ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

កម្ពុជា​មើល​ឃើញ​ពី​សារៈសំខាន់​នៃ​ការសិក្សា​តាម​ជំនាញ​ STEM


ពិធី​សម្ភោធ​ដាក់​ឲ្យ​ប្រើប្រាស់​សៀវភៅ​មគ្គុទេសន៍​ «មុខរបរ​ ឬ​អាជីព​នៅ​ពេល​អនាគត​ក្នុង​វិស័យ​វិទ្យាសាស្ត្រ​ បច្ចេកវិទ្យា​ វិស្វកម្ម​ និង​គណិតវិទ្យា​» (STEM) កាល​ពី​ថ្ងៃ​ទី​១៧ ខែ​កុម្ភៈ ឆ្នាំ​២០១៦ ក្នុង​រាជធានី​ភ្នំពេញ។​ (ហ៊ាន សុជាតា​/ VOA)​
ពិធី​សម្ភោធ​ដាក់​ឲ្យ​ប្រើប្រាស់​សៀវភៅ​មគ្គុទេសន៍​ «មុខរបរ​ ឬ​អាជីព​នៅ​ពេល​អនាគត​ក្នុង​វិស័យ​វិទ្យាសាស្ត្រ​ បច្ចេកវិទ្យា​ វិស្វកម្ម​ និង​គណិតវិទ្យា​» (STEM) កាល​ពី​ថ្ងៃ​ទី​១៧ ខែ​កុម្ភៈ ឆ្នាំ​២០១៦ ក្នុង​រាជធានី​ភ្នំពេញ។​ (ហ៊ាន សុជាតា​/ VOA)​

មន្ត្រី​ក្រសួង​អប់រំ​​​លើក​ឡើង​ថា ​ឪពុក​ម្តាយ ​ឬ​ អាណា​ព្យាបាល​សិស្ស​ ​គប្បី​ពន្យល់​បន្ថែម​​និង​ចូលរួម​បណ្តុះ​គំនិត​កូនៗ​របស់​ខ្លួន​​ឲ្យ​ចាប់​អារម្មណ៍​លើ​មុខវិជ្ជា ​STEM ​នេះ​ផង​ដែរ។​

​កម្ពុជា​កំពុង​បង្វែរ​ទិស​ដៅ​អប់រំ​របស់​ខ្លួន​ទៅកាន់​ជំនាញ​សំខាន់​ចំនួន​៤គឺ​មុខវិជ្ជា​ គឺ​វិទ្យាសាស្ត្រ​ បច្ចេកវិទ្យា​ វិស្វកម្ម​ និង​គណិតវិទ្យា​ ​ដែល​គេ​ស្គាល់​ថា​ជា STEM។​ ការ​បង្វែរ​ទិសដៅ​នេះ​គឺ ដើម្បី​បណ្តុះ​បណ្តាល​ធនធាន​មនុស្ស​ផ្នែក ​STEM ​ដែល​កម្ពុជា ​ត្រូវ​ការ​ជា​ចាំ​បាច់​នា​ពេល​ខាង​មុខ​ ស្រប​ពេល​ដែល​យុវជន​កម្ពុជា​ ជា​ច្រើន​លើស​លប់​កំពុង​ចាប់​ជំនាញ​ខុស​ពី​តម្រូវ​ការ​ទីផ្សារ​ការងារ។​

ទន្ទឹម​នឹង​ការ​លើក​ទឹក​ចិត្ត ​ឲ្យ​យុវជន​កម្ពុជា​ជ្រើសរើស​យក​មុខវិជ្ជា​ STEM​ ក្រោយ​ពី​បញ្ចប់​ថ្នាក់​ទុតិយភូមិ​ ឬ​ថ្នាក់ទី១២​នោះ ការ​លើក​កម្ពស់​ការ​យល់​ដឹង​អំពី​STEM​ពី​ថ្នាក់តូច​ និង​ការ​អនុវត្តជាក់ស្តែង​គឺ​ជា​កាតាលិករ​២​សំខាន់ដែល​មិន​អាច​ខ្វះ​បាន។​ នេះ​បើ​តាម​ការឲ្យ​ដឹង​របស់ លោក រស់ សាលីន ​អ្នក​នាំ​ពាក្យ​ក្រសួង​អប់រំ​ យុវជន​ និង​កីឡា។​

