លោក Steve Beshear អតីតអភិបាលរដ្ឋ Kentucky បាននិយាយថា លោកប្រធានាធិបតីសហរដ្ឋអាមេរិក Donald Trump មិនបានគោរពទៅតាមការសន្យារបស់លោកក្នុងការជួយប្រជាពលរដ្ឋក្រីក្រនោះទេ ហើយការប្ដេជ្ញារបស់លោកចំពោះសន្តិសុខជាតិគឺកំពុងត្រូវបានគេតាមដានសង្កេតមើល។
លោក Beshear បានឆ្លើយតបបែបនេះចំពោះសុន្ទរកថារបស់លោក Trump ដែលថ្លែងទៅកាន់សភាទាំងពីរថ្នាក់កាលពីថ្ងៃយប់ថ្ងៃអង្គារម្សិលមិញ ដូចការឆ្លើយតបដែលគណបក្សប្រជាធិបតេយ្យធ្លាប់ធ្វើពីមុនៗមក។
លោកបាននិយាយយ៉ាងដូច្នេះថា៖ «លោកប្រធានាធិបតី Trump ធ្វើព្រងើយកន្តើយចំពោះការគំរាមកំហែងដ៏ធ្ងន់ធ្ងរចំពោះសន្តិសុខជាតិយើងពីសំណាក់ប្រទេសរុស្ស៊ី ដែលមិនមែនជាសម្ព័ន្ធមិត្តរបស់យើង។ ស្របពេលនោះដែរ លោកក៏បានធ្វើឲ្យសម្ព័ន្ធមិត្តរបស់យើងមានការអាក់អន់ស្រពន់ចិត្តផងដែរ»។
លោក Beshear បានបញ្ជាក់ថា វិធានការរបស់លោក Trump ចំពោះបញ្ហាសន្តិសុខ ធ្វើឲ្យសហរដ្ឋអាមេរិកមិនសូវមានសុវត្ថិភាព និងបាននិយាយថា លោក Trump បានប្រកាសសង្គ្រាមជាមួយនឹងជនភៀសខ្លួន និងជនអន្តោប្រវេសន៍។
លោក Trump រងការរិះគន់យ៉ាងចំៗពាក់ព័ន្ធនឹងបទបញ្ជារបស់លោកក្នុងការផ្អាកកម្មវិធីទទួលយកជនភៀសខ្លួនរបស់សហរដ្ឋអាមេរិក និងក្នុងការរារាំងជនជាតិអ៊ីរ៉ាក់ អ៊ីរ៉ង់ ស៊ីរី លីប៊ី យេម៉ែន សូម៉ាលី និងសូដង់ មិនឲ្យចូលមកក្នុងទឹកដីសហរដ្ឋអាមេរិក។ លោក Trump គ្រោងនឹងចេញបទបញ្ជាដូចនេះថ្មី ដែលមានការកែប្រែចំណុចមួយចំនួនក្នុងពេលឆាប់ៗនេះ។ លោកក៏បានដឹកនាំអាជ្ញាធរសហព័ន្ធ ឲ្យបង្កើនការពង្រឹងច្បាប់ប្រឆាំងនឹងជនណាដែលរស់នៅខុសច្បាប់ និងប្រព្រឹត្តបទល្មើសនៅក្នុងសហរដ្ឋអាមេរិកផងដែរ៕
