ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ការលុប​ចោល​ដំណើរ​បំពេញ​ទស្សនកិច្ច​របស់​លោក​ Aquino ​នៅ​ពេល​មាន​ការ​តានតឹង​​រវាង​ហ្វីលីពីន​និង​ចិន


ប្រធានាធិបតី​ហ្វីលីពីន លោក Benigno Aquino III (ស្តាំ) និយាយ​ជាមួយ​លោក​រដ្ឋមន្ត្រី​ការ​បរទេស​របស់​លោក គឺ​លោក Albert del Rosario (ឆ្វេង) ក្នុង​អំឡុង​​កិច្ច​ប្រជុំ​កំពូល​អាស៊ាន​លើក​ទី​២០​នៅ​វិមាន​សន្តិភាព​ក្រុង​ភ្នំពេញ​ កាល​ពី​ថ្ងៃ​ពុធ​ទី​៤ ​មេសា​ ​២០១២​នេះ។
ប្រធានាធិបតី​ហ្វីលីពីន លោក Benigno Aquino III (ស្តាំ) និយាយ​ជាមួយ​លោក​រដ្ឋមន្ត្រី​ការ​បរទេស​របស់​លោក គឺ​លោក Albert del Rosario (ឆ្វេង) ក្នុង​អំឡុង​​កិច្ច​ប្រជុំ​កំពូល​អាស៊ាន​លើក​ទី​២០​នៅ​វិមាន​សន្តិភាព​ក្រុង​ភ្នំពេញ​ កាល​ពី​ថ្ងៃ​ពុធ​ទី​៤ ​មេសា​ ​២០១២​នេះ។

ការតាន​តឹង​រវាង​ប្រទេស​ហ្វីលីពីន​និង​ប្រទេស​ចិន​បន្តរីកកាន់​តែធំ​នៅ​សប្តាហ៍​នេះ។ ហ្វីលីពីនប្រាប់​ឲ្យ​ដឹង​ថា ​ដំណើរ​បំពេញ​ទស្សនកិច្ច​ដោយ​ប្រធានា​ធិបតី​ Benigno Aquino ​ទៅ​ចូល​រួម​ការតាំង​ពិព័ណ៌​ចិន-អាស៊ាន​ក្នុង​ទីក្រុង​ Nanning ​នៃ​ប្រទេស​ចិន​ត្រូវ​បាន​ដាក់​លក្ខខណ្ឌ​ ប៉ុន្តែ​ចិននិយាយ​ថា ខ្លួនមិន​ដែល​អញ្ជើញ​ប្រធានា​ធិបតី​ Aquino ​ទេ។

ហ្វីលីពីន​ជា​ប្រទេស​មួយដែល​មាន​កិត្តិយ៌សដែល​ត្រូវ​ចូលរួមការតាំង​ពិព័ណ៌​ចិន​និង​អាស៊ាន​នៅ​ឆ្នាំនេះ ​ហើយ ​យោង​ទៅ​តាមមន្ត្រី​ហ្វីលីពីន ​ប្រាប់​ឲ្យ​ដឹង​ថា តាម​ទម្លាប់​ ​ត្រូវ​បញ្ជូន​ប្រមុខរដ្ឋ​ដែល​មាន​កិតិ្ត​យស​ទៅ​ចូល​រួម​ពិធី​នេះ។​

លោក​ Raul Hernandez ​អ្នកនាំ​ពាក្យ​ក្រសួង​ការបរទេសហ្វីលីពីន ​និយាយ​ថា ​ប្រធានា​ធិបតី​ Aquino បាន​ត្រូវ​គេ ​អញ្ជើញ​ឲ្យ​ទៅ​ចូលរួម​ពិធី​នោះ​ ​ប៉ុន្តែ ​ដោយ​មាន​លក្ខខណ្ឌមួយ​ចំនួន​ដែល​កំណត់​ដោយ​ចិន។ ​លោក ​បាន​អាន​សេចក្តី​ថ្លែង​ការណ៍​ក្នុង​អំឡុង​ពេលសារព័ត៌មាន​ខ្លី​មួយ​កាល​ពី​ថ្ងៃ​ច័ន្ទ​ក្នុង​ទីក្រុង​ម៉ានីល។​

«លក្ខខណ្ឌ​បែប​នេះ ធ្វើ​ឲ្យ​ប៉ះពាល់យ៉ាង​ខ្លាំង​ដល់​ផល​ប្រយោជន៍​ជាតិ​របស់​យើង។ ​ដើម្បី​បញ្ចៀស​ការ​អាម៉ាស​ដល់​ភាគី​ចិន យើងនឹង​មិន​ថ្លែង​លក្ខខណ្ឌ​នោះ​ទេ»។

