ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

កម្ពុជា​នឹង​សងផែនទី​ទៅ​អ.ស.ប​វិញ​នៅ​ថ្ងៃ​ពុធ​នេះ


ផែន​ទី​ដែល​ទទួល​បាន​ពី​អង្គការ​សហប្រជាជាតិ​ (អ.ស.ប) ត្រូវ​បាន​បង្ហាញ​នៅ​ក្នុង​ពិធី​ប្រគល់​ ទទួល​ និង​ផ្ទៀង​ផ្ទាត់​​ នៅ​វិមាន​សន្តិភាព​ កាល​ពី​ថ្ងៃ​ទី​២០​ ខែ​សីហា​ ឆ្នាំ​២០១៥។ (ប៉ាង​ ចំណាន/VOA)
ផែន​ទី​ដែល​ទទួល​បាន​ពី​អង្គការ​សហប្រជាជាតិ​ (អ.ស.ប) ត្រូវ​បាន​បង្ហាញ​នៅ​ក្នុង​ពិធី​ប្រគល់​ ទទួល​ និង​ផ្ទៀង​ផ្ទាត់​​ នៅ​វិមាន​សន្តិភាព​ កាល​ពី​ថ្ងៃ​ទី​២០​ ខែ​សីហា​ ឆ្នាំ​២០១៥។ (ប៉ាង​ ចំណាន/VOA)

រាជ​រដ្ឋាភិបាល​កម្ពុជា​​នឹង​ប្រគល់​សង​​ដែនទី​ ​UTM ១ភាគ​១០០ពាន់​ ចំនួន​១៨ផ្ទាំង​ ​ដែលខ្លួន​បាន​ខ្ចី​ពី​អង្គការ​សហប្រជាជាតិ​ ដើម្បី​យក​មក​ធ្វើការ​ផ្ទៀងផ្ទាត់​ជាមួយ​នឹង​​ផែនទី​​ ​ដែល​ប្រើ​សម្រាប់​បោះ​បង្គោល​ ​ព្រំដែន​កម្ពុជា​-វៀតណាម។

រាជ​រដ្ឋាភិបាល​កម្ពុជានឹង​ប្រគល់​សងដែនទី​ ​UTM ១ភាគ​១០០ពាន់​ ចំនួន​១៨ផ្ទាំង​ ​ដែលខ្លួន​បាន​ខ្ចី​ពី​អង្គការ​សហប្រជាជាតិ​ ដើម្បី​យក​មក​ធ្វើការ​ផ្ទៀងផ្ទាត់​ជាមួយ​នឹងផែនទី ​ដែល​ប្រើ​សម្រាប់​បោះ​បង្គោល​ ​ព្រំដែន​កម្ពុជា​-វៀតណាម។​ ​ខណៈ​ពេល​ដែល​ពេល​គណបក្ស​ជំទាស់​នៅតែ​មាន​ការ​មន្ទិល​សង្ស័យ​ទាក់ទិន​នឹង​ផែនទី​ ដែល​កំពុង​ប្រើប្រាស់​នា​ពេល​បច្ចុប្បន្ន។​

លោក​ ផៃ ស៊ីផាន​ រដ្ឋលេខាធិការ​នៃ​ទីស្តីការ​គណរដ្ឋ​មន្ត្រី បាន​ឲ្យ​ដឹង​ថា ​ពិធី​ប្រគល់​ផែនទី​១៨ផ្ទាំង​ដែល​កម្ពុជា​បាន​ខ្ចី​នឹង​ធ្វើ​ឡើង​នា​ថ្ងៃ​ពុធ​នេះ ​មុន​ពេល​ដែល​អ្នក​ជំនាញពីរ​រូប​របស់​អង្គការ​សហ​ប្រជាជាតិ​ចាក​ចេញ​ពី​ប្រទេស​កម្ពុជា​នោះ។​

«ហ្នឹង​ហើយ​បើ​ ប្រគល់​ឲ្យ​គេ​ ​គេ​នឹ​ង​យក​ទៅ​វិញ​ថ្ងៃ​ស្អែក​ ​ព្រោះ​នេះ​គឺ​ជា​ឯកសារ​ផ្លូវការ​របស់​គេ​នៅ​ក្នុង​បណ្ណាល័យ​នៃ​អង្គការ​សហប្រជាជាតិ។​ ​អាហ្នឹង​គឺជា​ការ​ងារ​របស់​គេ»។​

