ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

រដ្ឋមន្ត្រី​ពាណិជ្ជកម្ម​សន្យា​​កែទម្រង់​«ស៊ី​ជម្រៅ»​ទៅ​កាន់​អ្នក​វិនិយោគ​អាមេរិក


ទាញ​យក​ពី​តំណភ្ជាប់​ដើម

រដ្ឋមន្ត្រី​ពាណិជ្ជកម្ម​សន្យា​​កែទម្រង់​«ស៊ី​ជម្រៅ»​ទៅ​កាន់​អ្នក​វិនិយោគ​អាមេរិក

លោក​ ស៊ុន ចាន់ថុល ទេសរដ្ឋមន្ត្រី​និង​រដ្ឋមន្ត្រី​ក្រសួង​ពាណិជ្ជកម្ម​កម្ពុជា​បាន​បញ្ចប់​ទស្សនកិច្ចនៅសហរដ្ឋ​អាមេរិក​ដើម្បី​ទាក់ទាញ​អ្នក​វិនិយោគ​ ដោយសង្កត់​ធ្ងន់​អំពីការ​ប្តេជ្ញា​ចិត្ត​របស់រាជរដ្ឋាភិបាល​កម្ពុជា​ក្នុង​ការ​កែទម្រង់​«ស៊ីជម្រៅ»និង​សម្រួល​ដល់​បរិយាកាស​វិនិយោគ។​

លោក​ថ្លែង​ថា៖ «យើង​ធ្វើ​ការ​កែទម្រង់​នេះ ដើម្បី​សម្រួល​ដល់​អ្នក​វិនិយោគ ទាល់​យើង​ធ្វើ​ការ​សម្រួល​ដល់​គាត់​នេះ កាត់​បន្ថយ​ចំណាយ​ក្រៅ​ផ្លូវការ កាត់​បន្ថយ​ចំណាយ​ដឹកជញ្ជូន កាត់​បន្ថយ​ចំណាយ​ខាង​ភ្លើង បណ្តុះបណ្តាល​បង​ប្អូន​ប្រជាពលរដ្ឋយើង​ឲ្យ​មាន​ចំណេះ​វិជ្ជា។ ធ្វើ​ការ​ហ្នឹង អាហ្នឹង​អ្នក​វិនិយោគ​គាត់​នឹង​យល់ ហើយ​ ជា​ការ​ប្តេជ្ញា​ចិត្ត​ ជា​ឆន្ទះ​របស់​រាជរដ្ឋាភិបាល​ក្នុង​ការ​កែទម្រង់​ស៊ីជម្រៅ​ដើម្បី​ជួយ​សម្រួល​ដល់​អ្នក​វិនិយោគ។»

លោក​ទេសរដ្ឋមន្ត្រី​ថ្លែងដូច្នេះ​នៅក្នុង​អំឡុង​បទ​បង្ហាញ​មួយស្តី​អំពី​សក្តានុពលវិនិយោគនៅ​កម្ពុជា នៅឯ​វិទ្យាស្ថាន​សិក្សា​យុទ្ធសាស្ត្រ​និង​កិច្ចការ​អន្តរជាតិ​ CSIS ក្នុង​រដ្ឋធានី​វ៉ាស៊ីនតោនកាល​ពី​ថ្ងៃ​ច័ន្ទ​ នៅ​ចុង​បញ្ចប់​នៃ​បេសកកម្ម​ពាណិជ្ជកម្ម​រយៈ​ពេល​មួយ​សប្តាហ៍​ដែល​រួម​មាន​ទស្សនកិច្ច​នៅ​ទី​ក្រុង Los Angeles និង Seattle ផង​ដែរ។

លោក​រដ្ឋមន្ត្រី​ពាណិជ្ជកម្ម​បាន​ភ្ជាប់​ឆន្ទៈ​នយោបាយ​ថ្មី​នេះ​ទៅ​នឹង​លទ្ធផលនៃ​ការ​បោះឆ្នោត​កាល​ពី​ឆ្នាំ​២០១៣។