មន្ត្រី​រូប​នេះ​ក៏បាន​បញ្ជាក់​ប្រាប់​ VOA ​ថា​ក្រសួង​អប់រំ​បាន​និង​កំពុង​រៀបចំ​ដាក់​បញ្ចូល​កម្មវិធី​អប់រំ​ទាក់ទង​នឹង​STEMឲ្យ​កាន់​តែ​ច្រើន​ថែម​ទៀត​ចាប់តាំង​ពី​ថ្នាក់​បឋមសិក្សា​ រហូត​ដល់​វិទ្យាល័យ​។​ ការ​ដាក់​បញ្ចូល​នេះ​ មាន​ទាំង​ទ្រឹស្តី ​និង​ការអនុវត្ត​ជាក់​ស្តែង​នៅ​ក្នុង​បន្ទប់​ពិសោធន៍​ខ្នាត​តូច​នៅ​តាម​សាលា​រៀន​នានា ​ផង​ដែរ។​

«គោល​ការណ៍​ STEMនេះ​ទូលំទូលាយ ​ហើយ​វា​មាន​កម្រិត​ ដូច្នេះ​យើង​នឹង​យក​គោលការណ៍ ​STEM ​មក​អនុវត្ត​ថា​តើ​ផ្នែក​ណា​មួយ​យើង​យក​មក​បញ្ចូល​ក្នុង​មធ្យមសិក្សា​ទុតិយភូមិ​ ​ផ្នែក​ណា​គួរ​បញ្ចូល​កម្រិតបឋមសិក្សា។​ ​ចឹង​ទេ​យើង​ត្រូវ​គិត​ពី​របៀប​នៃ​ការ​ដាក់​ ​STEM​ នៅ​តាម​កម្រិត​សិក្សា។ នៅ​ក្នុង​ឆ្នាំ​២០១៧​ ​២០១៨​ខាង​មុខ​នេះ​ ​យើង​អាច​មាន​កម្មវិធី​សិក្សា​មួយ​ដែល​បញ្ចូល​ STEM ​នៅ​ក្នុង​នេះ»។​

​លោក​ រស់​ សាលីន ​ឲ្យ​ដឹង​ថា​ការ​បញ្ជ្រាប​ចំណេះ​ដឹង​ STEM​ ​ពី​ថ្នាក់​តូច​នេះ​ ​នឹង​អាច​ជួយកសាងមូលដ្ឋាន​គ្រឹះ​ STEM ​ដល់​សិស្ស​ឲ្យ​កាន់​តែ​រឹង​មាំ​ ​ព្រម​ទាំងជំរុញ​ឲ្យ​យុវជន​កាន់​តែ​ច្រើន​ចាប់​យក​ជំនាញ ​STEM ​នេះ​នា​ពេល​អនាគត។​ ការណ៍​នេះ​ នឹង​ឆ្លើយ​តប​នឹង​បញ្ហា​កង្វះ​ធនធាន​ផ្នែក ​STEM​ នៅ​កម្ពុជា​ ក៏​ដូច​ជា​ដោះស្រាយ​បញ្ហា​ចន្លោះ​ប្រហោង​នៃ​ជំនាញ​ការងារ​ផងដែរ។​