ផែន​ទី​ជិត​២០​ផ្ទាំង​ពី​អង្គការ​សហ​ប្រជាជាតិ​ ​និង​មន្ត្រី​ពីរ​រូប​របស់​អង្គការ​សហ​ប្រជាជាតិ ​បាន​មក​ដល់​ប្រទេស​កម្ពុជា​កាលពី​ថ្ងៃ​អង្គារ​សប្តាហ៍​មុន ​បន្ទាប់​ពី​លោក​នាយករដ្ឋ​ម​ន្ត្រី​ ហ៊ុន សែន​ បានស្នើ​ទៅ​អង្គការ​សហ​ប្រជា​ជាតិ​សុំខ្ចី​ផែនទី​ដើម​ទាំង​អស់​ ដើម្បី​ផ្ទៀង​ផ្ទាត់​ជាមួយ​ផែនទី​ខ្នាត​១ភាគ​១០០ពាន់​ ដែល​បោះ​ពុម្ព​ដោយ​ក្រុម​ភូមិសាស្ត្រ​ឥណ្ឌូចិន​ ដើម្បី​បំបាត់​មន្ទិល​សង្ស័យ​នានា​ដែល​បាន​កើត​មាន​ឡើង​នៅ​ក្នុង​ប្រទេស។​

​បញ្ហា​បោះ​បង្គោលព្រំដែន​កម្ពុជា​វៀតណាម ​និង​ការ​មន្ទិល​ទាក់ទិន​នឹង​ការប្រើប្រាស់​ផែនទី​នេះបាន​ឡើង​កំ​ដៅ​ជា​បន្តបន្ទាប់​នា​ពេល​កន្លង​មកនេះ​ ​ដោយ​សារ​តែ​សកម្មជន​ព្រំដែន​ដឹកនាំ​ដោយ​គណបក្ស​សង្គ្រោះ​ជាតិ​យល់​ថា​ ផែនទី​ដែល​រដ្ឋាភិបាល​កំពុង​ប្រើ​គឺជា​ផែនទី​ក្លែងក្លាយ។

កាលពី​ថ្ងៃ​ព្រហស្បតិ៍​សប្តាហ៍​មុន​ ​រដ្ឋាភិបាល​កម្ពុជា​បាន​បើក​បង្ហាញ​ និង​ផ្ទៀងផ្ទាត់​ផែនទីដែល​បាន​មក​ពី​អង្គការ​សហ​ប្រជា​ជាតិ​ ដោយ​មាន​ការចូលរួម​ពី​ឥស្សរជន​មួយ​ចំនួន​ ដូច​ជា​ ​តំណាង​គណបក្ស​នយោបាយ​ ​តំណាង​រដ្ឋសភា​ តំណាងព្រឹទ្ធសភា​ ​សំណាង​ក្រុម​ប្រឹក្សា​ធម្មនុញ្ញ​ និង​ឧត្តម​ក្រុម​ប្រឹក្សា​នៃ​អង្គចៅក្រម​ផង​ដែរ។​ ​ក្រោយពេល​ដែលផ្ទៀង​ផ្ទាត់​រយៈពេល​២ម៉ោង​ តំណាង​រដ្ឋាភិបាល លោក​ហោ ណាំហុង​ បាន​អះអាង​ថា​ ផែន​ទី​ដែល​កម្ពុជា​បាន​ប្រើប្រាស់​នោះ​ គឺវា​ដូច​គ្នា​នឹង​មាន​ខ្យែ​បន្ទាត់​ព្រំដែន​តែ​មួយ​ បើ​ទោះ​ជា​ផែនទី​ដែល​យក​ពី​អង្គ​ការ​សហ​ប្រជា​ជាតិ​ ​គឺ​ជា​ផែន​ទី​ UTM​ ​ឆ្នាំ​១៩៦៤ ដែល​កម្ពុជា​ភ្ជាប់​ជាមួយ​ពាក្យ​បណ្តឹង​ទៅ​អង្គការ​សហ​ប្រជា​ជាតិ​ក៏​ដោយ។ លោក​ក៏បាន​អះអាង​ថា​សូម​ឲ្យ​មន្ទិល​សង្ស័យ​ទាំងឡាយ​ «ជ្រះ​ស្រឡះ​ ​អ្នក​ខ្លះ​ដែល​កំពុង​មាន​ការ​សង្ស័យ​ ​មាន​ការ​ធ្វើ​សកម្មភាព​នានា​»​ សូម​ឲ្យ​ជ្រះ​ស្រ​ឡះ​ផង​ដែរ។

