មនុស្សយ៉ាងហោចណាស់២៣នាក់បានស្លាប់ដោយសារភ្លើងឆេះសាឡាង ដែលដឹកមនុស្សជាង២០០នាក់ទៅកាន់កោះភាគខាងជើងនៃរដ្ឋធានីហ្សាការតា របស់ប្រទេសឥណ្ឌូណេស៊ី កាលពីថ្ងៃអាទិត្យ នេះបើយោងតាមក្រុមមន្ត្រីឥណ្ឌូណេស៊ី។
ភ្លើងនេះបានចាប់ផ្តើមឆាបឆេះសាឡាងនេះ មិនយូរប៉ុន្មានបន្ទាប់ពីសាឡាងនេះបានចាកចេញពីកំពង់ផែ Muara Angke ដើម្បីធ្វើដំណើរឆ្ពោះទៅកាន់កោះ Tidung ដែលស្ថិតនៅចម្ងាយប្រមាណ ៥០ គីឡូម៉ែត្រពីភាគខាងជើងនៃទីក្រុងហ្សាការតា នេះបើយោងតាមលោក Sutopo Purwo Nugroho អ្នកនាំពាក្យទីភ្នាក់ងារការពារគ្រោះមហន្តរាយ ដែលបានថ្លែងកាលពីថ្ងៃអាទិត្យ។ ក្រៅពីអ្នកដែលបានស្លាប់ ក៏មានអ្នករបួសនិងបាត់ខ្លួនរាប់សិបនាក់ផងដែរ។
លោក Seply Madreto មន្ត្រីមួយរូបនៃទីភ្នាក់ងារការពារគ្រោះមហន្តរាយប្រចាំតំបន់នោះបានថ្លែងប្រាប់ស្ថានីយ៍ទូរទស្សន៍ MetroTV របស់ឥណ្ឌូណេស៊ីថា ភ្លើងនោះបានឆាបឆេះសាឡាងនោះអស់ប្រហែលពាក់កណ្តាល នេះបើយោងតាមទីភ្នាក់ងារព័ត៌មាន Associated Press។
លោក Ardi ដែលធ្វើដំណើរលើសាឡាងនោះជាមួយនឹងកូនប្រុសរបស់លោក ហើយបានរួចផុតជីវិត បានប្រាប់ទីភ្នាក់ងារព័ត៌មាន Reuters ថា៖ «ផ្សែងដ៏សន្ធោសន្ធៅបានភាយឡើងពាសពេញសាឡាងនោះ។ អ្នកដំណើរទាំងអស់មានភាពជ្រួលច្របុល រត់ចុះរត់ឡើងទៅដំបូលសាឡាង ហើយបោះពោងចូលទៅក្នុងទឹក។ មួយរំពេចនោះ ភ្លើងបានឆេះកាន់តែខ្លាំងឡើងៗ ចេញពីកន្លែងដែលផ្ទុកប្រេង»។
លោក Ardi ស្ថិតក្នុងចំណោមអ្នកដែលរួចជីវិតហើយត្រូវបានបញ្ជូនទៅកាន់មន្ទីរពេទ្យដើម្បីធ្វើការព្យាបាល។
ការធ្វើដំណើរតាមទូកគឺជាមធ្យោបាយធ្វើដំណើរដ៏ពេញនិយមនៅក្នុងប្រទេសឥណ្ឌូណេស៊ី។ ប៉ុន្តែ ឥណ្ឌូណេស៊ីត្រូវបានញាំញីដោយសារតែឧប្បទ្ទវហេតុតាមមធ្យោបាយធ្វើដំណើរនៅប៉ុន្មានឆ្នាំចុងក្រោយនេះ មានតាំងពីឧប្បទ្ទវហេតុតាមយន្តហោះ រថភ្លើង និងការលិចសាឡាងជាដើម៕
