សាលាឧទ្ធរណ៍ នៅព្រឹកថ្ងៃច័ន្ទនេះ បានច្រានចោលពាក្យបណ្តឹងរបស់លោក សំ សុគង់ មេធាវីតំណាងឲ្យលោក នី ចរិយា អគ្គលេខាធិការរងគណៈកម្មាធិការជាតិរៀបចំការបោះឆ្នោត (គ.ជ.ប.) ដែលសុំឲ្យសាលាឧទ្ធរណ៍ចាត់ទុកជាមោឃភាពនូវចំណាត់ការរបស់អង្គភាពប្រឆាំងអំពើពុករលួយចំពោះកូនក្តីរបស់លោកកន្លងមកនោះ។
លោក សំ សុគង់ អះអាងថា ការសម្រេចរបស់សាលាឧទ្ធណ៍រំលោភរដ្ឋធម្មនុញ្ញ។
កាលពីចុងខែមេសា អគ្គលេខាធិការរងគណៈកម្មាធិការជាតិរៀបចំការបោះឆ្នោត(គ.ជ.ប.) គឺ លោក នី ចរិយា និងមន្ត្រីអាដហុកចំនួន៤រូបទៀត ត្រូវបានអង្គភាពប្រឆាំងអំពើពុករលួយសាកសួរពាក់ព័ន្ធនឹងរឿងរ៉ាវគួរឲ្យសង្ស័យរវាងកញ្ញាខុម ចាន់តារ៉ាទី ហៅស្រីមុំជាមួយលោកកឹម សុខា ប្រធានស្តីទីគណបក្សសង្គ្រោះជាតិ។
កាលពីថ្ងៃទី៣ ខែសីហា មេធាវីរបស់លោកនី ចរិយាគឺលោកសំ សុគង់បានដាក់ពាក្យបណ្តឹងទៅសាលាឧទ្ធរណ៍សុំឲ្យចាត់មោឃភាពចំពោះនីតិវិធីរបស់មន្រ្តីអង្គភាពប្រឆាំងអំពើពុករលួយ (ACU) ក្នុងការសាកសួរ និងការឃុំខ្លួនពួកគេ។
ក្រោយចេញពីសាលសវនាការ លោកមេធាវីសំ សុគង់ប្រាប់ VOA ថា ប្រធានក្រុមប្រឹក្សាជំនុំជម្រះនៃសភាស៊ើបសួរសាលាឧទ្ធរណ៍ប្រកាសច្រានចោលបណ្តឹងនោះ ហើយបង្វិលសំណុំរឿងទៅចៅក្រមស៊ើបសួរដើម្បីចាត់ការតាមនីតិវិធី។ លោកបន្តថា ការច្រានចោលបណ្តឹងរបស់តុលាការដែលលើកឡើងថា នីតិវិធីនៃការសាកសួររបស់អង្គភាពប្រឆាំងអំពើពុករលួយត្រឹមត្រូវនោះ គឺជាការសម្រេចដោយរំលោភរដ្ឋធម្មនុញ្ញ មាត្រា៣៨ ដោយសារការសួរនោះលើសពីម៉ោងរដ្ឋបាល ដែលលោកអះអាងថា ជាការធ្វើទារុណកម្មផ្លូវចិត្តលើកូនក្តីរបស់លោក។
លោកបន្ថែមថា៖
«បើកាលណាសភាស៊ើបសួរសាលាឧទ្ធរណ៍សម្រេចមោឃភាពមានន័យថា នីតិវិធីដែលមន្រ្តីនគរបាលយុត្តិធម៌ធ្វើកន្លងមកខុស អញ្ចឹងកូនក្តីនឹងត្រូវរួចផុតពីបទចោទ ឬត្រូវបានគេដោះលែង»។
