នៅក្នុងចំណាត់ការមួយនាំឱ្យមានការភ្ញាក់ផ្អើល អតីតនាយកម្នាក់នៃការិយាល័យ FBI បានត្រូវតែងតាំងកាលពីថ្ងៃពុធឱ្យធ្វើជារដ្ឋអាជ្ញាពិសេសម្នាក់សម្រាប់មើលការខុសត្រូវលើការស៊ើបអង្កេតអំពី «កិច្ចខិតខំប្រឹងប្រែងរបស់រដ្ឋាភិបាលរុស្ស៊ីដើម្បីមានឥទ្ធិពលលើការបោះឆ្នោតប្រធានាធិបតីស.រ.អា.កាលពីឆ្នាំ២០១៦ និងអំពីបញ្ហាមានពាក់ព័ន្ធផ្សេងទៀត» នេះបើតាមការប្រាប់ឱ្យដឹងដោយក្រសួងយុត្តិធម៌ស.រ.អា.។
លោក Rod Rosenstein អនុរដ្ឋមន្ត្រីក្រសួងយុត្តិធម៌ស.រ.អា. ដែលកាលពីប៉ុន្មានថ្ងៃថ្មីៗនេះបានសម្តែងការសង្ស័យអំពីសេចក្តីត្រូវការសម្រាប់ឱ្យមានការស៊ើបអង្កេតឯករាជ្យមួយបែបនេះ បានពន្យល់ថាការតែងតាំងលោក Robert Mueller ឱ្យកាន់តំណែងជាទីប្រឹក្សាពិសេសខាងច្បាប់ ដែលគេស្គាល់ដែរថាជារដ្ឋអាជ្ញាពិសេស មិនមែនមានន័យថាជា «ការរកឃើញថាឧក្រិដ្ឋកម្មបានត្រូវប្រព្រឹត្តទេ ឬថាមានការធានារ៉ាប់រងថានឹងមានការចោទប្រកាន់ណាមួយឡើយ»។
លោក Rosenstein បាននិយាយបន្ថែមថា «អ្វីដែលខ្ញុំបានសម្រេចនេះគឺផ្អែកលើកាលៈទេសៈតែមួយគត់ ការយកចិត្តទុកដាក់របស់សាធារណជនតម្រូវឱ្យខ្ញុំដាក់ការស៊ើបអង្កេតនេះឱ្យស្ថិតនៅក្រោមអំណាចរបស់មនុស្សម្នាក់ដែលមានភាពឯករាជ្យពីការបញ្ជាពីខាងលើ»។
ដោយមិនបាននិយាយយោងដល់ការតែងតាំងលោក Mueller ទេ លោកប្រធានាធិបតី Donald Trump បាននិយាយនៅក្នុងសេចក្តីថ្លែងការណ៍មួយថា «ការស៊ើបអង្កេតល្អិតល្អន់មួយនឹងបញ្ជាក់ថាពិតអំពីអ្វីដែលយើងបានដឹងរួចស្រេចហើយ គឺគ្មានការឃុបឃិតរវាងក្រុមអ្នកឃោសនាបោះឆ្នោតរបស់ខ្ញុំ និងអង្គភាពបរទេសណាមួយទេ។ ខ្ញុំសង្ឃឹមថាបញ្ហានេះនឹងចប់ក្នុងពេលឆាប់ៗនេះ»។
នៅក្រោយមានការប្រកាសអំពីកិច្ចការថ្មីរបស់លោក លោក Mueller បានមានប្រសាសន៍ថា «ខ្ញុំទទួលយកការទទួលខុសត្រូវនេះហើយនឹងបំពេញកិច្ចការនេះតាមភាពល្អប្រសើរបំផុតនៃសមត្ថភាពរបស់ខ្ញុំ»។
លោក Mueller បានកាន់តំណែងខ្ពស់បំផុតក្នុងការិយាល័យ FBI ចំនួន១២ឆ្នាំ។ លោក James Comey បានបន្តតំណែងនេះពីលោកហើយបានត្រូវបណ្តេញចេញពីតំណែងកាលពីសប្តាហ៍មុនដោយប្រធានាធិបតី Trump ដែលជាចំណាត់ការមួយនាំឱ្យមានបញ្ហាជ្រួលច្របល់ខាងនយោបាយ៕
