ប៉ុន្តែ មន្ត្រីអ្នកនាំពាក្យគណបក្សកាន់អំណាចបានថ្លែងថា ប្រធានស្តីទីគណបក្សប្រឆាំងរូបនេះ គឺជាអ្នកបំពានច្បាប់និងមិនគោរពទៅតាមតុលាការ។
ប្រធានស្តីទីគណៈបក្សសង្គ្រោះជាតិ លោក កឹម សុខា កាលពីព្រឹកថ្ងៃអាទិត្យ បានប្រកាសស្វែងរកយុត្តិធម៌ជូនដល់ប្រជារាស្ត្រខ្មែរ ហើយបានចោទប្រកាន់ប្រព័ន្ធតុលាការថា ជាឧបករណ៍នយោបាយរបស់គណបក្សគ្រប់គ្រងប្រទេស ដែលប្រើសម្រាប់ខ្ទប់អ្នករិៈគន់រដ្ឋាភិបាលដឹកនាំដោយលោក នាយករដ្ឋមន្ត្រី ហ៊ុន សែន។
មន្ត្រីអ្នកនាំពាក្យគណបក្សប្រជាជនកម្ពុជា ឆ្លើយតបភ្លាមៗថា លោក កឹម សុខា កំពុងរំលោភបំពានច្បាប់ ហើយថា លោក កឹម សុខា អ្នកតំណាងរាស្ត្រមណ្ឌលខេត្តកំពង់ចាម កំពុងការពារផលប្រយោជន៍នយោបាយរបស់ខ្លួន ជាជាងផលប្រយោជន៍ម្ចាស់ឆ្នោត។
ថ្លែងទៅកាន់ក្រុមយុវជនមកពីខេត្តកណ្តាល លោក កឹម សុខា ដែលបង្ហាញមុខជាសាធារណៈលើកទីបី នៅទីស្នាក់កណ្តាលគណបក្សសង្គ្រោះជាតិ បាននិយាយថា រដ្ឋាភិបាលសព្វថ្ងៃដែលដឹកនាំតាមរបបផ្តាច់ការ កំពុងយកតុលាការមកវាយប្រហារក្រុមអ្នករិៈគន់រដ្ឋាភិបាល រួមមានអ្នកនយោបាយគណបក្សប្រឆាំង សកម្មជនសិទ្ធិមនុស្ស និងសកម្មជនដីធ្លី។
លោកថ្លែងថា៖ «គេកំពុងតែវាយបំបាក់ វាយកំទេចប្រព័ន្ធយុត្តិធម៌នៅកម្ពុជា តាមការរយៈការរំលោភសិទ្ធិមនុស្ស ការវាយបំបាក់ប្រព័ន្ធយុត្តិធម៌ ការប្រើប្រាស់តុលាការជាឧបករណ៍នយោបាយនេះហើយ គឺជាមូលហេតុមួយធ្ងន់ធ្ងរណាស់ដែលធ្វើឲ្យប៉ះពាល់ ទៅដល់ដំណើរការលទ្ធិប្រជាធិបតេយ្យសេរីពហុបក្ស នៅកម្ពុជាយើង»។
លោក កឹម សុខាបានថ្លែងប្រាប់យុវជនគាំទ្រគណបក្សសង្គ្រោះជាតិបន្តថា លោក បានចំណាយពេលជិតបួនខែដោយក្តីអត់ធ្មត់នៅទីស្នាក់កណ្តាលគណបក្សក្នុងសង្កាត់ចាក់អង្រែលើ ខ័ណ្ឌមានជ័យ រង់ចាំការចរចា តែអ្វីដែលលោក និងក្រុមអ្នកនយោបាយគណបក្សប្រឆាំងទទួលបានគឺការវាយប្រហារតាមផ្លូវច្បាប់។
