ទូរទស្សន៍រដ្ឋនៃប្រទេសស៊ីរី និងអង្គការឃ្លាំមើលសិទ្ធិមនុស្សស៊ីរី បានឲ្យដឹងថាកាលពីថ្ងៃចន្ទ ការផ្ទុះគ្រាប់បែកមួយចំនួនបានបណ្តាលឱ្យមនុស្សជាង១០០នាក់ស្លាប់នៅក្នុងក្រុងពីរជាប់នឹងឆ្នេរសមុទ្រនៃប្រទេសស៊ីរីដែលជាធម្មតាមានសភាពស្ងប់ស្ងៀម។
ការផ្ទុះគ្រាប់បែកទាំងនេះបានកើតមានឡើងនៅក្នុងក្រុង Jableh និងក្រុង Tartus ដែលជាទីតាំងមាំទាំរបស់រដ្ឋាភិបាល ដែលរហូតមកដល់ពេលនេះបានគេចផុតពីអំពើហិង្សាដ៏អាក្រក់បំផុតនៅក្នុងសង្គ្រាមស៊ីវិលប្រាំឆ្នាំនៃប្រទេសស៊ីរី។
គ្រាប់បែកបួនគ្រាប់ ដោយមានរួមបញ្ចូលការវាយប្រហារអត្តឃាតយ៉ាងតិចមួយករណីផងដែរ បានផ្ទុះនៅក្នុងក្រុង Jableh ដែលមានរួមបញ្ចូលការផ្ទុះមួយនៅឯកន្លែងចេញចូលគ្រាមានអាសន្ននៅក្នុងមន្ទីរពេទ្យរបស់ក្រុងនេះផងដែរ។ ការវាយប្រហារមួយដោយរ៉ុក្កែតនៅឯស្ថានីយ៍ឡានក្រុងមួយបាននាំឱ្យមនុស្សយ៉ាងហោចណាស់៥៣នាក់បាត់បង់ជីវិត នេះបើតាមការប្រាប់ឱ្យដឹងដោយអង្គការឃ្លាំមើលសិទ្ធិមនុស្សស៊ីរី។
មានការផ្ទុះគ្រាប់បែកបីទៀត ដោយយ៉ាងហោចណាស់មួយជាការវាយប្រហារអត្តឃាត បានកើតមានឡើងនៅក្នុងក្រុង Tartus ឋិតនៅចម្ងាយប្រមាណ៦០គ.ម.ខាងត្បូងក្រុង Jableh។ លោក Abdel Rahman ប្រធាននៃអង្គការឃ្លាំមើលសិទ្ធិមនុស្សស៊ីរី ហៅការផ្ទុះនេះថាជាការវាយប្រហារមួយមិនធ្លាប់មានពីមុនមក។
ទីភ្នាក់ងារព័ត៌មាន SANA នៃប្រទេសស៊ីរីបានរាយការណ៍ថា ជាថ្មីទៀតពួកភេរវជនបានយកស្ថានីយ៍ឡានក្រុងមួយមានមនុស្សកុះករជាទីដៅនៃការវាយប្រហារ។ របាយការណ៍ទូរទស្សន៍បាននិយាយថា យ៉ាងតិចណាស់មានអ្នកដាក់គ្រាប់បែកអត្តឃាតម្នាក់បានបំផ្ទុះខ្លួនឯងនៅជិតស្ថានីយ៍ឡានក្រុងនេះ ហើយក្នុងពេលប៉ុន្មាននាទីបន្ទាប់មកក៏មានការបំផ្ទុះគ្រាប់បែកក្នុងរថយន្តមួយគ្រឿងទៀត។ បើតាមលោក Rahman ថា មានមនុស្ស៤៨នាក់ទៀតបានបាត់បង់ជីវិតនៅក្នុងការវាយប្រហារនោះ។
ទីភ្នាក់ងារព័ត៌មានមួយមានចំណងទាក់ទងជាមួយពួករដ្ឋឥស្លាម បានផ្សាយថាពួកជ្រុលនិយមនេះជាអ្នកធ្វើការវាយប្រហារនេះ៕