មន្ត្រីប៉ូលិសច្រកព្រំដែនអន្តរជាតិប៉ោយប៉ែតមួយរូបនៅខេត្តបន្ទាយមានជ័យ បានរងការរិះគន់យ៉ាងខ្លាំងពីមន្ត្រីសិទ្ធិមនុស្ស និងអ្នកវិភាគ ក្រោយពីវីដេអូឃ្លីបចំនួនបីដែលត្រូវបានគេចែករំលែក បង្ហាញថា មន្ត្រីប៉ូលិសព្រំដែនរូបនេះ បានចាកចេញពីផ្ទះសំណាក់មួយក្នុងប្រទេសថៃ មុនពេលក្រសួងមហាផ្ទៃ ចេញសេចក្ដីប្រកាសព័ត៌មានមួយថា មន្ត្រីប៉ូលិសរូបនោះ មានរបួសធ្ងន់ធ្ងរ ដោយសាររថយន្តមួយគ្រឿងដែលបើកបរដោយប្រធានសមាគមមួយរូបបុកកាលពីសប្ដាហ៍មុន។
កាលពីថ្ងៃទី ២២ ខែ ធ្នូ លោកវរសេនីយ៍ត្រី ឈាន ពិសិដ្ឋ នាយរងប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត ត្រូវគេមើលឃើញថា បានរារាំងរថយន្តរបស់ប្រធានសមាគមមួយរូប មិនឲ្យធ្វើដំណើរទៅមុខ បន្ទាប់ពីមានការប៉ះសម្ដីគ្នា ពាក់ព័ន្ធនឹងអ្នករត់ម៉ូតូឌុបម្នាក់។
ក្រុមប្រជាពលរដ្ឋមួយចំនួន ដែលបានឃើញលោក ឈាន ពិសិដ្ឋ រារាំងរថយន្តរបស់លោក ឌិន ពុទ្ធី ប្រធានសមាគមពង្រឹងសេដ្ឋកិច្ចក្រៅប្រព័ន្ធកម្ពុជា បានថតវីដេអូជាឃ្លីបខ្លីៗ ដែលបង្ហាញថា លោក ឈាន ពិសិដ្ឋ បានធ្វើជាដួលដោយខ្លួនឯង នៅមុខរថយន្ត របស់លោក ឌិន ពុទ្ធី។
ក្រោយពេលលោក ឈាន ពិសិដ្ឋ ដួលពីមុខឡាន លោក ឌិន ពុទ្ធី នៅលើស្ពានមិត្តភាពកម្ពុជា-ថៃ ស្ថិតក្នុងក្រុងប៉ោយប៉ែតរួចមកនោះ ក្រុមមន្ត្រីមានសមត្ថកិច្ច បានឃាត់ខ្លួនប្រធានសមាគមរូបនេះ។
បន្ទាប់មក ព្រះរាជអាជ្ញាសាលាដំបូងខេត្តបន្ទាយមានជ័យ បានចោទប្រកាន់លោក ឌិន ពុទ្ធី ពីបទហិង្សាដោយចេតនា មុនពេលរូបលោកត្រូវបានបញ្ជូនទៅពន្ធនាគារខេត្តបន្ទាយមានជ័យ។ នេះបើតាមការបញ្ជាក់ពីមន្ត្រីសិទ្ធិមនុស្សប្រចាំខេត្តបន្ទាយមានជ័យ។
បន្ទាប់ពីលោក ឌិន ពុទ្ធី ត្រូវបានចោទប្រកាន់ដោយរាជអាជ្ញាសាលាដំបូងខេត្តបន្ទាយមានជ័យ ក្រសួងមហាផ្ទៃ បានចេញសេចក្ដីប្រកាសព័ត៌មានមួយដែលបញ្ជាក់ថា លោក ឌិន ពុទ្ធី ពិតជាបានបុកលោក ឈាន ពិសិដ្ឋ បណ្ដាលឲ្យដួលបោកក្បាលទៅនឹងថ្នល់សន្លប់បាត់ស្មារតី ហើយត្រូវបញ្ជូនទៅព្យាបាលនៅខេត្តស្រះកែវ ប្រទេសថៃ។
ក៏ប៉ុន្តែ វីដេអូដែលត្រូវបានចែកចាយនៅលើបណ្ដាញសង្គម ហ្វេសប៊ុក បង្ហាញថា លោក ឈាន ពិសិដ្ឋ កាលពីថ្ងៃទី២៧ខែធ្នូ បានដើរចាកចេញពីផ្ទះសំណាក់មួយនៅក្នុងប្រទេសថៃ ដោយមើលទៅហាក់ដូចជាមិនមានរបួសធ្ងន់ធ្ងរ និងមាននារីម្នាក់ដើរអមជាមួយលោកផងដែរ។