លោកថា ប្រធានគណបក្សប្រឆាំងលោក សម រង្ស៊ី ដែលកំពុងនិរទេ្ទសខ្លួននៅក្រៅប្រទេស និងរូបលោករួមទាំងអ្នកនយោបាយគណបក្សប្រឆាំងនឹងពិចារណាគ្នាថា នឹងធ្វើមហាបាតុកម្មប្រឆាំងអំពើអយុត្តិធម៌ ដែលធ្វើឲ្យខូចដល់ការអនុវត្តលទ្ធិប្រជាធិបតេយ្យនៅកម្ពុជា។
«បើសិនណាជាប្រព័ន្ធតុលាការនេះ នៅតែផ្តល់ភាពអយុត្តិធម៌ដល់យើងទាំងអស់គ្នា ដល់សកម្មជនដីធ្លី ដល់អ្នកការពារសិទ្ធិមនុស្ស ដល់អ្នកការពារបរិស្ថាន ដល់បក្សប្រឆាំង ដល់មេដឹកនាំដែលត្រូវប្រកួតដើម្បីឲ្យមានការផ្លាស់ប្តូរនេះ យើងនឹងពិចារណាប្រើប្រាស់សិទ្ធិយើង ដើម្បីធ្វើមហាបាតុកម្ម នៅទូទាំងប្រទេស និងរាជធានីភ្នំពេញនេះ»។
លោក កឹម សុខា ដែលដាក់បម្រាមខ្លួនឯងមិនចេញពីទីស្នាក់កណ្តាលគណបក្សសង្គ្រោះជាតិ ត្រូវសាលាដំបូងរាជធានីភ្នំពេញ សម្រេចផ្តន្ទាទោសកាលពីថ្ងៃសុក្រឲ្យជាប់ក្នុងពន្ធនាគាររយៈពេល ៥ ខែ និងពិន័យជាប្រាក់ ៨០០ ០០០ រៀល ពីបទបដិសេធមិនចូលខ្លួន ក្នុងសំណុំរឿងអាស្រូវស្នេហាលួចលាក់ ដែលគេនៅមានមន្ទិលសង្ស័យថា លោកមាន ជាមួយអតីតនារីកាត់សក់វ័យក្មេងម្នាក់គឺ នាង ខុម ចាន់តារ៉ាទី ហៅស្រីមុំ។
VOA មិនទាន់អាចទាក់ទងលោក លី សុផាណា ព្រះរាជអាជ្ញារង និងជាអ្នកនាំពាក្យសាលាដំបូងរាជធានីភ្នំពេញបានទេកាលពីថ្ងៃអាទិត្យ។
យ៉ាងណាក៏ដោយ លោក សុខ ឥសាន អ្នកនំាពាក្យគណបក្សប្រជាជនកម្ពុជា ប្រាប់ VOA កាលពីរសៀលថ្ងៃអាទិត្យថា សារនយោបាយរបស់លោក កឹម សុខា ជាសារនយោបាយប្រឆាំងរដ្ឋាភិបាល ដែលលោក បានប្រើជាច្រើនលើកច្រើនសារមកហើយ។ លោកអះអាងថា តុលាការគ្រាន់តែអនុវត្តន៍តាមនីតិវិធីច្បាប់ ប្រឆាំងនឹងអ្នកប្រព្រឹត្តបទល្មើសតែប៉ុណ្ណោះ ហេតុដូចនេះ តុលាការមិនមែនជាឧបករណ៍នយោបាយនោះឡើយ។
លោកថ្លែងថា៖ «ជាអ្នកប្រព្រឹត្តល្មើសច្បាប់ ហើយគាត់មិនទទួលស្គាល់ទង្វើល្មើសច្បាប់របស់គាត់បានគាត់និយាយអញ្ចឹង ហើយអានេះ ខ្ញុំយល់ថា ជារឿងធម្មតាទេ អ្នកប្រព្រឹត្តបទល្មើសមិនងាយ ទទួលស្គាល់កំហុសរបស់ខ្លួនទេ បាទត្រង់ថា តុលាការកាត់សេចក្តីយ៉ាងម៉េច អាហ្នឹងគាត់មិនទទួលស្គាល់ ឬទទួលស្គាល់យ៉ាងម៉េច អាហ្នឹងជារឿងគាត់»។