«STEM នេះ​ជា​គោល​ការណ៍​មួយ​ដែល​ច្របាច់​បញ្ចូល​គ្នា​នៃ​គំនិត​ថ្មី​មួយ​ដែល​ក្មេងៗ​អាច​ទទួល​គំនិត​STEMពី​តូច​មក​តែ​ម្តង​ ​ចឹង​គាត់​យល់​ពី​វិទ្យាសាស្ត្រ ​ ការពិសោធន៍​ បច្ចេកវិទ្យា​ទំនើប​ពី​ក្មេង​តែ​ម្តង។ ចឹង​វា​ចេញ​ពី​មូលដ្ឋាន​នៃ​ការ​គិត​របស់​ក្មេង​ ជា​ផ្នែក​មួយ​នៃ​ការអនុវត្តSTEMហ្នឹង​ផង ហើយ​នៅ​ពេល​ដែល​គាត់​រៀន​ដល់​មធ្យមសិក្សា ​ដល់​ឩត្តម​សិក្សា​ គាត់​ចង់​រៀន​ផ្នែក​វិទ្យាសាស្ត្រ​កាន់​តែ​ច្រើន»។​

អ្នក​នាំ​ពាក្យ​រូប​នេះ​ លើក​ឡើង​ថា​ឪពុក​ម្តាយ ​ឬ​ អាណា​ព្យាបាល​សិស្ស​ ​គប្បី​ពន្យល់​បន្ថែម​ និង​ចូលរួម​បណ្តុះ​គំនិត​កូនៗ​របស់​ខ្លួនឲ្យ​ចាប់​អារម្មណ៍​លើ​មុខវិជ្ជា ​STEM ​នេះ​ផង​ដែរ។​

ក្នុង​នោះ​ជំនាញ​សំខាន់ៗ​ ​ទាំង​២០​របស់​ ​STEM ​ដែល​ស្ថិត​ក្នុង​តម្រូវការ​ ​ក្នុង​ទីផ្សារ​កម្ពុជា​ ​រួមមាន​ ​អ្នក​ត្រួត​ពិនិត្យ​សង្វាក់​ផលិតកម្ម​ អ្នក​បច្ចេកទេស​គ្រឿង​ម៉ាស៊ីន​ស្វ័យ​ប្រវត្តិ​ ​ស្ថាបត្យករ​ ​វិស្វករ​សំណង់​ស៊ីវិល​ ​មេការ​សំណង់​ ​នាយក​គម្រោង​ វិស្វករ​ទឹក​ អ្នក​ឯកទេស​អនាម័យ​ទឹក​ ​អ្នក​ឯកទេស​សុវត្ថិភាព​ចំណី​អាហារ​ អ្នក​គីមី​វិទ្យា​ ​វិស្វករ​បណ្តាញ​ ឬ​ស្ថាបត្យករ​ប្រព័ន្ធ​ ​អ្នក​បង្កើត​កម្មវិធី​សូហ្វវែ​ ​អ្នក​ឯកទេស​សុខភាព​សាធារណៈ​ ​សេដ្ឋវិទូ​ ​គ្រូពេទ្យ​ផ្នែក​ជំងឺ​ទូទៅ​ ​អ្នក​បច្ចេកទេស​នៅ​មន្ទីរ​ពិសោធន៍​វេជ្ជសាស្ត្រ​ អ្នក​ចិត្ត​វិទ្យា​ អ្នក​វិភាគ​ស្ថិតិ​ធានា​រ៉ាប់រង​ អ្នក​វិភាគ​ហិរញ្ញ​វត្ថុ​ និង​យន្ត​ការី​ ​ជាដើម។​

បន្ថែម​ពីលើ​ការ​តម្រង់​ទិស​ជំនាញ ​STEM​ ​នៅ​កម្ពុជា​ឲ្យ​កាន់​តែ​មាន​សក្តានុពល​ និង​មាន​ប្រសិទ្ធភាព​ វា​ក៏​ទាមទារ​ផង​ដែរ​នូវការ​ចូលរួម​ពីភាគី​ពាក់ព័ន្ធ​ទាំង ​វិស័យ​ឯកជន​ ​អាណា​ព្យាបាល​ ​និង​សិស្ស​ និស្សិត​ខ្លួន​ឯង​ផ្ទាល់។​