លោក Hernandez ​និយាយ​ថា ​ពួក​មន្រ្តី​ការបរទេស​ចិន ​បាន​ប្រាប់​មន្រ្តី​ហ្វីលីពីន មិន​ឲ្យ​និយាយ​អំពី​លក្ខខណ្ឌ​ទាំង​នេះ ​ហើយ​មិន​ឲ្យ​មាន​ការ​ពិភាក្សា​ណាមួយ​អំពី​លក្ខខណ្ឌទាំង​នេះ​នៅកម្រិត​ថ្នាក់​រដ្ឋ​មន្រ្តី​ទេ។

​លោក​ Aquino បាន​ប្រកាស​ថា ​លោក ​នឹងចូលរួម ​ប៉ុន្តែ ​មិន​ដល់​មួយ​ថ្ងៃ​ផង​បន្ទាប់​ពី​ការ​ប្រកាស​របស់​លោក​មាន​ដំណឹង​មក​ថា​ចិន​បាន​សុំ​ឲ្យ​លោក​លុប​ចោលដំណើរ​បំពេញ​ទស្សន​កិច្ច​របស់​លោក។ ​មន្រ្តី​ហ្វីលីពីន និយាយ​ថាចិន ​និយាយ​ថាលោក ​គួរ​អញ្ជើញ​មកក្នុង​ពេល​វេលា​សមស្រប​ណាមួយ។ ​ក្រសួង​ការបរទេស​ចិន ​ប្រាប់​ឲ្យ​ដឹង​ថា ​ខ្លួន​មិន​ដែល​បាន​អញ្ជើញប្រធានា​ធិបតី​ទេ​ហើយ មិន​បាន​ផ្តល់​សេចក្តី​លម្អិត​ទេ។

ប្រទេស​ទាំង​២ ​បាន​នៅ​ជាប់​គាំង​ក្នុង​ជម្លោះ​ខាង​ការទូតមួយ​លើ​បញ្ហា​ទឹក​ដី​ក្នុង​សមុទ្រ​ចិន​ខាងត្បូង​ដែល​សម្បូរ​ដោយ​ប្រភព​ធន​ធាន​ធម្ម​ជាតិ។ ​ទំនាក់​ទំនង មាន​ភាពមិនកក់​ក្តៅ​កាល​ពី​ខែ​មេសា​ឆ្នាំ​ទៅ​នៅពេល​ដែល​កប៉ាល់​មក​ពី​ប្រទេសទាំង​២​ប្រឈមមុខ​ដាក់​គ្នានៅ​តំបន់​ថ្ម​ប៉ប្រះទឹក​ជិតឆ្នេរ​សមុទ្រភាគ​ពាយ័ព្យ​នៃ​ប្រទេស​ហ្វីលីពីន។ រដ្ឋាភិបាល​ទីក្រុង​ម៉ានីល ​និយាយ​ថា ​តំបន់​ថ្មប៉ប្រះ​ទឹក ​ស្ថិត​នៅ​ក្នុងតំបន់​សេដ្ឋ​កិច្ច​ពិសេស​របស់​ខ្លួន ​ដែល​ត្រូវ​បានកំណត់​ដោយ​អនុសញ្ញា​របស់អង្គការ​សហ​ប្រជា​ជាតិ​ស្តីពី​ច្បាប់​សមុទ្រ។

ចិន ​បាន​បិទ​ខ្ទប់​តំបន់​នៅ​ក្បែរថ្មប៉ប្រះទឹក​នោះ​ ​ដែល​ខ្លួន បាន​ទាម​ទារ​ជាផ្នែក​មួយ​នៃ​កន្លែង​នេសាទ​របស់​ខ្លួន។ ហ្វីលីពីន ​បាន​តវ៉ា​យូរ​ៗ​ម្តង​ពី​កប៉ាល់​ស៊ើប​យក​ការណ៍​និង​យោធា​របស់​ចិន​ក្នុង​ផ្ទៃ​ទឹក​ដែលបានទាម​ទារ​ជា​របស់​ខ្លួន។​

