ប្រតិកម្មរបស់មេដឹកនាំពិភពលោកចំពោះការស្លាប់របស់លោក Fidel Castro រួមមានការសោកស្តាយ ហើយពេលខ្លះមានការរិះគន់ចំពោះមេដឹកនាំប្រទេសគុយបានេះ។ក៏ប៉ុន្តែចំពោះការសរសើររបស់លោក Justin Trudeau នៃប្រទេសកាណាដាចំពោះការស្មោះស្ម័គ្រនិងសេចក្តីស្រឡាញ់ចំពោះប្រជាពលរដ្ឋគុយបារបស់មេដឹកនាំផ្តាច់ការបដិវត្តិន៍បានធ្វើឲ្យមានការស្តីបន្ទោសពីអ្នកនយោបាយខ្លះរបស់កាណាដានិងសហរដ្ឋអាមេរិក។
លោកនាយករដ្ឋមន្រ្តីនៃប្រទេសកាណាដាបាននិយាយថា «ខ្ញុំដឹងថា ឪពុករបស់ខ្ញុំមានមោទនភាពបំផុតដោយបានហៅលោក Castro ថាជា មិត្តភក្តិហើយខ្ញុំក៏មានឱកាសបានជួបលោក Fidel នៅពេលដែលឪពុករបស់ខ្ញុំទទួលមរណភាព»។
លោកនាយករដ្ឋមន្រ្តី Trudeau ដែលបានអញ្ជើញទៅបំពេញទស្សនកិច្ចនៅប្រទេសគុយបានៅដើមខែនេះ បានមានប្រសាសន៍ថា «ខណៈដែលលោកជាឥស្សរជនដ៏ចម្រូងចម្រាសម្នាក់ ទាំងពួកអ្នកគាំទ្រលោក Castroនិងពួកអ្នកប្រឆាំង បានទទួលស្គាល់ពីការស្មោះស្ម័គ្រ និងការស្រឡាញ់ដ៏មហិមារបស់លោកចំពោះប្រជាពលរដ្ឋគុយបា ដែលមានឥទ្ធិពលដ៏ជ្រាលជ្រៅ។
លោកស្រី Kellie Leitch សមាជិកសភារបស់គណបក្សអភិរក្សនិយមកាណាដា បាននិយាយថា កំណត់សម្គាល់របស់លោកនាយករដ្ឋមន្រ្តី Trudeau អំពីលោក Castro មានសំនៀងដូចជាលោកនាយករដ្ឋមន្រ្តីអានសៀវភៅរឿង។
លោក Marco Rubio សមាជិកព្រឹទ្ធសភាសហរដ្ឋអាមេរិកដែលមានដើមកំណើតគុយបា មានការភ្ញាក់ផ្អើលពីការសរសើរលោក Castroរបស់នាយករដ្ឋមន្រ្តីកាណាដាដោយនិយាយថា តើនេះជាសេចក្តីថ្លែងការណ៍ពិតប្រាកដឬជាការត្រាប់កំប្លែងដើម្បីរិះគន់?។ ពីព្រោះប្រសិនបើវាជាសេចក្តីថ្លែងការណ៍ពីតប្រាកដពីនាយករដ្ឋមន្រ្តីនៃប្រ ទេសកាណាដា ការណ៍នេះជាការខ្មាសអៀននិងអាម៉ាសបំផុត៕
