លោក Trump ឈ្នះការបោះឆ្នោតដោយទទួលបានសំឡេងឆ្នោតប្រតិភូចំនួន ៣០៦សំឡេង ហើយគូប្រជែងរបស់លោកគឺលោកស្រី Hillary Clinton ទទួលបានតែ២៣២សំឡេងប៉ុណ្ណោះ។ ក៏ប៉ុន្តែរហូតពេលបញ្ចប់នៃការរាប់សន្លឹកឆ្នោត លទ្ធផលបានបង្ហាញថា លោកស្រី Hillary Clinton បានឈ្នះសំឡេងឆ្នោតប្រជាប្រិយលើសលោក Trump ដោយលោកស្រីទទួលបានចំនួន ៣លានសំឡេងច្រើនជាងសំឡេងដែលលោកទទួលបាន។ បន្ទាប់ពីការស្បថចូលកាន់តំណែងរួចមក លោក Trump បានថ្លែងថា មានការលួចបន្លំសន្លឹកឆ្នោត។ អ្នកនាំពាក្យសេតវិមានគឺលោក Sean Spicer បានបញ្ជាក់អំពីការ អះអាងនោះកាលពីថ្ងៃអង្គារកន្លងមក។
«អ្វីដែលលោកបានថ្លែងនោះគឺថា មានពលរដ្ឋពី៣ទៅ៥លាននាក់ ប្រហែលជាទៅបោះឆ្នោតខុសច្បាប់ បើផ្អែកតាមការសិក្សាមួយចំនួនដែលលោកបានឃើញ។ ប៉ុន្តែលោកដឹងច្បាស់ណាស់ថា លោកឈ្នះដោយសារតែលោកទទួលបានសំឡេងឆ្នោតប្រតិភូចំនួ៣០៦សំឡេង»។
រដ្ឋបាលរបស់លោក Trump ក៏បានអះអាងដែរថា ចំនួនអ្នកចូលរួមនៅក្នុងថ្ងៃស្បថចូលកាន់តំណែងរបស់លោកមានចំនួនច្រើនបំផុតមិនធ្លាប់មាន ដែលផ្ទុយពីការចុះផ្សាយ និងរូបភាពមួយចំនួនរបស់ប្រព័ន្ធផ្សព្វផ្សាយ។
អ្នកចូលរួមក្នុងការហែក្បួនស្រ្តី ឬ Women's March ដែលបាន ធ្វើឡើង១ថ្ងៃ ក្រោយពិធីស្បថចូលកាន់តំណែងនោះគឺមានចំនួនច្រើនជាងចំនួនអ្នកដែលមកចូលរួមនៅថ្ងៃស្បថចូលកាន់តំណែងទៅទៀត។ នេះបើយោងតាមការប៉ាន់ប្រមាណជាច្រើន។
សហការីរបស់លោក Trump ខាងគណបក្សសាធារណរដ្ឋ បាននិយាយបង្វៀង បញ្ហានេះ។ ប៉ុន្តែនៅពេលមានការសួរដេញដោលពីក្រុមអ្នកសារព័ត៌មាន លោក Paul Ryan ប្រធានសភាបានថ្លែងយ៉ាងដូច្នេះថា៖
«ខ្ញុំបាននិយាយអំពីបញ្ហានេះរួចរាល់ហើយ។ ខ្ញុំមិនបានឃើញភស្តុតាងអ្វីទាំងអស់ ហើយខ្ញុំបានបញ្ជាក់យ៉ាងច្បាស់អំពីបញ្ហានេះ»។
ហើយបន្ទាប់មកលោកបានប្តូរប្រធានបទទៅនិយាយរឿងផ្សេង។ ប៉ុន្តែខាងគណបក្សប្រជាធិបតេយ្យបានបញ្ជូនសារមួយយ៉ាងខ្លាំងទៅលោកប្រធានាធិបតីថា លោកនឹងទទួលខុសត្រូវលើអ្វីដែលលោកបាននិយាយ។
លោក Chuck Schumer សមាជិកព្រឹទ្ធសភាពីរដ្ឋញូវយ៉កថ្លែងថា៖
«អ្នកមិនអាចដឹកនាំរដ្ឋាភិបាលបានទេ អ្នកមិនអាចជួយពលរដ្ឋបានទេ អ្នកមិនអាចរក្សាសុវត្ថិភាពឲ្យអាមេរិកបានទេ ប្រសិនបើអ្នកមិនទទួលស្គាល់ការពិតនោះ។ នេះគឺជារឿងសាមញ្ញ។ ហើយបើការណ៍នេះកើតឡើងមែននោះ នោះប្រទេសនេះនឹងមានបញ្ហា។ ហើយនេះមិនមែនជាបញ្ហាប្រជាធិបតេយ្យទេ តែវាជាបញ្ហាក្រុមសាធារណរដ្ឋ ជាបញ្ហាក្រុមសេរីនិយម ជាបញ្ហាក្រុមអភិរក្សនិយម ដោយសារតែការដើរគេចពីការពិត»។
នៅក្នុងសេចក្តីថ្លែងការណ៍របស់លោក Chuck Schumer កាលពីថ្ងៃអង្គារ មេដឹកនាំសំឡេងភាគតិចនៅព្រឹទ្ធសភារូបនេះក៏បានស្តីបន្ទោសសហការីខាងគណបក្សសាធារណរដ្ឋ ដែលមិនបានធ្វើការឆ្លើយតបឲ្យបានពេញលេញទាក់ទិននឹងការអះអាងរបស់ប្រធានាធិបតី។
«នៅពេលដែលមានការនិយាយមិនពិតដូច្នេះ សហការីខាងគណបក្សសាធារណរដ្ឋមានកាតព្វកិច្ចបដិសេធព័ត៌មានទាំងនោះ មិនមែននិយាយបង្វៀងទេ»។
លោក Schumer ក៏បានថ្លែងបន្តក្នុងសម្តីដើមថា ក្នុងនាមជាប្រធានាធិបតី លោក Trump មិនគួរនិយាយអំពីការបោះឆ្នោត ឬក៏និយាយអំពីចំនួនមនុស្សដែលមកចូលរួមក្នុងពិធីស្បថចូលកាន់តំណែងនោះដែរ។ ប៉ុន្តែលោកគួរតែនិយាយអំពីចំនួនការងារដែលលោកនឹងបង្កើតឡើង។ ការសន្យាមួយក្នុងចំណោមការសន្យារបស់លោក Trump ក្នុងអំឡុងពេលយុទ្ធនាការរកសំឡេងឆ្នោត នោះគឺត្រូវស្តារឧស្សហកម្មផលិតកម្ម និងចរចាលើកិច្ចព្រមព្រៀងពាណិជ្ជកម្មឡើងវិញ ដែលលោកជឿជាក់ថា ប៉ះពាល់ដល់ពលករអាមេរិកាំងនោះ៕
ប្រែសម្រួលដោយ ស៊ូ ពេជ្រចិន្តា
