អាជ្ញាធរមានសមត្ថកិច្ចនៅខេត្តកោះកុងបានបំបែកក្រុមអ្នកតវ៉ាដែលស្នើសុំឲ្យមានការដោះលែងសកម្មជនបីនាក់នៃចលនាមាតាធម្មជាតិ បន្ទាប់ពីក្រុមអ្នកតវ៉ាបានស្រែកទាមទារអស់រយៈពេលជិត២សប្តាហ៍មកហើយឲ្យមានការដោះលែងអ្នកទាំងបីនាក់នេះ។ ទោះបីជាមានការបង្រ្កាបដែលនាំឲ្យអ្នកតវ៉ាខ្លះរងរបួស និងមានការចាប់ខ្លួនសកម្មជនសិទ្ធិ និងអ្នកសារព័ត៌មានក្តី អាជ្ញាធរបានថ្លែងការពារចំណាត់ការនេះថា ជាការរក្សាសណ្តាប់ធ្នាប់សាធារណៈ ដើម្បីប្រយោជន៍ប្រជាពលរដ្ឋទូទៅនៅក្នុងក្រុងខេមរភូមិន្ទនៃខេត្តកោះកុង។
អាជ្ញាធរមានសមត្ថកិច្ចខេត្តកោះកុងនៅព្រឹកថ្ងៃពុធនេះបានឃាត់ខ្លួនសកម្មជនសិទ្ធិមនុស្ស អ្នកតវ៉ា និងអ្នកសារព័ត៌មានចំនួន១៧រូប នៅក្នុងការចុះបំបែកក្រុមអ្នកតវ៉ា ដែលទាមទារឲ្យអាជ្ញាធរដោះលែងសកម្មជនបរិស្ថានបីនាក់នៃចលនាមាតាធម្មជាតិ។ នេះបើតាមការបញ្ជាក់ពីសកម្មជនសិទ្ធិមនុស្ស និងអាជ្ញាធរខេត្ត។
ការបំបែកក្រុមអ្នកតវ៉ានេះបានកើតមានឡើងបន្ទាប់ពីក្រុមអ្នកតវ៉ាបានបោះទីតាំងនៅក្នុងទីលានកីឡាបាល់ទាត់ខេត្តកោះកុង ដើម្បីធ្វើជាទីជម្រកសម្រាប់ធ្វើការតវ៉ាទាមទារឲ្យដោះលែងសកម្មជនទាំងបីរូបដែលត្រូវតុលាការខេត្តកោះកុងសម្រេចឃុំខ្លួនកាលពីខែសីហាកន្លងទៅនោះ។ នៅមុនការបំបែកនេះ អាជ្ញាធរមានសមត្ថកិច្ចបានឃាត់ខ្លួនសកម្មជនសិទ្ធិមនុស្ស និងអ្នកសារព័ត៌មាន ដើម្បីឲ្យអាជ្ញាធរមានសមត្ថកិច្ចមានភាពងាយស្រួលក្នុងការធ្វើសកម្មភាព។
ការតវ៉ាក្នុងរបស់សកម្មជនតាមហ្វេសប៊ុកកាលពីខែសីហា៖
លោកផល ចម្រើន មន្ត្រីឃ្លាំមើលសិទ្ធិមនុស្សនៃមជ្ឈមណ្ឌលអប់រំច្បាប់សម្រាប់សហគមន៍ បានឲ្យដឹងថា អាជ្ញាធរក៏បានបើកផ្លូវឲ្យក្រុមបាតុករមួយក្រុមទៀតចូលទៅបង្កទំនាស់ជាមួយអ្នកតវ៉ាដែលទាមទារឲ្យដោះលែងសកម្មជនបរិស្ថាននៅឯទីលានកីឡាបាល់ទាត់ខេត្តកោះកុងនោះដែរ។
លោកនិយាយថា៖
«យើងឃើញអាជ្ញាធរអត់ព្យាយាមរារាំងពួកដែលនាំបាតុករមកលើកផ្លាកទាមទារហ្នឹងទេ គឺអាជ្ញាធរព្យាយាមលើករនាំងឲ្យពួកហ្នឹងដើរចូលទៅជិតបាតុករដែលមកតវ៉ាទាមទារឲ្យមានការដោះលែងនោះ។ អញ្ចឹង យើងអាចសន្និដ្ឋានថា គឺជាល្បិចរបស់អាជ្ញាធរដែលចង់បំបែកហ្វូងបាតុករទាំងអស់នោះ»។
