អាជ្ញាធរមានសមត្ថកិច្ចប្រមាណជាង១០០នាក់កាលពីព្រឹកថ្ងៃសុក្រនេះ បានរារាំងមិនឲ្យប្រជាពលរដ្ឋមកពីសហគមន៍ចំនួន១១ដាក់ញត្តិ ដើម្បីរកដំណោះស្រាយដល់ជម្លោះដីធ្លីរបស់ពួកគេ នៅឯសាលាខេត្តសៀមរាបនៃប្រទេសកម្ពុជា។ នេះបើតាមការបញ្ជាក់ពីតំណាងប្រជាពលរដ្ឋ និងមន្រ្តីសិទ្ធិមនុស្ស។
លោក ហូន ហំ អាយុ ៣៣ឆ្នាំ តំណាងឲ្យប្រជាពលរដ្ឋ៣៨គ្រួសារ ដែលមានទំនាស់ដីធ្លីចំនួន១៦១ហិកតាជាមួយអាជ្ញាធរអប្សរាតាំងពីឆ្នាំ២០០៥មក នៅក្នុងស្រុកបន្ទាយស្រី ខេត្តសៀមរាប បានឲ្យដឹងថា អាជ្ញាធរមានសមត្ថកិច្ចបានទប់ស្កាត់មិនឲ្យប្រជាពលរដ្ឋប្រមាណជា៧០០គ្រួសារចូលទៅសាលាខេត្តសៀមរាបដើម្បីដាក់ញត្តិ បើទោះជាការដាក់ញត្តិនេះមិនមែនជាលើកដំបូងក៏ដោយ អាជ្ញាធរមានសមត្ថកិច្ចយកលេសថា ថ្នាក់ដឹកនាំខេត្តកំពុងជួបប្រជុំជាមួយនឹងសមាជិកព្រឹទ្ធសភាមួយរូប។
លោកនិយាយថា៖ «គាត់រារាំងដែរ ព្រោះយើងធ្វើដំណើរទៅ គាត់រារាំងនៅឯត្បូងសាលាខេត្ត អត់ឲ្យយើងទៅ។ មូលហេតុដោយសារតែមានគណៈកម្មការព្រឹទ្ធសភាប្រជុំ អត់ឲ្យយើងទៅដូច្នេះឲ្យយើងរង់ចាំចូលដល់ម៉ោង២»។
បើទោះជាមានការរារាំងពីអាជ្ញាធរមានសមត្ថកិច្ច លោក សត ណាឌី ស្នងការប៉ូលិសខេត្ត បានច្រានចោលការចោទប្រកាន់ ហើយបានបញ្ជាក់ប្រាប់ VOA ថា អាជ្ញាធរមានសមត្ថកិច្ចគ្រាន់តែសម្រួលពលរដ្ឋទាំងអស់នោះ កុំឲ្យមកសម្រុកដាក់ញត្តិរួមគ្នាប៉ុណ្ណោះ ដើម្បីរក្សារបៀបរបបរៀបរយ។
លោកមានប្រសាសន៍ថា៖ «មិនមែនរារាំងទេ គ្រាន់សំណូមពរឲ្យគាត់ចូលមានរបៀបរបប ចាត់តាំងតំណាងឲ្យចូល។ បើមករាប់រយនាក់ចង់ចូលទាំងអស់ហ្នឹង ធ្វើម៉េចទៅចូលទៅកើត។ ចូលតំណាង១៧នាក់ចូលទៅ»។
ការនាំយកញត្តិមកដាក់ជូនសាលាខេត្តនេះ គឺត្រូវបានធ្វើឡើង នៅខណៈពេលដែលអាជ្ញាធរខេត្តសៀមរាបមិនទាន់អាចរកបាននូវដំណោះស្រាយលើជម្លោះដីធ្លីរ៉ាំរ៉ៃរវាងប្រជាពលរដ្ឋជាងមួយពាន់គ្រួសារជាមួយ និងកងយោធា អាជ្ញាធរអប្សរា រដ្ឋបាលព្រៃឈើ និងក្រុមហ៊ុនអភិវឌ្ឍន៍កសិកម្មតាំងពីឆ្នាំ២០០៥មក។
