ទីភ្នាក់ងារបរមាណូរបស់អ.ស.ប.បានរាយការណ៍ថា ប្រទេសអ៊ីរ៉ង់បានគោរពតាមកិច្ចព្រមព្រៀងសំខាន់មួយដែលបានកម្រិតការស្តុកនៃសារធាតុសំខាន់ៗដែលអាចត្រូវប្រើប្រាស់សម្រាប់ផលិតអាវុធបរមាណូ។
ទីភ្នាក់ងារថាមពលបរមាណូអន្តរជាតិដែលហៅកាត់ថា IAEA បាននិយាយថាកន្លែងស្តុកទឹកមានសម្ពាធធ្ងន់និងសារធាតុអ៊ុយរ៉ាញូម របស់ប្រទេសអ៊ីរ៉ង់បានឋិតនៅក្នុងកម្រិតដែលបានត្រូវយល់ព្រមគ្នាកាលពីឆ្នាំទៅមិញ។
របាយការណ៍នេះនិយាយថា សារធាតុអ៊ុយរ៉ាញូម នៃប្រទេសអ៊ីរ៉ង់មិនមានលើសពីកម្រិត៣០០គ.ក្រ.ដែលបានត្រូវយល់ស្របគ្នាទេ ហើយសារធាតុទឹកសម្ពាធធ្ងន់នៃប្រទេសនេះឋិតនៅក្រោមកម្រិត១៣០តោន។
ការរកឃើញនេះត្រូវបានបា្រប់ឱ្យដឹងកាលពីថ្ងៃសុក្រ នៅក្នុងសេចក្តីរាយការណ៍ប្រចាំត្រីមាសទីពីរដែលទីភ្នាក់ងារ IAEA បានរៀបចំឡើងចាប់តាំងពីកិច្ចព្រងព្រៀងនេះបានចូលជាធរមានកាលពីខែមករាមក។
កាលពីខែកក្កដាឆ្នាំ២០១៥ កិច្ចព្រមព្រៀងមួយសម្រាប់ឱ្យប្រទេសអ៊ីរ៉ង់កម្រិតស្តុកសម្ភារៈទាំងនេះបានត្រូវសម្រេចជាមួយប្រទេសអង់គ្លេស ចិន បារាំង អាល្លឺម៉ង់ ប្រទេសរុស្ស៊ី និង សរដ្ឋអាមេរិក។
ជាថ្នូរនឹងកិច្ចព្រមព្រៀងនេះ ការដាក់ទណ្ឌកម្មរបស់អ.ស.ប.និងពួកបស្ចឹមប្រទេសបានត្រូវលប់ចោលពីប្រទេសអ៊ីរ៉ង់ ដោយមានរួមបញ្ចូលទាំងការដឹកជញ្ជូនប្រេងទៅលក់ឯប្រទេសក្រៅផងដែរ។
ក៏ប៉ុន្តែ ស.រ.អា. នៅតែរក្សាទុកការដាក់ទណ្ឌកម្មរបស់ខ្លួនលើប្រទេសអ៊ីរ៉ង់ដោយសារមានការចោទប្រកាន់ថា ប្រទេសនេះក្នុងតំបន់ឈូងសមុទ្រពែក បានឧបត្ថម្ភផ្ចុងផ្តើមដល់ការដឹកជញ្ជូនអាវុធទៅកាន់ភូមិភាគមជ្ឈឹមបូព៌ា និងអំពីកម្មវិធីកាំជ្រួចផ្លោងរបស់ប្រទេសនេះ។
លោករដ្ឋមន្ត្រីការបរទេសអ៊ីរ៉ង់ Mohammad Javad Zarif នៅក្នុងខែនេះ បានសុំឱ្យស.រ.អា.ចាត់វិធានការឱ្យបានហ្មត់ចត់និងម៉ឺងម៉ាត់ជាងមុនដើម្បីដោះស្រាយបញ្ហានេះ៕