ទោះ​ជា​យ៉ាង​នេះ​ក្តី ក៏​តំណាង​គណបក្ស​សង្គ្រោះ​ជាតិដែល​ចូល​រួម​កិច្ចការ​ផ្ទៀងផ្ទាត់​ផែន​ទី​នោះ​បាន​បញ្ជាក់​ថា​ ខ្លួន​ត្រូវ​ការ​ឲ្យមាន​ការ​ផ្ទៀង​ផ្ទាត់​ផែន​ទី​នេះ​ឲ្យ​បាន​ច្រើន​ថែម​ទៀត។

លោក​ យឹម សុវណ្ណ​ អ្នក​នាំពាក្យ​គណបក្ស​សង្គ្រោះ​ជាតិ​បាន​ បញ្ជាក់​ប្រាប់​VOA​ ​កាលពី​ថ្ងៃ​អង្គារ៍​ថា​គណបក្ស​នេះ​ត្រូវការ​ឲ្យ​រដ្ឋាភិបាល​លោក​ ហ៊ុន សែន​ ធ្វើ​ការ​ប្រមូល​ផែនទី​បន្ថែម​ទៀត​យក​មក​បញ្ជាក់​ មុន​ពេល​ដែល​ខ្លួន​អាច​បញ្ជាក់​ពី​ជំហរ​របស់​ខ្លួន​នោះ។

«អត់​ទាន់​ចប់​ទេ​ ​ពីព្រោះ​បញ្ហា​នេះ​កា​រ​ស្មុគស្មាញ​ណាស់​ ផែ​នទី​មិន​ទាន់​មាន​ភាព​សុក្រឹត​នៅ​ឡើយ​ទេ ពីព្រោះ​នៅ​ខ្វះ​ច្រើន​ផ្ទាំង​ ​ហើយ​ផែនទី​ដែល​សម្តេច​ឪ​លោក​យក​ទៅ​តម្កល់​នៅ​អង្គការ​សហ​ប្រជា​ជាតិ​ហ្នឹង​ក៏​មិន​ទាន់​ឃើញ​ ​ឥឡូវនេះ​យើង​មិនទាន់​ធ្វើ​ការ​សន្និដ្ឋាន​អ្វី​ទាំង​អស់»​។​

​លោក​ ​ផៃ ស៊ីផាន​ បាន​បញ្ជាក់​ថា​ ផែនទី​ដែល​រដ្ឋាភិបាល​កម្ពុជា​ប្រើប្រាស់​បច្ចុប្បន្ន​នេះ​គឺ​ជា​ផែនទី​ផ្លូវ​ការ​របស់​កម្ពុជា​ ​ដែល​ទទួល​ស្គាល់​ដោយ​រដ្ឋសភា​ជាតិ​ និង​ព្រះមហា​ក្សត្រ​របស់​ប្រទេស​កម្ពុជា​។​ រីឯ​ការ ​ផ្ទៀង​ផ្ទាត់​កាល​ពី​សប្តាហ៍​កន្លង​ទៅ​ គឺ​បំបាត់​ការ​មន្ទិលសង្ស័យ​ ដែ​លលើក​ឡើង​ដោយ​គណបក្ស​ជំទាស់​នោះ។​

