តុលាការកំពូលនៅព្រឹកថ្ងៃពុធនេះ បានបញ្ចប់សវនាការលើបណ្ដឹងសារទុក្ខ ឬហៅថាបណ្ដឹងមិនសុខចិត្តលើការសម្រេចមិនអនុញ្ញាតឲ្យនៅក្រៅឃុំ របស់មន្ត្រីការពារសិទ្ធិមនុស្សអាដហុក៤រូប និង អគ្គលេខាធិការរងគណៈកម្មាធិការជាតិរៀបចំការបោះឆ្នោតមួយរូប ដែលត្រូវបានចាប់ខ្លួនកាលពីខែមេសា ពាក់ព័ន្ធនឹងបទសូកប៉ាន់ និងសមគំនិតសូកប៉ាន់នារីម្នាក់ដែលត្រូវបានគេសង្ស័យថាមានការពាក់ព័ន្ធស្នេហាជាមួយលោក កឹម សុខា អនុប្រធានគណបក្សសង្គ្រោះជាតិ។
ប្រធានក្រុមប្រឹក្សាជំនុំជម្រះតុលាការកំពូល លោកស្រី គិម សត្ថាវី និយាយថា ក្រុមប្រឹក្សាជំនុំជម្រះបានសម្រេចលើកពេលប្រកាសសាលដីកាទៅថ្ងៃទី៣០ ខែវិច្ឆិកាវិញ។
លោកស្រី និយាយថា តុលាការមានមូលហេតុគ្រប់គ្រាន់ដើម្បីបន្តឃុំខ្លួនដើម្បីស៊ើបអង្កេតអ្នកទាំង៥នេះ ដោយបង្ហាញមូលហេតុថា តុលាការត្រូវរង់ចាំសាក្សីដែលកំពុងជាប់បំពេញភារកិច្ចនៅក្រៅប្រទេសរយៈពេល១ឆ្នាំ។
ក្រុមមេធាវីការពារក្ដីឲ្យមន្ត្រីទាំង៥រូបរំពឹងថា ការប្រកាសសាលដីកានៅថ្ងៃទី៣០ខាងមុខនេះ នឹងមានលទ្ធផលវិជ្ជមានសម្រាប់កូនក្ដីរបស់ពួកគេ។
លោក សំ សុគង់ មេធាវីការពារក្តីឲ្យលោក នី ចរិយា ប្រាប់អ្នកសារព័ត៌មានថា ការបន្តឃុំខ្លួនកូនក្តីរបស់លោក និងមន្ត្រីអាដហុក៤រូបទៀតហាក់មិនចំណេញសម្រាប់រដ្ឋាភិបាល ស្របពេលដែលលោក និងកូនក្ដី សុទ្ធតែបានបង្ហាញពីមូលហេតុរឹងមាំក្នុងការស្នើឲ្យដោះលែងនៅក្រៅឃុំ។
ដូច្នេះលោករំពឹងថា តុលាការនឹងអនុញ្ញាតឲ្យកូនក្ដីរបស់លោកស្ថិតនៅក្រៅឃុំ។
«មិនមានករណីណាចាំបាច់ក្នុងការឃុំខ្លួនបន្តទៀតទេ ដោយសាររយៈពេលនៃការស៊ើបអង្កេតហ្នឹងគឺមានរយៈពេល៧ខែហើយ ហើយយើងគិតពីគោលការណ៍សេរីភាពជនជាប់ចោទ ត្រូវតែទទួលបាននូវសេរីភាពជាសំខាន់។ ទោះបីជាចៅក្រមស៊ើបសួរ គាត់ចង់បន្តការស៊ើបសួរ អានេះជានីតិវិធី ប៉ុន្តែអ្វីដែលយើងគិតជាសំខាន់គឺសេរីភាព ដោយសារបើសិនជាឲ្យគាត់នៅក្រៅឃុំទៅ វាធ្វើឲ្យចំណេញទាំងអស់គ្នា ចំណេញទាំងសង្គម ហើយចំណេញទាំងជនជាប់ចោទ»។
សហគមន៍អន្តរជាតិ និងសង្គមស៊ីវិលជាតិ និងអន្តរជាតិបាននិយាយថាការចាប់ខ្លួននេះគឺជាការគាបសង្កត់ទៅលើសេរីភាពក្នុងការបញ្ចេញមតិ និងការចូលរួមក្នុងឆាកនយោបាយ។