មជ្ឈមណ្ឌល Kids City​ គឺជា​ស្ថាប័ន​ឯកជន​មួយ​ ដែល​បាន​គាំ​ទ្រ​វិស័យ​ STEM​ នៅ​កម្ពុជា ដោយ​បាន ​បំពាក់ឧបករណ៍​ សកម្មភាព​កម្សាន្ត ​និង​ការ​អប់រំ​ផ្នែក​វិទ្យាសាស្ត្រ។​ ​អគ្គនាយក​ Kids City​ លោក​ ម៉េង​ ហៀ​ង ​ពន្យល់​ថា ​ភាព​ជោគ​ជ័យ​នៃ​អនាគត​ STEM ​គប្បី​មាន​កិច្ច​សហការ​រវាង​ស្ថាប័នអប់​រំ ​និង​វិស័យ​ឯកជន​ដូច​ខ្លួន។​ លោក​ថា​កន្លង​មក ​Kids City​ បាន​រួម​ចំណែក​ដើរ​តួ​ជា​កន្លែងអនុវត្ត បំពេញ​បន្ថែម​ឲ្យ​ទ្រឹស្តី​ដែល​កុមារ​សិក្សា​នៅ​ឯ​សាលា​រៀន។​

«កាល​ដែល​យើង​បង្កើត​ Kids City ហ្នឹង ​យើង​មាន​គម្រោង​រួច​ហើយ​ ដោយសារ​ថា​ប្រទេស​យើងអត់​ទាន់​មាន​សាល​វិទ្យាសាស្ត្រ​ ​សាល​ស្រាវជ្រាវ។ ហើយ​ដោយសារ​យើង​បើក​ទី​កន្លែង​កម្សាន្ត យើង​គិត​ថា​គួរ​គប្បីមាន​សាល​នេះ​នៅ​ក្នុង​អគារ​ដើម្បី​ក្មេងៗ​បាន​មក​លេង​ផង​បាន​មក​រៀន​ផង។​ ការ​រៀន​មុខវិជ្ជា ​STEM​ នេះ ​បើ​ធ្វើឲ្យ​គាត់​ឃើញ​ គាត់​ចូលចិត្ត​ គាត់​ឆ្ងល់ ​គាត់​សប្បាយ​នឹង​ចូលរួម​អនុវត្ត​ជាមួយ​ អាហ្នឹង​ជា​ភាព​ជោគ​ជ័យ​នៃ ​ការ​អប់រំ​មុខវិជ្ជា STEM»។​

នា​ពេល​ចុង​ក្រោយ​នេះ​ ​ក្រសួង​អប់រំ​ ​ស្ថានទូត​អង់គ្លេស​ និង​វិទ្យាស្ថាន​ IDP​ ដែល​ផ្តល់​សេវាកម្ម​អប់រំ ​បាន​សហការ​គ្នា​ជ្រើស​រើស​ទូត​សុឆន្ទៈ​របស់​STEM​កម្ពុជា​ចំនួន​៦៣រូប ​ដើម្បី​លើក​កម្ពស់​ការ​យល់​ដឹង​អំពី STEM​ ​និង​លើក​ទឹក​ចិត្ត​ឲ្យយុវជន​កម្ពុជា​ជ្រើស​រើស STEM​ ធ្វើ​ជា​អាជីពទៅ​ថ្ងៃ​អនាគត។​

