លោក Emmanuel Macron ដែលជាអ្នកកណ្តាលនិយម និងលោកស្រី Marine Le Pen អ្នកស្នេហាជាតិស្តាំនិយមជ្រុល បាននាំមុខគេនៅក្នុងការបោះឆ្នោតជ្រើសរើសប្រធានាធិបតីជុំទីមួយកាលពីថ្ងៃអាទិត្យ ដែលបង្កើតប្រព័ន្ធនយោបាយថ្មីនៅក្នុងប្រទេសបារាំង និងអាចប៉ះពាល់ទៅលើសមាជិកភាពរបស់ប្រទេសនេះនៅក្នុងសហភាពអឺរ៉ុប។
អ្នកនយោបាយបារាំងទាំងឆេ្វងនិយមនិងស្តាំនិយមជំរុញជាបន្ទាន់ឲ្យអ្នកបោះឆ្នោតរារាំងដល់បេក្ខភាពរបស់លោកស្រី Le Pen ក្នុងការឆ្ពោះទៅកាន់ការប្រជែងគ្នានៅថ្ងៃទី៧ខែឧសភាខាងមុខនេះ ដោយនិយាយថា គំនិតជាតិនិយមជ្រុលដែលប្រឆាំងនឹងសហភាពអឺរ៉ុបនិងនយោបាយប្រឆាំងនឹងអន្តោប្រវេសន៍របស់លោកស្រីនឹងនាំមកនូវគ្រោះមហន្តរាយដល់ប្រទេសបារាំង។
ការជ្រើសរើសយកលោកស្រី Le Pen និងលោក Macron បង្ហាញពីឆន្ទៈរបស់អ្នកបោះឆ្នោតដែលមានជម្រើសខុសពីគ្នាស្រឡះទៅលើទស្សនវិស័យរបស់ពួកគេចំពោះអនាគតរបស់សហភាពអឺរ៉ុបនិងជំហររបស់បារាំងនៅក្នុងនោះ។
វាបង្ហាញពីសមរភូមិរវាងទស្សនវិស័យសុទិដ្ឋិនិយមរបស់លោក Macron ដែលយោគយល់ដោយបើកចំហរព្រំដែនជាមួយនឹងទស្សនៈខ្មៅងងឹតជាងនេះរបស់លោកស្រី Le Pen ដែលចង់ស្នើបិទព្រំដែន បន្តឹងសន្តិសុខ កាត់បន្ថយអន្តោប្រវេសន៍ និងបោះបង់ចោលរូបិយប័ណ្ណអឺរ៉ូ ហើយត្រឡប់ទៅប្រើប្រាស់រូបិយប័ណ្ណហ្វ្រង់វិញ៕