មន្ត្រីសមាគមអាដហុកទាំងបួនរូបដែលកំពុងជាប់ឃុំឃាំងរួមនោះមានលោក នី សុខា លោក យី សុខសាន្ត លោក ណៃ វ៉ង់ដា និងលោកស្រី លឹម មុនី។ ចំណែកឯលោក នី ចរិយា គឺជាអតីតមន្ត្រីជាន់ខ្ពស់នៃសមាគមនេះដែរ ហើយបច្ចុប្បន្ន លោកគឺជាអគ្គលេខាធិការរងនៃ គ.ជ.ប។
អ្នកទាំង៥ ត្រូវបានសាលាដំបូងរាជធានីភ្នំពេញសម្រេចឃុំខ្លួនបណ្ដោះអាសន្ន ក្រោយពីអង្គភាពប្រឆាំងអំពើពុករលួយបានកោះហៅមន្ត្រីការពារសិទ្ធិមនុស្សទាំងនេះ ដើម្បីសាកសួរពាក់ព័ន្ធនឹងបទសូកប៉ាន់សាក្សី និងសមគំនិតសូកប៉ាន់សាក្សី បន្ទាប់ពីនាងខុម ចាន់តារ៉ាទី ហៅស្រីមុំ បានឆ្លើយថា មន្ត្រីទាំង៥រូបនេះ បង្គាប់ឲ្យនាងនិយាយកុហកទាក់ទងនឹងរឿងអាស្រូវស្នេហាគួរឲ្យមន្ទិលរវាងរូបនាងជាមួយលោក កឹម សុខា ប្រធានស្ដីទីគណបក្សសង្គ្រោះជាតិ កាលពីចុងខែមេសាកន្លងមក។
នេះជាសវនាការជាសាធារណៈលើកទី១ដែលតុលាការបានបើក ក្រោយពីតុលាការឃុំខ្លួនមន្រ្តីទាំង៥រូបអស់រយៈពេលជាង៧ខែ និងបើកសវនាការអស់ជាច្រើនដងរួចមក។
សវនាការនេះ ក៏មានការចូលរួមឃ្លាំមើលពីមន្ត្រីស្ថានទូតជប៉ុន មន្ត្រីស្ថានទូតស៊ុយអែត មន្ត្រីអង្គការសហប្រជាជាតិ និងមន្ត្រីសិទ្ធិមនុស្សជាតិ និងអន្តរជាតិជាច្រើននាក់ទៀត។
បុគ្គលិកសមាគមអាដហុក និងមន្រ្តី គ.ជ.ប ទាំង៥រូប បានលើកឡើងពីមូលហេតុនៃការស្នើសុំនៅក្រៅឃុំរបស់ខ្លួនក្នុងសវនាការនៅព្រឹកថ្ងៃពុធនេះថា ពួកគេមិនបានប្រព្រឹត្តខុសដូចការចោទប្រកាន់របស់តុលាការទេ ហើយថា ពួកគេកំពុងមានជំងឺប្រចាំកាយ និងពួកមានតួនាទីត្រូវមើលថែទាំគ្រួសារ និងបន្តការងារជួយសង្គម។
អ្នកទាំង៥ ក៏បានលើកឡើងដែរថា ពួកគេគោរពតាមការកោះហៅរបស់តុលាការដើម្បីសួរនាំ ដាក់ប្រាក់ និងលិខិតឆ្លងដែនតម្កល់ ដើម្បីធានាថាពួកគេនឹងមិនអាចចាកចេញពីប្រទេសកម្ពុជាជាដើម។
ក្រុមមេធាវីចំនួន៦រូបដែលការពារក្ដីឲ្យមន្ត្រីទាំង៥រូប ក៏បានលើកឡើងថា កូនក្ដីរបស់ពួកគេមានមូលហេតុគ្រប់គ្រាន់ដើម្បីទទួលបានសិទ្ធិឲ្យបាននៅក្រៅឃុំ ព្រមទាំងបានធានាលើការស្នើសុំនៅក្រៅឃុំរបស់ពួកគេផងដែរ។
