ក្រុមអ្នកតំណាងរាស្ត្រគណបក្សប្រឆាំង បានចេញសេចក្តីជូនដំណឹងដល់លោកប៉ា សុជាតិវង្ស អភិបាលរាជធានីភ្នំពេញ នាថ្ងៃអង្គារនេះថា ពួកគេនឹងប្រារព្ធពិធីអបអរសាទរខួបលើកទី២៥ នៃកិច្ចព្រមព្រៀងសន្តិភាពទីក្រុងប៉ារីស ២៣ តុលា ១៩៩១ នៅក្នុងបរិវេណនៃទីលានប្រជាធិបតេយ្យ។
សេចក្តីជូនដំណឹងចុះហត្ថលេខា ដោយអ្នកតំណាងរាស្ត្របីរូបនៃគណបក្សសង្គ្រោះជាតិនាថ្ងៃទី ១៨ខែ តុលា នេះ បង្ហាញថា ពិធីនេះនឹងរៀបចំឡើងចាប់ពីម៉ោង៧ព្រឹក ដល់ម៉ោង១២ថ្ងៃត្រង់ ដោយមានអ្នកចូលរួមជាច្រើនពាន់នាក់។
ការប្រកាសជូនដំណឹង ពីការធ្វើពិធីអបអរសាទរខួបនៃកិច្ចព្រមព្រៀងប្រវត្តិសាស្ត្រនេះ បានកើតឡើង នៅស្របពេលក្រុមអង្គការសង្គមស៊ីវិលបានរៀបចំវេទិកាមួយនៅរាជធានីភ្នំពេញ នៅថ្ងៃអង្គារដដែលនេះ ជជែកពិភាក្សាគ្នា អំពីកិច្ចព្រមព្រៀងដែលបាននាំមកកម្ពុជានូវលទ្ធិប្រជាធិបតេយ្យ សេរីពហុបក្សម្តងទៀតក្នុងទឹកដីកម្ពុជា។
លោកម៉ៅ មុន្នីវណ្ណ អ្នកតំណាងរាស្ត្រគណបក្សសង្គ្រោះជាតិ ប្រាប់ VOA ថា សាលារាជធានីភ្នំពេញ នឹងមិនជំទាស់ដល់ ការប្រារព្ធពិធីអបអរសាទរខួបនៃការចុះកិច្ចព្រមព្រៀងដែលមានអាយុ២៥ឆ្នាំនេះ នៅទីលានប្រជាធិបតេយ្យនោះទេ ដោយហេតុថា រដ្ឋាភិបាលក៏បានបន្តគាំទ្រស្មារតីនៃកិច្ចព្រមព្រៀងដែលបានរួមចំណែកមួយភាគធំ ដល់ការបញ្ចប់ជម្លោះរវាងខ្មែរ និងខ្មែរកាលពី ឆ្នាំ ១៩៩១។
«តាមពិតទៅយើងគ្រាន់តែជូនដំណឹង ហើយយើងទៅពិភាក្សាជាមួយសាលារាជធានីភ្នំពេញហ្នឹង ដើម្បី រួមគ្នាធ្វើម៉េច ការពារសន្តិសុខ ជជែកគ្នាអំពីសណ្តាប់ធ្នាប់ អីៗហ្នឹង ធ្វើម៉េច ធ្វើឲ្យកម្មវិធីយើងហ្នឹង ប្រព្រឹត្តទៅដោយជោគជ័យ ហ្នឹងឯងបាទ»។
VOA មិនទាន់អាចទាក់ទង លោក មាន ចាន់យ៉ាដា អ្នកនាំពាក្យសាលារាជធានីភ្នំពេញបានទេ នាល្ងាចថ្ងៃអង្គារនេះ។
កិច្ចព្រមព្រៀងទីក្រុងបារីសថ្ងៃ២៣តុលាឆ្នាំ១៩៩១បានធ្វើឲ្យភាគី៤ឈប់បាញ់គ្នា បង្កឲ្យមានសន្តិភាព ធានាបូរណភាពដែនដី អធិបតេយ្យភាពជាតិ ការអភិវឌ្ឍជាដើមផងនោះគឺជាស្នាព្រហស្ថរបស់សម្តេចឳព្រះនរោត្តមសីហនុដែលជា អ្នកផ្តួចផ្តើម។
អ្នកវិភាគសង្គម លោកមាស នី ថ្លែងថា ការរំឮកដល់ខួបនៃការចុះកិច្ចព្រមព្រៀងសន្តិភាពទីក្រុងប៉ារីស ស្ទើតែត្រូវបានរដ្ឋាភិបាលខ្មែរ បំភ្លេចចោលម្តងរួចមកហើយ ដោយរដ្ឋាភិបាលបានសម្រេចមិនឲ្យមន្ត្រីរាជការឈប់សម្រាកនាថ្ងៃទី២៣តុលានេះ។ ប៉ុន្តែគ្រាដែលកម្ពុជា ចាប់ផ្តើមជួបជម្លោះព្រំដែនជាមួយប្រទេសក្បែរខាង រដ្ឋាភិបាល ក៏បានផ្តើមរំឮកកិច្ចព្រមព្រៀងនេះ សារជាថ្មី។
អ្នកវិភាគរូបនេះ បញ្ជាក់ថា ប្រទេសកម្ពុជាមិនអាចមើលរំលងកិច្ចព្រមព្រៀងនេះបាននោះឡើយ ព្រោះវាជាឯកសារប្រវត្តិសាស្ត្រមួយធានាដល់ការរស់រានឡើងវិញរបស់កម្ពុជា ក្រោយរបបខ្មែរក្រហម។ លោកបន្ថែមថា រដ្ឋាភិបាល កំពុងបង្កឲ្យមានសកម្មភាពនយោបាយមួយចំនួន ដែលផ្ទុយពីខ្លឹមសារដើមនៃកិច្ចព្រមព្រៀងនេះ នៅគ្រាដែលតំណាងរាស្ត្រដែលនៅមានឯកសិទ្ធិសភា ត្រូវបានតុលាការកាត់ទោសដាក់ក្នុងពន្ធនាគារ ក៏ដូចជាមន្ត្រី និងសកម្មសិទ្ធិមនុស្ស ជាច្រើនទៀតដែល កំពុងរងការធ្វើទុក្ខបុកម្នេញតាមប្រព័ន្ធតុលាការ៕
