រដ្ឋមន្រ្តីក្រសួងរ៉ែ និងថាមពល លោក ស៊ុយ សែម គ្រោងនឹងចូលបំភ្លឺចំពោះមុខគណៈកម្មការទី១០នៃរដ្ឋសភា នៅថ្ងៃព្រហស្បតិ៍ខាងមុខ ពាក់ព័ន្ធទៅនឹងភាពមិនប្រក្រតីនៃរបាយការណ៍នាំខ្សាច់ចេញទៅប្រទេសសិង្ហបុរី។ នេះបើតាមការឲ្យដឹងរបស់មន្ត្រីជំនាញ។
ការចូលបំភ្លឺរបស់រដ្ឋមន្ត្រីរូបនេះគឺតាមការកោះហៅរបស់លោក ហូរ វ៉ាន់ តំណាងរាស្ត្រគណបក្សសង្គ្រោះជាតិ ដែលជាប្រធានគណៈកម្មការជំនាញទី១០នៃរដ្ឋសភាប្រឆាំងនឹងអំពើពុករលួយ។
លោក ឌិត ទីណា រដ្ឋលេខាធិការ និងជាអ្នកនាំពាក្យក្រសួងរ៉ែ និងថាមពល ប្រាប់VOA នារសៀលថ្ងៃអង្គារនេះថា លោករដ្ឋមន្រ្តី ស៊ុយ សែម គ្រោងនឹងចូលបំភ្លឺ តាមការកោះអញ្ជើញរបស់គណៈកម្មការទី១០នៃរដ្ឋសភា។
ទោះជាយ៉ាងណាលោក ឌិត ទីណា សុំមិនធ្វើការអធិប្បាយច្រើនពាក់ព័ន្ធនឹងការចូលបំភ្លឺនេះ ដោយលោកគ្រាន់តែបញ្ជាក់ថា៖ «យើងបានឆ្លើយតបជាញយដង ដដែលៗ ដូចជាមិនមានយល់យ៉ាងណាទេ។ បើសិនជាខាងបក្សប្រឆាំងលោកចង់យករឿងនេះធ្វើជានយោបាយ អាហ្នឹងគឺវាដូច្នេះឯង ប៉ុន្តែបើចង់ដឹងថារឿងនេះយ៉ាងម៉េច យើងបានឆ្លើយជាច្រើនដងទៅតាមសារព័ត៌មាន និងទៅតាមសង្គមស៊ីវិល បានជួបជាមួយសង្គមស៊ីវិលម្តង ពីរដងទៀត ដូចជាអត់មានអីប្លែកទេ ប្រជាពលរដ្ឋលោកដឹងអស់ហើយ»។
កាលពីពីរសប្តាហ៍មុន គណៈកម្មការអង្កេត បោសសំអាត និងប្រឆាំងអំពើពុករលួយ បានដាក់លិខិតទៅលោកនាយករដ្ឋមន្ត្រី ហ៊ុន សែន តាមរយៈប្រធានរដ្ឋសភា លោក ហេង សំរិន ដើម្បីបង្គាប់ឲ្យ លោក ស៊ុយ សែម រដ្ឋមន្រ្តីក្រសួងរ៉ែ និងថាមពលចូលបំភ្លឺចំពោះមុខសមាជិក គណៈកម្មការ នៅព្រឹកថ្ងៃទី១៥ ខែធ្នូរខាងមុខ។ នេះបើតាមការលើកឡើងរបស់ លោក ហូរ វ៉ាន់ តំណាងរាស្ត្រគណបក្សជំទាស់សង្គ្រោះជាតិនិងជាប្រធានគណៈកម្មាធិការទី១០នៃរដ្ឋសភា។
លោកហូរ វ៉ាន់ ក៏បានប្រាប់VOAថា ការអញ្ជើញរដ្ឋមន្ត្រីក្រសួងរ៉ែ និងថាមពលឲ្យ មកបំភ្លឺពីភាពខុសគ្នារវាងថវិកា និងរបាយការណ៍នៃការនាំខ្សាច់ទៅប្រទេសសិង្ហបុរីនេះ ធ្វើឡើងបន្ទាប់ពីរកឃើញថារបាយការណ៍របស់គយនៅសិង្ហបុរី និងរបាយការណ៍របស់ក្រសួងរ៉ែកម្ពុជា មានចំនួនលុយខុសគ្នារាប់រយលានដុល្លារ ដែលធ្វើឲ្យបាត់បង់ចំណូល ពីការនាំខ្សាច់ចេញ គឺជាការបាត់បង់ថវិកាជាតិ ដែលធ្វើឲ្យប៉ះពាល់ដល់ប្រជាពលរដ្ឋជាទូទៅ។