លោកផល ចម្រើនក៏នៅក្នុងចំណោមអ្នកដែលត្រូវបានចាប់ខ្លួននៅព្រឹកថ្ងៃពុធនេះដែរ។ ពេលកំពុងជាប់នៅក្នុងស្នងការដ្ឋាននគរបាលខេត្តកោះកុង លោកផល ចម្រើននិយាយថា សកម្មជនផ្សេងទៀតក៏កំពុងស្ថិតនៅក្នុងការសាកសួរផងដែរ ក្នុងនោះគឺមានលោកអ៊ិន គង់ជិត អ្នកសម្របសម្រួលអង្គការលីកាដូប្រចាំនៅខេត្តកោះកុង។
លោកអ៊ិន គង់ជិត ដែលនៅក្នុងស្នងការដ្ឋាននគរបាលខេត្តកោះកុងដែរនោះ បានបញ្ជាក់ថា ក្រុមអ្នកតវ៉ា ដែលទាមទារឲ្យដោះលែងសកម្មជនបរិស្ថាននោះ បានបញ្ឈប់ការតវ៉ារបស់ពួកគេហើយនៅព្រឹកនេះ ហើយពួកគេបន្តសម្រាកនៅក្នុងទីលានបាល់ទាត់ខេត្តកោះកុង ពីព្រោះការតវ៉ាផ្សេងទៀតបានមានកើតឡើងនៅមុខតុលាការសាលាដំបូងខេត្តកោះកុងទាក់ទិននិងវិវាទដីធ្លីមួយ។
ប៉ុន្តែគាប់ជួនពេលនោះ ក្រុមបាតុករមួយក្រុមទៀត មានគ្នាប្រមាណ១០០នាក់ បានលើកបដារស្រែកតវ៉ាស្នើឲ្យបញ្ឈប់ការតវ៉ានានា ដែលនាំឲ្យខូចសណ្តាប់ធ្នាប់ក្នុងក្រុងខេមរភូមិន្ទ។ ស្របពេលជាមួយគ្នានេះ ក្រុមបាតុករទាំងនោះក៏ដើរសំដៅចូលទៅរកក្រុមអ្នកតវ៉ាទាក់ទងសំណុំរឿងបរិស្ថាន ដែលកំពុងនៅក្នុងទីលានបាល់ទាត់នោះ។
លោកអ៊ិន គង់ជិតបានបន្តថា លោក កុងប៊ូ ប៊ុនហាំង ព្រះរាជអាជ្ញាតុលាការខេត្តកោះក៏បានបញ្ជាឲ្យកម្លាំងមានសមត្ថកិច្ចចាប់ខ្លួនអ្នកឃ្លាំមើលសិទ្ធិមនុស្ស និងអ្នកសារព័ត៌មានដែរ មុនពេលអាជ្ញាធរចូលទៅបំបែកក្រុមអ្នកតវ៉ាទាក់ទងសំណុំរឿងបរិស្ថាន។ អាជ្ញាធរមានសមត្ថកិច្ចបានរុះរើ និងរឹបអូសរបស់របរ សម្ភារៈរបស់អ្នកតវ៉ាទាំងនោះមកស្នងការដ្ឋាននគរបាលខេត្ត។ លោកបញ្ជាក់បន្ថែមថា នៅក្នុងការបង្រ្កាបនេះ ស្រ្តីពីរនាក់បានរងគ្រោះ ដោយម្នាក់សន្លប់ និងម្នាក់ទៀតរងរបួស។
កញ្ញា អ៊ុត រីឌី វ័យ១៨ឆ្នាំ អ្នកតវ៉ាម្នាក់មកពីសហគមន៍កោះស្រឡៅ ក្នុងខេត្តកោះកុង ដែលរងរបួសត្រង់មាត់ និងជើង បានហៅការបង្ក្រាបនេះថា៖
«ខ្ញុំនឹកគិតឃើញទិដ្ឋភាពហ្នឹងគួរឲ្យរន្ធត់ រន្ធត់មែនទែនសម្រាប់ខ្មែរដែលធ្វើបាបខ្មែរខ្លួនឯង។ គាត់មានអំណាច រំលោទបំពានអ្នកដទៃ ប្រើអំណាចរបស់ខ្លួនមកលើអ្នកដែលក្រីក្រ។ និយាយទៅរំលោទបំពានមនុស្សទាំងរស់តែម្តង»។
