រដ្ឋមន្ត្រីក្រសួងការបរទេសសហរដ្ឋអាមេរិកលោក John Kerry និងរដ្ឋមន្ត្រីក្រសួងការបរទេសរុស្ស៊ីលោក Sergei Larov បានចាប់ផ្តើមពិភាក្សានៅក្នុងទីក្រុងហ្សឺណែវ នៅថ្ងៃសុក្រនេះ ដែលជាកិច្ចចរចាសន្តិភាពមួយដើម្បីបញ្ជប់ការវាយប្រយុទ្ធគ្នានៅក្នុងប្រទេសស៊ីរី។
លោក Kerry កាលពីថ្ងៃព្រហស្បតិ៍ស្ថិតនៅក្នុងប្រទេសអារ៉ាប៊ីសាអូឌីត ដើម្បីពិភាក្សាទៅលើប្រតិបត្តិការយោធារបស់អាមេរិកនៅក្នុងប្រទេសស៊ីរីជាមួយនឹងព្រះអង្គម្ចាស់ Mohammed Bin Salman របស់ប្រទេសនេះ រួមជាមួយនឹងក្រុមមន្ត្រីការទូតមកពីប្រទេសបារ៉ែន និងក្រុមប្រឹក្សាកិច្ចសហប្រតិបត្តិការរវាងប្រទេសក្នុងតំបន់ឈូងសមុទ្រ ដើម្បីគាំទ្រគម្រោងប្រទេសស៊ីរីដែលនឹងលើកឡើងនៅក្នុងកិច្ចប្រជុំនៅថ្ងៃសុក្រនេះជាមួយលោករដ្ឋមន្ត្រីការបរទេសរុស៊្សីលោក Lavrov។
កិច្ចចរចាកាលពីពេលមុនៗរវាងក្រុមមន្ត្រីការទូតកំពូលៗរបស់រដ្ឋាភិបាលក្រុងវ៉ាស៊ីនតោននិងរដ្ឋាភិបាលក្រុងមូស្គូ បានទទួលបរាជ័យក្នុងការបញ្ចប់ជម្លោះនៅក្នុងប្រទេសស៊ីរី ដែលកិច្ចចរចានេះមានការលំបាកដោយសារតែអាមេរិក និងរុស្ស៊ីគាំទ្រភាគីផ្ទុយគ្នា។
នៅក្នុងកិច្ចប្រជុំជាមួយនឹងលោក Lavrov ភាគីទាំងពីរនឹងព្យាយាមសម្រេចលើកិច្ចព្រមព្រៀងមួយពាក់ព័ន្ធទៅនឹងកិច្ចសហប្រតិបត្តិការយោធា និងពាក់ព័ន្ធទៅនឹងការចែករំលែកព័ត៌មានដើម្បីកម្ចាត់ក្រុមសកម្មប្រយុទ្ធរដ្ឋឥស្លាមនៅក្នុងប្រទេសស៊ីរី ដែលនេះគឺជាអ្វីដែលភាគីទាំងពីរចង់បាន៕