«បើ​យើង​ចង់​ឈ្នះ​ឆ្នោត​នៅ​ក្នុង​ឆ្នាំ​២០១៨ ហើយ​តម្រូវ​ស្ថានភាព​បច្ចុប្បន្ន យើង​ត្រូវ​ប្រកាន់​ខ្ជាប់​នូវរបៀបវារៈ​កំណែទម្រង់ ហើយ​ធ្វើ​កំណែ​ទម្រង់​ឲ្យ​បាន​រហ័ស បើ​មិន​ដូច្នេះ​ទេ យើង​មិន​អាច​ដល់​គោលដៅ​ទេ។ ដូច្នេះ​ហើយ​យើងច្បាស់​ថា​យើង​ត្រូវ​តែ​ធ្វើ​កំណែ​ទម្រង់។ បើ​មិនកែទម្រង់​ទេ យើង​នឹង​មាន​បញ្ហា​នៅ​ឆ្នាំ​២០១៨។»

នៅ​ក្នុង​ការ​បោះឆ្នោត​ជាតិ​កាល​ពី​ខែ​កក្កដាឆ្នាំ​២០១៣ គណបក្ស​ប្រជាជន​កម្ពុជា​បានថយ​ចុះ​សំឡេង​ពី​៩០​អាសនៈ​មក​ត្រឹម​៦៨​អាសនៈ។ ការ​ស្ទង់​មតិមួយ​របស់​អង្គការវិទ្យាស្ថាន​សាធារណរដ្ឋ​អន្តរជាតិ IRI ធ្វើ​ឡើងនៅក្រោយ​ការ​បោះឆ្នោត​បង្ហាញ​ថា​ ពលរដ្ឋកម្ពុជា​មានទុទិដ្ឋិនិយម​ជាង​មុន​ចំពោះ​ទិសដៅ​អភិវឌ្ឍន៍​របស់​ប្រទេសជាតិ។ មូលហេតុសំខាន់ៗ​៣​ដែល​អ្នកត្រូវ​ផ្តល់​ឲ្យ​គឺ អំពើ​ពុករលួយ​កើន​ឡើង សាច់ញាតិ​និង​បក្សពួក​និយម និង​ការ​ខួចខាត​បរិស្ថាន​។

លោក​ទេសរដ្ឋមន្ត្រី​ ស៊ុន ចាន់ថុន និង​ជា​រដ្ឋមន្ត្រីក្រសួង​ពាណិជ្ជកម្ម​កម្ពុជាបង្ហាញ​ផែនទី​បណ្តាញ​ផ្លូវ​ដឹកជញ្ជូន​កម្ពុជា​នៅ​ក្នុង​បទ​បង្ហាញ​មួយ​អំពី​«កំណែទម្រង់​សេដ្ឋ​កិច្ច​នៅ​កម្ពុជា»នៅ​ឯ​មជ្ឈមណ្ឌល​សិក្សា​អំពី​យុទ្ធសាស្ត្រ​និង​កិច្ចការ​អន្តរជាតិ​ Center for Strategic and International Studies (CSIS) ក្នុង​រដ្ឋធានី​វ៉ាស៊ីនតោន កាល​ពី​ថ្ងៃ​ច័ន្ទ​ទី​២៣ ខែ​មិថុនា ឆ្នាំ​២០១៤។ (សឹង សុផាត/វីអូអេ)
លោក​ទេសរដ្ឋមន្ត្រី​ ស៊ុន ចាន់ថុន និង​ជា​រដ្ឋមន្ត្រីក្រសួង​ពាណិជ្ជកម្ម​កម្ពុជាបង្ហាញ​ផែនទី​បណ្តាញ​ផ្លូវ​ដឹកជញ្ជូន​កម្ពុជា​នៅ​ក្នុង​បទ​បង្ហាញ​មួយ​អំពី​«កំណែទម្រង់​សេដ្ឋ​កិច្ច​នៅ​កម្ពុជា»នៅ​ឯ​មជ្ឈមណ្ឌល​សិក្សា​អំពី​យុទ្ធសាស្ត្រ​និង​កិច្ចការ​អន្តរជាតិ​ Center for Strategic and International Studies (CSIS) ក្នុង​រដ្ឋធានី​វ៉ាស៊ីនតោន កាល​ពី​ថ្ងៃ​ច័ន្ទ​ទី​២៣ ខែ​មិថុនា ឆ្នាំ​២០១៤។ (សឹង សុផាត/វីអូអេ)

