ភ្ជាប់​ទៅ​គេហទំព័រ​ទាក់ទង

លោក​នាយក​រដ្ឋមន្ត្រី​ចិន​ថ្លែង​នៅ​ក្នុង​សភា​អំពី​សេដ្ឋកិច្ច និង​បញ្ហា​ផ្សេងៗ​ទៀត


លោក​ Li Keqiang នាយក​រដ្ឋ​មន្រ្តី​ចិន​ថ្លែង​ពី​របាយការណ៍​ការងារ​រដ្ឋាភិបាល​ក្នុង​ពេល​បើក​ប្រជុំ​សភា National People's Congress នៅ​វិមាន Great Hall of the People ក្នុង​ក្រុង​ប៉េកាំង ប្រទេស​ចិន កាលពី​ថ្ងៃទី៥ ខែមីនា ឆ្នាំ២០១៧។

គណៈប្រតិភូ​រាប់ពាន់​នាក់​មក​ពី​តំបន់​នានា​នៅ​ទូទាំង​ប្រទេស​ចិន បាន​ជួប​ប្រជុំ​គ្នា​នៅ​ក្នុង​ការ​ប្រជុំ​ប្រចាំ​ឆ្នាំ​របស់​រដ្ឋ​សភា នៅ​ឯ​វិមាន​រដ្ឋសភា នៅ​ក្នុង​ទីក្រុង​ប៉េកាំង ដែល​នឹង​ចាប់ផ្ដើម​ពី​ថ្ងៃ​អាទិត្យ​នេះ​ត​ទៅ។

លោក​នាយក​រដ្ឋមន្ត្រី Li Keqiang បាន​ប្រាប់​គណៈប្រតិភូ​ដែល​បាន​ចូល​រួម​ថា ប្រទេស​ចិន​ចង់​ពង្រីក​ការ​រីក​ចម្រើន​សេដ្ឋកិច្ច​របស់​ខ្លួន​ឲ្យ​បាន​ចំនួន ៦,៥ ភាគរយ នៃ​ផលិតផល​ក្នុង​ស្រុក​សរុប GDP នៅ​ក្នុង​ឆ្នាំ ២០១៧ នេះ។

កាល​ពី​ឆ្នាំ​មុន ការ​រីក​ចម្រើន​សេដ្ឋកិច្ច​រំពឹង​ទុក​របស់​ប្រទេស​ចិន​គឺ​ចន្លោះ​ពី ៦, ៥ ភាគរយ និង ៧ ភាគរយ ហើយ​ការ​រីក​ចម្រើន​ពិត​ប្រាកដ​ដែល​ចិន​ទទួល​បាន​គឺ ៦,៧ ភាគរយ ដែល​នេះ​ជា​ការ​រីក​ចម្រើន​ដែល​ទាប​ជាង​គេ​បំផុត​នៅ​ក្នុង​រយៈពេល ២៦ ឆ្នាំ​កន្លង​មក​នេះ។

ការ​រំពឹង​ទុក​ចំពោះ​ការ​រីក​ចម្រើន​សេដ្ឋកិច្ច​មិន​សូវ​ខ្ពស់​ដូច​នេះ ត្រូវ​បាន​មេដឹកនាំ​នានា​គិត​ថា ជា​វិធី​មួយ​ដើម្បី​ដោះស្រាយ​ជាមួយ​នឹង​ការ​ព្រួយ​បារម្ភ​អំពី​កម្រិត​បំណុល​ខ្ពស់។

លោក​នាយក​រដ្ឋមន្ត្រី​ចិន​ក៏​បាន​សន្យា​ថា​នឹង​ប្រយុទ្ធ​ប្រឆាំង​នឹង​បញ្ហា​ដែល​មើល​ឃើញ​ជាក់ស្ដែង​នៅ​ក្នុង​ប្រទេស​មួយ គឺ​បញ្ហា​បំពុល​ខ្យល់​អាកាស។

លោក​បាន​និយាយ​យ៉ាង​ដូច្នេះ​ថា៖ «យើង​នឹង​ធ្វើ​ឲ្យ​ផ្ទៃ​មេឃ​របស់​យើង​មាន​ពណ៌​ខៀវ​ឡើង​វិញ។ យើង​នឹង​ពង្រឹង​ការ​ស្រាវជ្រាវ​លើ​មូលហេតុ​នៃ​ការ​ផ្សែង​អាប់​នេះ ដើម្បី​ជួយ​ដល់​មូលដ្ឋាន​វិទ្យាសាស្ត្រ និង​វិធានការ​ដែល​ត្រូវ​ធ្វើ‍»។

លោក Li Keqiang បាន​បន្ថែម​ទៀត​ថា មនុស្ស​គ្រប់​គ្នា​មាន​ការ​ទទួល​ខុស​ត្រូវ​ចំពោះ​ភាព​ជោគជ័យ​នៃ​ការ​ដោះស្រាយ​ជាមួយ​នឹង​បញ្ហា​នេះ៕

XS
SM
MD
LG