លោក សុខ ឥសាន អ្នកតំណាងរាស្ត្រគណបក្សប្រជាជនកម្ពុជារបស់ លោក នាយករដ្ឋមន្ត្រី ហ៊ុន សែន បានថ្លែងបន្តថា គណបក្សប្រឆាំងនាពេលបច្ចុប្បន្ននេះមិនបានបំពេញតួនាទីឲ្យចំជាគណបក្សប្រឆាំងពិតប្រាកដដើម្បីបម្រើប្រជារាស្ត្រខ្មែរនោះទេ តែជាបក្សនយោបាយដែលមាននិន្នាការកសាងប្រយោជន៍បុគ្គល ជាជាងប្រយោជន៍ប្រជាជាតិ បើធៀបនឹងគណបក្សប្រឆាំងនៅប្រទេសកាន់ប្រជាធិបតេយ្យដទៃទៀតនោះ។
លោកបន្តថា៖ «កន្លងទៅនេះ គឺថាដើរគ្រប់ប្រទេស ដូចថាទៅជប៉ុន ទៅអីៗ ផ្សេងៗ អំពាវនាវគេកុំឲ្យផ្តល់ជំនួយផ្តល់ជំនួយមកកម្ពុជា ក៏ប៉ុន្តែពេលលទ្ធផលទៅ វាអត់មានបានលទ្ធផលអី ព្រោះគេអត់តាមគាត់ផងបាទ។ អញ្ចឹងទេ អានេះគ្រាន់តែឆ្លុះបញ្ចាំង ពីសកម្មភាពរបស់បក្សប្រឆាំង នៅកម្ពុជានេះវា ផ្ទុយអំពីលក្ខណៈសម្បត្តិនៃគណបក្សប្រឆាំងបណ្តាប្រទេសដែលគេ អនុវត្តន៍ប្រជាធិបតេយ្យជឿនលឿននោះបាទ»។
ក្រុមអ្នកវិភាគនយោបាយកម្ពុជា និយាយកាលពីពេលកន្លងមកថា ទាំងគណបក្សប្រឆាំង និងគណបក្សកាន់អំណាចកំពុង ដើរដល់ចំណុចទាល់ច្រកនៃការប្រជែងនយោបាយដែលមិនបានផ្តល់ផលចំណេញអ្វីដល់ប្រជារាស្ត្រខ្មែរ ក្រៅតែពីការបង្កើតភាពភ័យខ្លាច តាមរយៈវោហាស័ព្ទនយោបាយពីបក្សប្រឆាំង និងកម្លាំងទ័ពពីគណបក្សកាន់អំណាច។ ពួកគេបានបន្តថា ប្រសិនបើស្ថានភាពនៅតែបន្តបែបនេះ ប្រជារាស្ត្រខ្មែរជាអ្នករងគ្រោះ រីឯអ្នកចំណេញគឺអ្នកនយោបាយ ដែលកំពុងវាយប្រហារគ្នា ដោយយករឿងបុគ្គលផ្ទាល់ខ្លួនជាធំ។
លោក កឹម សុខា ថ្លែងនៅក្នុងវេទិកាជួបជាមួយចលនាយុវជនគណបក្សសង្គ្រោះជាតិ មកពីខេត្តកណ្តាលថា លោក នឹងស្នើទៅសហគមន៍អន្តរជាតិ ដើម្បីទទួលបានការពន្យល់ថា តើពួកគេនឹងមានយន្តការនយោបាយជាក់លាក់ណាមួយ ដើម្បីដោះស្រាយបញ្ហានយោបាយ ដែលកំពុងស្ថិតក្នុងក្តីបារម្ភរបស់ប្រទេសជាហត្ថលេខីនៃកិច្ចព្រមព្រៀងសនិ្តភាពទីក្រុងប៉ារីស ឆ្នាំ ១៩៩១ ក្នុងនោះក៏មាន សហរដ្ឋអាមេរិកផងដែរ៕
