្រោយការច្រានចោលសំណើសុំនៅក្រៅឃុំនេះ លោក Brad Adams នាយកប្រចាំតំបន់អាស៊ីនៃអង្គការ Human Rights Watch ដែលបានស្នើសុំឲ្យមានការដោះលែងជនទាំង៥នាក់នេះ បានចាត់ទុកថាការកាត់ទោសលើមន្ត្រីសិទ្ធិមនុស្សជាការគំរាមកំហែងសិទ្ធិនយោបាយនិងកៀបសង្កត់កិច្ចការសិទ្ធិមនុស្ស៕