«ហើយ​ហេតុ​ម៉េច​បាន​ចាំ​បាច់​ ធ្វើ​ផែនទី​ពិគ្រោះ​ហ្នឹង​ យក​មក​ឲ្យ​? ​ ​ពីព្រោះ​យើង​ចង់​បញ្ចប់​ឲ្យ​អស់​ពី​ភាព​មន្ទិល​សង្ស័យ​របស់​គណបក្ស​សង្គ្រោះ​ជាតិ​ ​ឬ​ប្រជាពលរដ្ឋ​ដែល​ទទួល​បាន​ឥទ្ធិពល​ ​អំពី​ការ​ផ្សព្វ​ផ្សាយ​មួយ​ដែល​វា​មិន​ពិត។​ អាហ្នឹង​គឺ​វា​អញ្ចឹង​ឯង។​ ដើម្បី​បញ្ចប់​អា​សាច់​រឿង​ហ្នឹង»​។​

​កាល​ពី​ខែ​កក្កដា​កន្លង​ទៅ​នេះ លោកនាយ​ករដ្ឋមន្ត្រី​ ហ៊ុន សែន​ ក៏​បាន​សរសេរ​លិខិត​ផ្លូវការ​ស្នើរ​សុំ​ខ្ចី​ផែនទី​bonne​ ខ្នាត​១ភាគ១០០​ ​ពាន់​ពី​ប្រទេស​មហា​អំណាច​ចំនួន​បី​ គឺ​សហរដ្ឋ​អាមេរិច​ ​បារាំង ​និង ចក្រភព​អង់គ្លេស​ផង​ដែរ។ លោក​ ហោ ណាំហុង​ ក៏​បាន​បញ្ជាក់​ក្នុង​ពិធី​ផ្ទៀងផ្ទាត់​ ផែនទី​កាល​ពី​សប្តាហ៍​មុន​ថា ប្រទេស​បារាំង​បាន​ឆ្លើយតប​នឹង​សំណូមពររ​បស់​កម្ពុជា​ដោយ​នឹង​ផ្ញើ​ផែនទី​នោះ​មក​កម្ពុជា​ក្នុង​ពេល​ឆាប់ៗ​ ​ហើយ​រដ្ឋាភិបាល​កម្ពុជា​នឹង​បើក​ឲ្យ​មាន​ការផ្ទៀង​ផ្ទាត់​ផែន​ទី​សារ​ជាថ្មី​ផង​ដែរ។​

កាល​ពី​ថ្ងៃ​សុក្រ​សប្តាហ៍​កន្លង​ទៅ លោក​ David Cameron ​នាយក​រដ្ឋមន្ត្រី​នៃ​ចក្រភព​អង់គ្លេស​បាន​ឆ្លើយតប​ទៅ​នឹង​លិខិត​របស់​លោក​ ហ៊ុន សែន​ ដោយ​បញ្ជាក់​ថា​អង់គ្លេស​មិន​មាន​ផែនទី ​ដែល​កម្ពុជា​ស្នើ​នោះ​ទេ​នៅក្នុង​កន្លែង​រក្សា​ឯកសារ​ជាតិ​របស់​ខ្លួន​ ក៏​ប៉ុន្តែ​លោកជឿជាក់​ថា​ អង់គ្លេស​មាន​ផែនទី​Bonne ខ្នាត​១ ភាគ១០០​ ​ពាន់​នៅ​ក្នុង​បណ្ណាល័យ​ជាតិ​របស់​ខ្លួន។​ នេះ​បើ​យោង​តាម​សារ​លិខិត​ដែល​បាន​ផ្សាយ​ក្នុង​គេហ​ទំព័រ​របស់​ទី​ស្តីការ​គណៈរដ្ឋមន្ត្រី​កម្ពុជា​នា​ពេល​ថ្មីៗ​នេះ​។

លោក​ ហ៊ុន សែន ​ក៏​បាន​ឆ្លើយ​តប​ថា​ លោក​នឹង​បញ្ជូន​មន្ត្រីទូត​ ដែល​នៅក្នុង​ចក្រភព​អង់គ្លេស​ឲ្យ​ទៅ​ពិនិត្យ​បណ្ណាល័យ​ British Library​ ​ដែលជា​កន្លែង​សម្រាប់​សាធារណៈជនគ្រប់​រូប​នោះ៕

XS
SM
MD
LG