របាយការណ៍មួយនៅក្នុងកាសែតស.រ.អា.ធំមួយកាលពីយប់ថ្ងៃព្រហស្បតិ៍បាននិយាយថា ប្រធានាធិបតី Donald Trump បានហៅលោក James Comey នាយកការិយាល័យ FBI ទៅកាន់សេតវិមានកាលពីខែមករាដែលនៅទីនោះប្រធានាធិបតីអាមេរិកាំងរូបនេះបានសុំឱ្យលោក Comey «សន្យាអំពីភក្តីភាពដល់រូបលោក»។
លោក Trump បានដកលោក Comey ចេញពីតំណែងកាលពីថ្ងៃអង្គារហើយការណ៍នេះបានបណ្តាលឱ្យមានភាពវឹកវរខាងនយោបាយមួយ ហើយក៏មានកំណើនកង្វល់នៅក្នុងមជ្ឈដ្ឋានខ្លះអំពីវិបត្តិរដ្ឋធម្មនុញ្ញមួយផងដែរ។
សារព័ត៌មាន The New York Times បានផ្សាយថាលោក Comey បានប្រកែកមិនព្រមធ្វើការសន្យានេះទេ ក៏ប៉ុន្តែលោកបាននិយាយប្រាប់ Trump ថាលោក «នឹងទៀងត្រង់ជាមួយគាត់ជានិច្ច»។ បើតាមការរៀបរាប់របស់កាសែតនេះថា
ប្រធានាធិបតី Trump បានជំរុញបីបួនដងឱ្យលោក Comey សម្តែងភក្តីភាពដល់រូបគាត់ ហើយនៅទីបញ្ចប់លោក Comey បាននិយាយប្រាប់ប្រធានាធិបតីរូបនេះថាគាត់នឹងមាន «ភក្តីភាពប្រកបដោយភាពទៀងត្រង់» ពីសំណាក់នាយកការិយាល័យ FBI។
សារព័ត៌មាន The New York Times បានរាយការណ៍ថា លោក Comey បាននិយាយប្រាប់ពួកសហការីរបស់លោកអំពីការពិសារអាហារពេលយប់ជាមួយប្រធានាធិបតី Trump ហើយលោកបានសុំកុំឱ្យពួកគេនិយាយប្រាប់អ្នកឯទៀតនៅពេលលោកនៅកាន់តំណែងជានាយក FBI ក៏ប៉ុន្តែពួកសហការីទាំងនេះអាចនិយាយបានដោយសេរីអំពីសេចក្តីល្អិតល្អន់នៃការពិសារអាហារពេលយប់នោះនៅពេលនេះដែលលោក Comey លែងកាន់តំណែងជាន់ខ្ពស់នៅក្នុងការិយាល័យ FBI ទៀតហើយនោះ។
នៅក្នុងសេចក្តីសម្ភាសន៍មួយជាមួយបណ្តាញទូរទស្សន៍អាមេរិកាំង NBC កាលពីថ្ងៃព្រហស្បតិ៍ លោក Trump បានផ្តល់ការរៀបរាប់ប្លែកមួយអំពីការពិសារអាហារពេលយប់នោះ។ ប្រធានាធិបតីអាមេរិកាំងរូបនេះបាននិយាយថា លោក Comey បានសុំឱ្យមានជំនួបនេះពីព្រោះនាយកការិយាល័យ FBI រូបនេះចង់រក្សាការងាររបស់លោក។ លោក Trump មិនបាននិយាយអំពីការសុំឱ្យមានការសន្យាស្តីពីភក្តីភាពពីសំណាក់លោក Comey ទេ។
នៅក្នុងសេចក្តីសម្ភាសន៍ជាមួយបណ្តាញទូរទស្សន៍នោះ ប្រធានាធិបតី Trump បាននិយាយថាគាត់បានសួរនាយក FBI ថាតើគាត់កំពុងត្រូវស៊ើបអង្កេតឬទេ។
លោក Trump បានសួរលោក Comey ថា «ប្រសិនបើធ្វើកើត តើលោកអាចប្រាប់ខ្ញុំបានទេថាតើខ្ញុំស្ថិតនៅក្រោមការស៊ើបអង្កេតឬទេ? លោក Comey បាននិយាយថា លោកមិនស្ថិតនៅក្រោមការស៊ើបអង្កេតទេ»។
នៅពេលត្រូវសួរអំពីសក្ខីកម្មមានការស្បថស្បែរបស់លោក Comey ដែលលោកបានមានប្រសាសន៍ថាកំពុងមានការស៊ើបអង្កេតមួយស្តីពីយុទ្ធនាការឃោសនាបោះឆ្នោតប្រធានាធិបតីរបស់លោកកាលពីឆ្នាំ២០១៦ និងអំពីលទ្ធភាពនៃការឃុបឃិតជាមួយរដ្ឋាភិបាលរុស្ស៊ី ប្រធានាធិបតី Trump បាននិយាយជាថ្មីទៀតនៅក្នុងសេចក្តីសម្ភាសន៍តាមទូរទស្សន៍នោះថា «ខ្ញុំមិនស្ថិតនៅក្រោមការស៊ើបអង្កេតទេ»៕