លោក ស៊ុំ ចន្ទគា មន្ត្រីសម្របសម្រួលសិទ្ធិមនុស្សនៃសមាគមការពារសិទ្ធិមនុស្សអាដហុកនៅខេត្តបន្ទាយមានជ័យ បានថ្លែងដោយយោងទៅតាម វីដេអូឃ្លីបទាំងបី ដែលត្រូវបានចែករំលែកក្នុងបណ្ដាញសង្គមហ្វេសប៊ុកនោះថា លោក ឈាន ពិសិដ្ឋ មើលទៅមិនសមជាអ្នកមានរបួសធ្ងន់ ដោយសារមន្ត្រីប៉ូលិសព្រំដែនរូបនេះ បានដើរចេញពីផ្ទះសំណាក់ក្នុងសភាពធម្មតា និងក្នុងក្ដីរីករាយ។
«បាទថ្ងៃ ២៧ នេះ យើងឃើញមានវីដេអូឃ្លីបលោក ឈាន ពិសិដ្ឋ ទៅព្យាបាលនៅប្រទេសថៃ បែរទៅជាឃើញនាំគ្នាដើរលេង ហាក់ដូចជាគ្មានទុក្ខព្រួយអីបន្តិចសោះ ហើយគួរតែអាសូរអាណិត ដល់លោក ឌិន ពុទ្ធី វិញត្រូវបានតុលាការ សម្រេចឃុំខ្លួនបណ្ដោះអាសន្ន ដាក់ពន្ធនាគារទៅវិញបាទ»។
នៅក្នុងវីដេអូឃ្លីបដែលគេបានចែករំលែកនៅលើបណ្តាញសង្គមហ្វេសប៊ុក នៅព្រឹកថ្ងៃសុក្រនេះ លោក ឈាន ពិសិដ្ឋ ត្រូវបានគេឃើញដើរ និងមានកាយវិការលេងសើចជាមួយនារីម្នាក់ នៅពេលលោកដើរចេញពីផ្ទះសំណាក់។
លោក មាស នី អ្នកសិក្សាស្រាវជ្រាវ ការអភិវឌ្ឍន៍សង្គម និយាយថាប្រសិនបើរូបភាពនោះ ជារូបភាពពិតមែននោះ វាជាការបង្ហាញគំរូអាក្រក់ដល់ប្រជារាស្ត្រខ្មែរ និងជាការអាម៉ាស់ដល់រដ្ឋាភិបាលកម្ពុជា។
«បាទអានេះ បើសិនជារូបហ្នឹង រូបភាពមួយហ្នឹងវាជារូបពិតមួយ អាហ្នឹងបង្ហាញពីគំរូអាក្រក់ មហាអាក្រក់ ហើយថោកទាប។ បើសិនជាយើងមើលទៅថ្ងៃខាងមុខទៀតថាសង្គមបែបហ្នឹង ខ្ញុំគិតថា ពលរដ្ឋខ្មែរគួរតែនាំគ្នា ពិនិត្យមើល ហើយពិចារណា ទៅថាតើថ្ងៃក្រោយ យើងចង់បានសង្គមបែបណា បែបម៉េច ដែលចេះតែនាំគ្នាយករឿងដែលអយុត្តិធម៌មកប្រើអញ្ចឹង»។
VOA មិនទាន់អាចសុំការអធិប្បាយពី លោកនាយឧត្ដមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃបានទេ ដោយសារលោកជាប់រវល់ក្នុងការប្រជុំ។
លោក សិទ្ធ ឡោះ ស្នងការរងខេត្តបន្ទាយមានជ័យ ប្រាប់ VOA ថា លោកមិនទាន់ទទួលបានដំណឹង ទាក់ទិនការដើរកម្សាន្តរបស់លោក ឈាន ពិសិដ្ឋ នៅប្រទេសថៃនោះទេ ហើយថា ករណីនេះ បានទៅដល់ដៃតុលាការហួសពីសមត្ថកិច្ចរបស់ប៉ូលិសហើយ។
«ដំណាក់កាលរឿងនេះគឺ រឿងចំណាត់ការដល់ផ្លូវតុលាការហើយ ខ្ញុំជានគរបាល គឺផុតដៃខ្ញុំហើយ អញ្ចឹងបងបាទ»។