កញ្ញា វន​ ស្រី​ម៉ៅ​ ជា​ប្រធាន​ផ្នែក​ទី​ផ្សារ​នៃ​វិទ្យាស្ថាន​ IDP ដែល​ធ្វើ​ការ​ជិត​ស្និទ្ធជាមួយ​ទូត​សុឆន្ទៈ​ STEM​ របស់​ស្ថានទូត​អង់គ្លេស​ប្រចាំ​ក្រុង​ភ្នំពេញ។ ​កញ្ញា​ទទួល​ស្គាល់​ថា​ ការ​បណ្តុះ​បណ្តាល​ STEM ពី​ថ្នាក់​តូច​គឺ​ជា​ការ​សាងសង់មូលដ្ឋាន​គ្រឹះ​STEM ​រឹង​មាំដល់​កុមារ។​ ​ក៏​ប៉ុន្តែ​ដោយសារ​តែ​នា​ពេល​នេះ​ ​កម្ពុជា​កំពុង​ត្រូវ​ការ​បរិមាណ​នៃ​អ្នក​រៀន ​STEM​ ច្រើន​ ​ហេតុ​នេះ​ទើប​ទូត​សុឆន្ទៈ ​STEM​ កំណត់​យក​ត្រឹម​សិស្ស​វិទ្យាល័យ​ជា​គោល​ដៅ​ចម្បង​ជា​មុន​សិន។​

«ខ្ញុំ​ដឹង​ថា​បើ​យើង​ទៅផ្សព្វ​ផ្សាយ​ជាមួយ​ក្មេង​ ចាប់​ផ្តើ​ម​កាន់​តែ​តូច​កាន់​តែ​ប្រសើរ​ វា​មាន​ប្រសិទ្ធភាព​ហើយ​ ​ក៏ប៉ុន្តែ​យើង​ត្រូវ​ការ​ឥឡូវ​ទីផ្សារ​ការងារ​យើង​កំពុង​ខ្វះខាត​ ចឹង​យើង​ធ្វើ​បាន​ពី​ក្មេង​ចាប់​ពីតូច​ល្អ​ តែ​យើង​អាច​កំណត់​គោលដៅ​យើង​ត្រឹម​តែ​សិស្ស​ទី៩ដល់ទី១២សិន»។​

​នា​ពេល​បច្ចុប្បន្ន​ រដ្ឋាភិបាល​កម្ពុជា​និង​អ្នក​ជំនាញ​លើ​វិស័យ​អប់រំ​ ​បាន​ផ្តល់​អាទិភាព​ចំពោះ​មុខវិជ្ជា ​STEM​ នេះ​។​ ​ជាក់​ស្តែង​ ​ក្រសួង​អប់រំ​ក៏​បាន​រៀប​ចំ​ពិព័រណ៍​វិស្វកម្ម​ និង​វិទ្យាសាស្រ្ត​លើក​ដំបូង​នៅ​កម្ពុជា​កាល​ពី​ឆ្នាំ​២០១៥​ ​ដោយ​មាន​អ្នក​ចូលរួម​ជាង​៥០០០​នាក់​។​ ក្រសួង​អប់រំ​ គ្រោង​នឹង​ធ្វើពិព័រណ៍​វិស្វកម្ម​ និង​វិទ្យាសាស្រ្តនេះ​លើក​ជា​ទី២ នៅ​ក្នុង​ខែ​មិនា​ ឆ្នាំ២០១៦​នេះ​។​ ​ស្រប​ពេល​ជាមួយ​គ្នា​ដែរ​ ស្ថាន​ទូត​អង់គ្លេស​ប្រចាំ​នៅ​កម្ពុជា​ ​បាន​ចេញ​ផ្សាយ​សៀវភៅ​មួយ​មាន​ចំណង​ជើង​ថា ​«STEM អាជីព​ការងារ​នាពេល​អនាគត​» ​ដើម្បី​ជា​មគ្គុទេសក៏​ឱកាស​ការងារ ​STEM​សម្រាប់​សិស្ស​និសិ្សត​ និង​អាណា​ព្យាបាល​ ​កាល​ពី​សប្តាហ៍​កន្លង​ទៅ​ ​ដើម្បី​បញ្ជ្រាបការ​យល់​ដឹង​អំពី​ការ​សិក្សា​មុខវិជ្ជាដ៏​មាន​សារៈ​សំខាន់​នេះ​ឲ្យ​បាន​ច្រើន​ថែម​ទៀត៕

XS
SM
MD
LG