ស្រប​នឹង​ការ​ប្រែប្រួល​នយោបាយ​ក្នុង​ស្រុក​នេះ ប្រទេស​កម្ពុជា​ក៏ត្រូវ​ការ​អ្នក​វិនិយោគ​បរទេស​កាន់​តែ​ច្រើន​ដើម្បីបង្កើត​ការងារ​ដល់​យុវជន​ដែល​ចូល​ក្នុង​ទី​ផ្សារ​ការងារ​ប្រមាណ​៣​សែន​នាក់​ក្នុង​មួយ​ឆ្នាំ ហើយ​ដើម្បី​ត្រៀមខ្លួន​ក្នុង​ការ​ចូល​ក្នុង​សហគមន៍​សេដ្ឋកិច្ច​អាស៊ាន​នៅ​ចុង​ឆ្នាំ​២០១៥។

លោក Alex Feldman ប្រធាននិង​ជា​នាយកប្រតិបត្តិ​នៃ​ក្រុមប្រឹក្សា​ពាណិជ្ជកម្ម​អាមេរិក-អាស៊ាន (US-ASEAN Business Council) នៅ​រដ្ឋធានី​វ៉ាស៊ីនតោន​ថ្លែង​ថា ​ចំណាប់​អារម្មណ៍​អ្នក​វិនិយោគ​អាមេរិកចំពោះ​កម្ពុជា​បាន​កើន​ឡើង​ជា​រៀង​រាល់​ឆ្នាំ។ ប៉ុន្តែ​លោក​នៅ​មិន​ទាន់ប្រាកដ​ថាកំណែ​ទម្រង់នៅ​ពេល​នេះស៊ីជម្រៅ​ដូច​អ្វី​ដែល​អ្នក​វិនិយោគ​ចង់​បាន​នៅ​ឡើយ។

លោក​ថ្លែង​ថា៖ «អ្វី​ដែល​លោក​រដ្ឋមន្ត្រី​បាន​ថ្លែង​នៅ​ថ្ងៃ​នេះ​ គឺ​វិជ្ជមាន​ទាំង​អស់​សម្រាប់​ទាក់ទាញ​អ្នក​វិនិយោគ។ យើង​បាន​ឃើញ​ការ​ផ្លាស់​ប្តូរ​ខ្លះ។ ប៉ុន្តែ​ការ​ផ្លាស់​ប្តូរ​ទាំង​នោះប្រហែល​មិន​ទាន់សម​ល្មមដល់​កម្រិត​ដែល​អ្នក​វិនិយោគ​និង​រដ្ឋាភិបាល​អាមេរិក​ចង់​បាន​នៅ​ឡើយ។ សង្ឃឹម​ថា​លើក​នេះ​យើង​នឹង​ឃើញ​កំណែ​ទម្រង់​ខ្លាំង​ថែម​ទៀត។ ប៉ុន្តែ​យើង​ត្រូវ​រង់​ចាំ​មើល​សិន។»

លោក​ Alex Feldman ថ្លែង​ថា​កម្ពុជា​គួរ​ផ្តោត​លើ​កំណែ​ទម្រង់​ទៅការ​បន្ត​កសាង​ហេដ្ឋារចនាសម្ព័ន្ធ បន្ត​បង្កើនជំនាញ​ពលករ​ខ្មែរ និងជា​ពិសេស​បន្ត​ប្រឆាំង​នឹង​អំពើ​ពុក​រលួយ។

ក្នុងឆ្នាំ​២០១៣​កន្លង​ទៅ​នេះ ប្រទេស​កម្ពុជា​បាន​ធ្លាក់ចំណាត់ថ្នាក់មក​ជា​ប្រទេស​មាន​អំពើ​ពុករលួយ​ជាង​គេ​នៅក្នុង​តំបន់​អាស៊ាន ​ហើយបាន​ធ្លាក់​ចំណាត់​ថ្នាក់ខាងលក្ខណៈ​ប្រកួត​ប្រជែង​ ខណៈ​ដែល​ប្រទេសអាស៊ាន​ដទៃ​ទៀត​បាន​កើត​ចំណាត់​ថ្នាក់​។