រដ្ឋាភិបាល​ទីក្រុង​ម៉ានីល​ ​បាន​ធ្វើ​ការ​ប្រឆាំង​រាប់​សិប​ទៀតហើយ ​កំពុង​យក​រឿង​ក្តី​របស់​ខ្លួន​ទៅ​ដាក់​ពី​មុខ​តុលាការកាត់​សេចក្តី​របស់​អង្គការ​សហ​ប្រជាជាតិ។ ​រដ្ឋាភិ​បាលទីក្រុង​ប៉េកាំង ​បាន​ច្រាន​ចោល​រឿង​ក្តី​នេះ ​ហើយ​មិន​បាន​ឆ្លើយ​តប​ដល់​តម្រូវការទៅ​តាម​នីតិវិធី​ណា​មួយ​ទេ។​ ​ជាថ្មី​ម្តទៀត ​ចិន​បាន​និយាយ​ម្តង​ហើយ​ម្តងទៀត​ថា ​ខ្លួន​ ពេញ​ចិត្តការ​សន្ទនា​មួយ​ទល់​នឹង​មួយ។

ចិនពោល​អះអាងពីការ​ត្រួតត្រា​ដោយ​គ្មាន​ជំទាស់លើ​សមុទ្រ​ចិន​ខាង​ត្បូង។ ហ្វីលីពីន ​វៀតណាម ​ម៉ាឡេស៊ី ​ប្រ៊ុយ​ណេ​និង​កោះ​តៃវ៉ាន់ ​ក៏​បានប្រកួត​ប្រជែងទាម​ទារសមុទ្រ​នោះ​ដែរ។

លោក Zhang Hua ​អ្នកនាំ​ពាក្យ​ស្ថានទូត​ចិន​ក្នុង​ទីក្រុង​ម៉ានីល ​មិន​បាន​ធ្វើ​អត្ថា​ធិ​ប្បាយអំពី​អ្វី​ដែល​ហៅ​ថា ​ លក្ខខណ្ឌ​នោះ​ទេ។ ​ប៉ុន្តែ ​លោក​ Zhang ​បាននិយាយ​នៅ​ក្នុង​សេចក្តី​ថ្លែងការណ៍​ថា ​ចិន ​ឲ្យ​តម្លៃពី​មិត្ត​ភាព​យូរ​អង្វែងរវាង​ប្រទេស​ទាំង​២។

«នៅ​ក្រោម​កាលៈ​ទេសៈបច្ចុប្បន្ន​នេះ ​ចិន ​សង្ឃឹម​ថា ​ភាគី​ហ្វីលីពីន ​អាច​ធ្វើ​ការជា​មួយ​ភាគី​ចិន​ដើម្បី​ជម្នះ​ការលំបាកនិងការ​រំខានហើយ​នឹង​ខិត​ខំ​យ៉ាង​ពិត​ប្រាកដ​ដើម្បី​ធ្វើ​ឲ្យ​ទំនាក់​ទំនងរវាង​ចិន​និង​ហ្វីលីពីន​ត្រឡប់ទៅ​កាន់​ផ្លូវត្រូវ​វិញ​ហើយ​នឹង​ការ​អភិវឌ្ឍន៍​ប្រកប​ដោយ​ស្ថិរភាព​មួយ»។

ចិន​នឹង​ធ្វើ​ជា​ម្ចាស់​ផ្ទះ​រៀប​ចំការ​ពិគ្រោះ​ថ្នាក់​ទាប​មួយនៅ​ខែ​នេះជាមួយ​សមា​ជិកទាំង​១០​ប្រទេស​របស់​សមាគម​ប្រជាជាតិ​អាស៊ី​អាគ្នេយ៍។ ​ពួកគេ ​នឹង​ពិភាក្សាក្រម​ប្រតិបត្តិ​ដែល​តម្រូវ​ឲ្យ​អនុវត្តតាម​ផ្លូវ​ច្បាប់ស្តី​ពី​ការ​ចាត់​ចែងជម្លោះ​ក្នុង​សមុទ្រ​ចិន​ខាង​ត្បូង។ ​ហ្វីលីពីន​និង​វៀតណាម ​កំពុង​ជំរុញឲ្យ​មាន​ការ​ចរចា​ពេញ​លេញស្តី​ពី​ក្រម​ប្រតិបត្តិ​ដែល​បាន​ស្នើ ​ដែល​បានជាប់រ៉ាំរ៉ៃ​អស់​រយៈ​ពេល​ជាង​១០​ឆ្នាំ​ហើយ៕​ ប្រែ​សម្រួល​ដោយ ​ជឹង ​ប៉ូជីន

XS
SM
MD
LG