លោកបញ្ជាក់ថា៖ «កាលណាចំណូលរបស់រដ្ឋមានការបាត់បង់ អាហ្នឹងគឺជាការខាតបង់ផលប្រយោជន៍របស់ប្រជាពលរដ្ឋយើង។ បើសិនជាអាចមានភាពមិនប្រក្រតីពិតប្រាកដមែន គណៈកម្មការមានជម្រើសពីរ៖ ជម្រើសទីមួយ គឺយើងអាចផ្ញើភាពមិនប្រក្រតីនេះទៅជូនអង្គភាពប្រឆាំងអំពើពុករលួយដើម្បីគាត់ស៊ើបអង្កេតឲ្យបានច្បាស់លាស់ ដើម្បីមានភស្តុតាងគ្រប់គ្រាន់ ឬមួយដាក់ទៅសភាពេញអង្គ ដើម្បីឲ្យសភាសួរដេញដោល ហើយនិងសភាអាចធ្វើការសម្រេចមួយរបស់រដ្ឋសភាដែរ»។
កាលពីដើមខែវិច្ឆិកានេះ អង្គការសង្គមស៊ីវិលជិត៥០ បានទាមទារឲ្យក្រសួងរ៉ែ និងថាមពលបង្ហាញទិន្នន័យនាំខ្សាច់ចេញក្នុងចន្លោះឆ្នាំ២០០៧ ដល់ឆ្នាំ២០១៥ ដោយសារតួលេខផ្លូវការ របស់រដ្ឋាភិបាលកម្ពុជា តាមរយៈក្រសួងពាណិជ្ជកម្ម គឺការនាំខ្សាច់ចេញទៅកាន់ប្រទេសសឹង្ហបុរីមានត្រឹមតែជាង ២,៨លានតោន ប៉ុណ្ណោះ ខណៈដែលទិន្នន័យស្ថិតិពាណិជ្ជកម្មលើទំនិញរបស់អង្គការសហប្រជាជាតិ ដែលបានទិន្នន័យពីនាយកដ្ឋានស្ថិតិពាណិជ្ជកម្មរបស់រដ្ឋាភិបាលសិង្ហបុរីបង្ហាញថា ការនាំខ្សាច់ចេញពីកម្ពុជាចូលសិង្ហបុរី មានប្រមាណជា៧២,៨លានតោន សម្រាប់រយៈពេលដូចគ្នា។
ទិន្នន័យនៃការនាំចេញខ្សាច់ពីកម្ពុជាទៅសិង្ហបុរី ដែលល្អៀងទឹកប្រាក់ប្រមាណជា៧៤៧លានដុល្លារនោះ មិនត្រូវបានក្រសួងរ៉ែ និងថាមពលដាក់បង្ហាញទិន្នន័យជាសាធារណៈនៅឡើយនោះទេ ទោះជាក្រសួងដដែល បានរៀបចំកិច្ចប្រជុំជាមួយក្រុមអង្គការសង្គមស៊ីវិលពិភាក្សារឿងនេះម្តងរួចមកហើយ កាលខែវិច្ឆិកាកន្លងទៅ។
ក្រៅពីការស្នើឲ្យក្រសួងរ៉ែ និងថាមពល បង្ហាញលម្អិតពីភាពមិនប្រក្រតីនៃការនាំខ្សាច់ទៅប្រទេសសិង្ហបុរី លោក ហូរ វ៉ាន់ ក៏គ្រោងស្នើឲ្យរដ្ឋមន្រ្តីក្រសួងកសិកម្ម ដើម្បីបំភ្លឺពាក់ព័ន្ធនឹងការនាំចេញឈើ ព្រមទាំងគ្រោងកោះហៅរដ្ឋមន្រ្តីមួយចំនួនទៀតមកបំភ្លឺផងដែរ។ ចំណែកលោក សុន ឆ័យ តំណាងរាស្ត្រគណបក្សប្រឆាំងដែលទើបចូលបំពេញការងារសភាវិញដែរនោះ ក៏បានចេញលិខិតកោះហៅរដ្ឋមន្រ្តីក្រសួងសុខាភិបាលដើម្បីចូលបំភ្លឺពីភាពមិនប្រក្រតីពាក់ព័ន្ធនឹងប្រាក់ជំនួយ ការផ្តល់សេវាសាធារណៈ យុទ្ធសាស្ត្រគ្រប់គ្រង និងដោះស្រាយបញ្ហាប្រឈមផ្សេងៗទៀត ប៉ុន្តែរហូតមកទល់ពេលនេះ ថ្នាក់ដឹកនាំក្រសួងនេះមិនទាន់ឆ្លើយតបនៅឡើយទេ៕