លោក រៀល ច័ន្ទតារា អធិការប៉ូលិសក្រុងខេមរភូមិន្ទ បានថ្លែងថា លោកមិនបានដឹងពីហេតុការណ៍នៃការបំបែកក្រុមអ្នកតវ៉ានេះទេ។ រីឯលោកសំ ឃិតវៀន ស្នងការប៉ូលិសខេត្តកោះកុង បដិសេធមិនធ្វើការអធិប្បាយទេដោយលោកនិយាយថា លោកជាប់ប្រជុំនៅភ្នំពេញ។
ដោយឡែក លោក ប៉ែន ប៊ុនឈួយ អភិបាលរងក្រុងខេមរភូមិន្ទ បានបញ្ជាក់ប្រាប់វីអូអេថា អាជ្ញាធរមិនបានធ្វើការបង្ក្រាបនោះទេ។ លោកមានប្រសាសន៍ថា៖
«អត់មានបង្ក្រាបអីទេ ក្នុងបញ្ហានេះ។ ក្នុងនេះ ដូចខ្ញុំបានបញ្ជាក់អញ្ចឹង ហើយ បងប្អូនប្រជាពលរដ្ឋ ដែលនៅតវ៉ាហ្នឹង អញ្ចឹងបានមានបងប្អូនមួយចំនួនហ្នឹងគាត់ធុញទ្រាន់»។
លោកអភិបាលរងបានបន្ថែមថា ប្រជាពលរដ្ឋឯទៀត ក្នុងក្រុងខេមរភូមិន្ទកើតទុក្ខពីការធ្លាក់ចុះជីវភាពដោយសារសកម្មភាពតវ៉ានាពេលកន្លងមក ទាក់ទងនឹងសំណុំរឿងសកម្មជនបរិស្ថាននេះ។ លោកបានបដិសេធអំពីការរងរបួសនានាផងដែរ ហើយថា ការនាំខ្លួនសកម្មជនសិទ្ធិមនុស្ស និងអ្នកសារព័ត៌មានទៅសាកសួរនេះគឺជាគ្រាន់តែការណែនាំប៉ុណ្ណោះ។
ចលនាមាតាធម្មជាតិបានធ្វើការយ៉ាងសកម្មនៅក្នុងកិច្ចការការពារបរិស្ថាននៅក្នុងខេត្តកោះកុង។ ក្រៅពីការតវ៉ាឲ្យបញ្ឈប់ការបូមខ្សាច់ដ៏មហន្តរាយដល់បរិស្ថាននេះ ក្រុមការពារបរិស្ថាននេះក៏បានទប់ស្កាត់មិនឲ្យមានការវិនិយោគទំនប់វារីអគ្គិសនីលើស្ទឹងអារ៉ែងនៃជួរភ្នំក្រវ៉ាញ ដែលវិនិយោគដោយក្រុមហ៊ុនចិន Sinohydro ផងដែរ។ សកម្មភាពរបស់ពួកគេមិនបានធ្វើឱ្យអាជ្ញាធរនិងអ្នកពាក់ព័ន្ធមួយចំនួនសប្បាយចិត្តទេ។
ការបង្រ្កាបទៅលើក្រុមអ្នកតវ៉ា ដែលទាមទារឲ្យមានការដោះលែងសកម្មជននៃចលនាមាតាធម្មជាតិនេះ បានកើតមានឡើងនៅចំថ្ងៃដែលអាជ្ញាធរខេត្តកោះកុងកំណត់ថា ថ្ងៃពុធនេះជាថ្ងៃចុងក្រោយសម្រាប់ពលរដ្ឋមកពីសហគមន៍នានានៅក្នុងខេត្តកោះកុងដែលធ្វើការតវ៉ានោះ ត្រូវត្រឡប់ទៅលំនៅដ្ឋានរៀងៗខ្លួនវិញ។ ក្រុមសកម្មជនសិទ្ធិមនុស្សបានហៅការចាប់ខ្លួនរបស់ពួកគេថា ជាការបំពានដល់សិទ្ធិរបស់ប្រជាពលរដ្ឋក្នុងសង្គមប្រជាធិបតេយ្យ៕