លោក​ទេសរដ្ឋមន្ត្រីស៊ុន ចាន់ថុល បាន​កត់​សម្គាល់​ថា​ កម្រិត​នៃ​កំណែទម្រង់ប្រព័ន្ធ​សេដ្ឋកិច្ចបច្ចុប្បន្ន​នេះ​មិន​ធ្លាប់​មាន​ពី​មុន​មក​ទេ​នៅ​កម្ពុជា។ លោកបាន​លើក​ឧទាហរណ៍​ទាក់ទង​នឹងការ​អនុម័ត​ច្បាប់​ប្រឆាំង​អំពើ​ពុក​រលួយ ការ​បង្កើត​អង្គភាព​ប្រឆាំង​អំពើ​ពុករលួយ និង​កំណែទម្រង់​នៅ​ក្នុង​ក្រសួង​ពាណិជ្ជកម្ម​របស់​លោក​ផ្ទាល់​ដោយ ​បង្កើតការប្រកួត​ប្រជែង​សមត្ថភាព​បុគ្គលិក និង​ការ​ធ្វើ​ស្វ័យប្រវត្តិកម្ម (automation) នៃ​ការចុះ​បញ្ជី​ពាណិជ្ជកម្ម​ដែលលោក​ថា​ជួយ​កាត់​បន្ថយ​ការ​ចំណាយ​ក្រៅ​ផ្លូវការ។​

ប៉ុន្តែ​លោក​ Storm Tiv អ្នក​ស្រាវជ្រាវប្រចាំអាស៊ី​នៅអង្គការ​ឃ្លាំ​មើល​សិទ្ធិ​មនុស្ស Human Rights Watch ថ្លែង​ថា ការ​ប្រឆាំង​អំពើ​ពុក​រលួយ​អាច​សម្រេច​បាន​ជា​ទ្រង់ទ្រាយ​ធំ​លុះ​ត្រា​តែអង្គភាព​ប្រឆាំង​អំពើ​ពុករលួយ​អាច​មាន​អំណាចធ្វើ​ឲ្យ​មាន​តម្លាភាពទាក់ទង​នឹង​ការ​ប្រកាស​ទ្រព្យ​សម្បត្តិ។

«កង្វះ​លទ្ធភាព​ការ​ផ្សាយ​ជា​សាធារណៈ​អំពី​ទ្រព្យ​សម្បត្តិរបស់​រដ្ឋមន្ត្រី​ ធ្វើ​ឲ្យ​អំពើ​ពុក​រលួយ​នៅ​តែ​ជា​បញ្ហា។ បើ​មិន​ផ្សាយ​ទ្រព្យ​សម្បត្តិ​ជា​សាធារណៈទេ​នោះ កិច្ចការ​របស់​អង្គភាព​ប្រឆាំង​អំពើ​ពុក​រលួយ​នឹង​មិន​មាន​ប្រសិទ្ធភាព​ក្នុង​កំណែ​ទម្រង់​ប្រឆាំង​អំពើ​ពុករលួយទេ។»

នៅ​ក្រោយបទ​បង្ហាញ​របស់​លោក​រដ្ឋមន្ត្រី​ពាណិជ្ជកម្ម​កម្ពុជា​ អ្នកចូល​រួមមាន​សុទិដ្ឋិនិយម​ដោយ​ប្រុង​ប្រយ័ត្ន​ ដោយ​បន្ត​រង់​ចាំ​មើល​លទ្ធផល​ជាក់​ស្តែង​នៃ​ការសន្យា​កំណែ​ទម្រង់​«ស៊ីជម្រៅ»​ទាំង​ឡាយ​របស់​រាជរដ្ឋាភិបាល​កម្ពុជា៕

បទ​សម្ភាសន៍​ផ្តាច់​មុខ​របស់​វីអូអេ​ជាមួយ​លោក​រដ្ឋមន្ត្រី​ ស៊ុន ចាន់ថុល៖

ទាញ​យក​ពី​តំណភ្ជាប់​ដើម
XS
SM
MD
LG