លោក ហួន ជុនឌី មេធាវីការពារសិទ្ធិមន្ត្រីអាដហុក ប្រាប់ VOA ថា ក្នុងសវនាការនាព្រឹកមិញនេះថា អង្គជំនុំជម្រះតុលាការកំពូលហាក់បង្ហាញពីការពិចារណាយ៉ាងល្អិតល្អន់ចំពោះមូលហេតុដែលកូនក្ដី និងមេធាវីបានលើកឡើង។
លោករំពឹងថា តុលាការកំពូលនឹងអនុញ្ញាតឲ្យកូនក្តីរបស់លោកស្ថិតនៅក្រៅឃុំ។
«តុលាការកំពូលធ្លាប់ផ្តល់នូវភាពយុត្តិធម៌នេះដល់ជនត្រូវចោទ ឬក៏ជនជាប់ចោទជាច្រើនរួមមកហើយ។ ដូច្នេះហើយ បានជាក្រុមមេធាវីយើងនៅតែមានក្ដីសង្ឃឹម និងយល់ជាវិជ្ជមានថា តុលាការកំពូលលើកនេះនឹងធ្វើការសម្រេចមួយដែលមានភាពសុក្រឹត និងយុត្តិធម៌ ដោយផ្អែកទៅលើផ្លូវច្បាប់ជាសំខាន់ ជាជាងពិចារណាលើបញ្ហាផ្សេងៗក្រៅពីយុត្តិធម៌»។
ខណៈសមត្ថកិច្ចបណ្ដើរចេញពីសាលសវនាការ មន្ត្រីសិទ្ធិមនុស្ស និងមន្ត្រី គ.ជ.ប ទាំង៥រូប ប្រាប់អ្នកសារព័ត៌មានទាំងដៃជាប់ខ្នោះថា តុលាការនឹងផ្ដល់យុត្តិធម៌ដល់ពួកគេ ដោយភាពត្រឹមត្រូវ យុត្តិធម៌តាមច្បាប់។
លោក អំ សំអាត អ្នកគ្រប់គ្រងបច្ចេកទេសការិយាល័យស៊ើបអង្កេតនៃអង្គការលីកាដូ ប្រាប់ VOA ថា មូលហេតុដែលបានលើកឡើងរបស់មន្ត្រីការពារសិទ្ធិមនុស្ស និងមន្ត្រី គ.ជ.ប ទាំង៥រូប រួមទាំងមេធាវីរបស់ពួកគេ មានហេតុផលសមស្របតាមការចែងរបស់ក្រមនីតិវិធីព្រហ្មទណ្ឌ ដែលអាចឲ្យពួកគេស្ថិតនៅក្រៅឃុំបណ្ដោះអាសន្នបាន។
«យើងឃើញថាលក្ខខណ្ឌដែលបានលើកឡើងទាំងអស់នេះ វាជាលក្ខខណ្ឌមួយដែលគ្រប់គ្រាន់ សម្រាប់តុលាការកំពូលលោកពិចារណាក្នុងការអនុញ្ញាតឲ្យនៅក្រៅឃុំបណ្ដោះអាសន្ន ក៏ប៉ុន្តែយ៉ាងណាយើងគ្រាន់តែមានសង្ឃឹមថាអ្នកទាំងអស់ហ្នឹងអាចនឹងនៅក្រៅឃុំបណ្ដោះអាសន្នបាន។ ប៉ុន្តែជាលទ្ធផលយើង ក៏រង់ចាំនៃការប្រកាសសាលដីកានៅថ្ងៃគម្រោងប្រកាសហ្នឹង»។
នៅថ្ងៃច័ន្ទសប្ដាហ៍នេះ បណ្ដុំអង្គការមិនមែនរដ្ឋាភិបាលជាង១០ បានហៅការបន្តឃុំខ្លួនបណ្ដោះអាសន្នលើអ្នកការពារសិទ្ធិមនុស្ស៤នាក់ និងអគ្គលេខាធិការរងម្នាក់នៃគណៈកម្មការរៀបចំការបោះឆ្នោត (គ.ជ.ប) ថា មិនស្របច្បាប់ជាតិ និងជាការអនុវត្តខុសពីបទដ្ឋានសិទ្ធិមនុស្សអន្តរជាតិ៕