លោក ហូន ហំ ដែលបានចូលជួបប្រជុំជាមួយលោក គឹម ឆៃហៀង អភិបាលរងខេត្តសៀមរាបបានឲ្យដឹងទៀតដែរថា លោកអភិបាលរងខេត្ត នឹងយកញត្តិនេះដាក់ជូនលោកអភិបាលខេត្ត ដើម្បីស្វែងរកដំណោះស្រាយ។
លោកបន្តថា៖ «ដោយសារតែលោកអភិបាលអត់នៅ ដូច្នេះគាត់នឹងទទួលយកសំណូមពរដាក់ជូនហើយ។ ហើយគាត់និងដោះស្រាយយ៉ាងម៉េចៗទៀត ចាំជួបជាមួយភាគីដែលមានទំនាស់រួចបានគាត់ថានឹងអញ្ជើញពួកយើងជាប្រជាពលរដ្ឋ ដែលមានទំនាស់ហ្នឹងមកជួប ហើយចរចាគ្នាដើម្បីធ្វើការដោះស្រាយ។
លោក ចៅ ល័ក្ខវណ្ណា មន្រ្តីស៊ើបអង្កេតរបស់អង្គការសិទ្ធិមនុស្សលីកាដូប្រចាំខេត្តសៀមរាបបានមានប្រសាសន៍ថា ទំនាស់ដីធ្លីនេះជាទំនាស់យូរអង្វែង ដែលមានភាពស្មុគស្មាញ ដែលធ្វើឲ្យប្រជាពលរដ្ឋ មកពីសហគមន៍ទាំង១១នេះបន្តទៀមទាររកដំណោះស្រាយពីសាលាខេត្ត។
លោកនិយាយថា៖ «ដោយសារតែបញ្ហាទំនាស់វាផ្សេងៗគ្នា អញ្ចឹងទៅពលរដ្ឋគាត់សម្រេចចិត្តដាក់ជាញត្តិរួមមួយ ដើម្បីជូនអភិបាលខេត្ត ដែលសុំឲ្យមានដំណោះស្រាយសម្រាប់ពួកគាត់។ នៅក្នុងការឆ្លើយតបរបស់ឯកឧត្តមអភិបាលខេត្តរង គឺគាត់ថាដោយសាតែអភិបាលខេត្តលោកអត់បាននៅទីនេះ លោកបានជាប់បេសកកម្មចេញទៅប្រទេសក្រៅ អញ្ចឹងទៅសន្យាក្នុងកំឡុងពេលដែលឯកឧត្តមអភិបាលខេត្តលោកអញ្ជើញមកវិញ នឹងជូនព័ត៌មានក្នុងកំឡុងពេលរយៈ១០ថ្ងៃ»។
លោក គឹម ឆៃហៀង អភិបាលរងខេត្តសៀមរាបបានមានប្រសាសន៍ថា អាជ្ញាធរខេត្តបានចាប់ផ្តើមធ្វើការលើញត្តិនេះ ហើយប៉ុន្តែមិនដឹងថានឹងចប់ពេលណាទេ៖
«ការចាប់ផ្តើមយើងកំណត់បានតែបញ្ចប់ យើងមិនអាចកំណត់បាន។ ការចាប់ផ្តើមមានន័យថា មន្ត្រីរាជការចាប់ពីឥឡូវហ្នឹងតែម្តង។ យើងត្រូវធ្វើការសិក្សារកអង្គហេតុអង្គច្បាប់»។
ក្រុមប្រជាពលរដ្ឋដែលមានទំនាស់ដីធ្លីមកពីសហគមន៍ចំនួន១១ គឺស្រុកស្វាយលើ ស្រុកវ៉ារិន ស្រុកបន្ទាយស្រី ស្រុកអង្គរធំ ស្រុកប្រាសាទបាគង ស្រុកពួក និងក្រុងសៀមរាប៕