កាលពីម្សិលមិញនេះ ក្រុមគ្រួសារលោក ឌិន ពុទ្ធី ដែលជាអនុប្រធានប្រតិបត្តិការគណបក្សសង្គ្រោះជាតិក្នុងក្រុងប៉ោយប៉ែត បានធ្វើបាតុកម្មជាមួយក្រុមអ្នករត់ម៉ូតូឌុប កម្មករ ដែលជាសមាជិករបស់សមាគមពង្រឹងសេដ្ឋកិច្ចក្រៅប្រព័ន្ធកម្ពុជា ប្រមាណ២០០នាក់ ដើម្បីទាមទារឲ្យដោះលែង លោក ឌិន ពុទ្ធី។
នៅពេលបាតុកម្មនោះ កម្លាំងប៉ូលិស បានបង្ក្រាប និងចាប់ខ្លួនស្ត្រីពីរនាក់ ឈ្មោះ ឌិន វ៉ាន់ ដែលត្រូវជាបងស្រីរបស់ លោក ឌិន ពុទ្ធី និងស្ត្រីអ្នកតវ៉ា ម្នាក់ទៀតឈ្មោះ ឃុម ជ្រឿង។ នេះបើយោងទៅតាមការបញ្ជាក់ពីអ្នកដែលបានឃើញការតវ៉ានោះ និង សមាជិករបស់សមាគមពង្រឹងសេដ្ឋកិច្ចក្រៅប្រព័ន្ធ។
លោក ស៊ីម វណ្ណៈ សមាជិក សមាគមពង្រឹងសេដ្ឋកិច្ចក្រៅប្រព័ន្ធ បានបញ្ជាក់ថា អ្នកដែលត្រូវបានឃាត់ខ្លួននោះ ត្រូវបានដោះលែងមកវិញ បន្ទាប់ពីបានធ្វើកិច្ចសន្យា ថាមិនធ្វើបាតុកម្មទៅថ្ងៃក្រោយទៀត។
«គេចរចាឲ្យឈប់ធ្វើបាតុកម្ម គេយកពីរនាក់ហ្នឹងមកវិញណា៎បង»។
តែទោះជាយ៉ាងណា លោក សិទ្ធ ឡោះ ស្នងការរងប៉ូលិសខេត្តបន្ទាយមានជ័យ ប្រាប់ VOA ថា កម្លាំងប៉ូលិស មិនបានចាប់ខ្លួនក្រុមអ្នកតវ៉ានោះឡើយ។
លោកអះអាងថា កម្លាំងប៉ូលិស គ្រាន់តែធ្វើការសម្របសម្រួលសណ្ដាប់ធ្នាប់ នៅពេលអ្នកតវ៉ាប្រមូលផ្ដុំគ្នាប៉ុណ្ណោះ។
យោងតាមសេចក្ដីប្រកាសព័ត៌មានរបស់ក្រសួងមហាផ្ទៃចុះថ្ងៃទី២៩ ខែធ្នូ បានឲ្យដឹងបន្ថែមថា ព្រះរាជអាជ្ញាសាលាដំបូងខេត្តបន្ទាយមានជ័យ បានសម្រេចបើកការស៊ើបសួរទៅលើឈ្មោះ ឌិន ពុទ្ធី ពីបទ«ហិង្សាដោយចេតនាមានស្ថានទម្ងន់ទោស» តាមបញ្ញត្តិមាត្រា ២១៨ នៃក្រមព្រហ្មទណ្ឌ និងបញ្ជូនសំណុំរឿងនោះទៅចៅក្រមស៊ើបសួរ ដើម្បីបន្តនីតិវិធី។
កាលពីសប្ដាហ៍មុន ក្រោយពីមានការចែករំលែកវីដេអូឃ្លីប ដែលបង្ហាញរូបភាព លោក ឈាន ពិសិដ្ឋ ដួលនៅពីមុខរថយន្ត លោក ឌិន ពុទ្ធី ក្រុមអ្នកប្រើប្រាស់បណ្ដាញសង្គមហ្វេសប៊ុក បានរិះគន់ថាលោក ឈាន ពិសិដ្ឋ បានធ្វើពុតជាដួលសន្លប់។
ក្រុមអ្នកប្រើប្រាស់បណ្ដាញសង្គមហ្វេសប៊ុក ក៏បានចែករំលែកវីដេអូឃ្លីបនានា ដែលបង្ហាញពីការធ្វើត្រាប់តាម លោក ឈាន ពិសិដ្ឋ។
វីដេអូឃ្លីបត្រាប់មួយចំនួន សុទ្ធតែបានបង្ហាញពីសកម្មភាពមនុស្ស រត់មកបុកឡានទាំងអស់៕