មាត្រា៣៨នៃរដ្ឋធម្មនុញ្ញចែងថា «ច្បាប់រ៉ាប់រងមិនឱ្យមានការរំលោភបំពានលើរូបរាងកាយបុគ្គលណាមួយឡើយ។ ច្បាប់ការពារជីវិត កិត្តិយស និងសេចក្ដីថ្លៃថ្នូររបស់ប្រជាពលរដ្ឋ។ ការចោទប្រកាន់ ការចាប់ខ្លួន ការឃាត់ខ្លួន ឬការឃុំខ្លួនជនណាមួយនឹងអាចធ្វើទៅកើត លុះត្រាតែអនុវត្តត្រឹមត្រូវតាមបញ្ញត្តិច្បាប់។ ការបង្ខិតបង្ខំ ការធ្វើបាបលើរូបរាងកាយ ឬប្រព្រឹត្តិកម្មណាមួយដែលបន្ថែមទម្ងន់ទណ្ឌកម្ម អនុវត្តចំពោះជនជាប់ឃុំឃាំង ឬជាប់ពន្ធនាគារត្រូវហាមឃាត់មិនឱ្យធ្វើឡើយ។ អ្នកដៃដល់ អ្នករួមប្រព្រឹត្ត និងអ្នកសមគំនិតត្រូវទទួលទោសតាមច្បាប់។ ការទទួលសារភាព ដែលកើតឡើងពីការបង្ខិតបង្ខំតាមផ្លូវកាយក្ដី តាមផ្លូវចិត្តក្ដី មិនត្រូវទុកជាភស្តុតាងនៃពិរុទ្ធភាពទេ»។
អ្នកនាំពាក្យសាលាឧទ្ធរណ៍គឺលោកទូច ថារិទ្ធមានប្រសាសន៍ថា ក្រុមប្រឹក្សាជំនុំជម្រះសម្រេចតាមច្បាប់ ហើយថា បើមេធាវីរបស់លោកនី ចរិយាមិនសុខចិត្ត អាចប្តឹងតាមនីតិវិធីបន្ត។
លោកបញ្ជាក់ថា៖
«ខាងក្រុមប្រឹក្សាជំនុំជម្រះឧទ្ធរណ៍គេបានសម្រេចដូចការសម្រេចព្រឹកមិញអញ្ចឹងគឺច្រានចោលការស្នើសុំរបស់មេធាវីការពារក្តីឲ្យលោកនី ចរិយា បានន័យថា គេតម្កល់ការសម្រេចរបស់សាលាដំបូងរាជធានីភ្នំពេញទុកជាបានការដដែល ហើយប្រសិនជាគាត់អត់សុខចិត្តក្នុងនាមគាត់ជាមេធាវី គាត់អាចប្តឹងទៅតាមនីតិវិធីរបស់ផ្លូវច្បាប់ទៀតបាន»។
លោកសំ សុគង់បន្ថែមថា លោកនឹងដាក់បណ្តឹងសារទុក្ខទៅតុលាការកំពូលនៅសប្តាហ៍ក្រោយដើម្បីទាមទាររកយុត្តិធម៌។
លោកសុក សំអឿន អ្នកជំនាញផ្នែកច្បាប់ និងជាមេធាវីឯករាជ្យមានប្រសាសន៍ថា ការសួរចម្លើយជនណាម្នាក់លើសពីម៉ោងរដ្ឋបាលគឺជាការដាក់ទារុណកម្ម ហើយផ្ទុយពីរដ្ឋធម្មនុញ្ញ។
លោកមានប្រសាសន៍ថា៖
«និយាយរួមដូចយើងធ្វើទារុណកម្មអញ្ចឹង បើមិនឲ្យមនុស្សយើងដេក មិនឲ្យមនុស្សយើងសម្រាក មិនដូចធ្វើទារុណកម្មផ្លូវចិត្តគេអញ្ចឹង។ ក្នុងករណីបែបហ្នឹងបានតែជនជាប់ចោទបដិសេធចម្លើយរបស់ខ្លួនទេ ប្រសិនជាខ្លួនឯងគិតថា ចម្លើយរបស់ខ្លួនឯងវាអត់ត្រឹមត្រូវ»។
កាលពីថ្ងៃទី២ ខែឧសភាឆ្នាំ២០១៦ សាលាដំបូងរាជធានីភ្នំពេញបានសម្រេចបញ្ជូនលោកនី ចរិយា និងមន្ត្រីអាដហុកទាំង៤រូបគឺលោកនី សុខា លោកយី សុខសាន្ត លោកណៃ វង់ដា និងលោកស្រីលឹម មុនីទៅឃុំខ្លួនបណ្តោះអាសន្នក្រោមបទចោទពាក់ព័ន្ធករណីនាងខុម ចាន់តារ៉ាទី ហៅស្រីមុំ ជាមួយលោកកឹម សុខា ប្រធានស្តីទីគណបក្សសង្គ្រោះជាតិ។
អង្គការ និងសមាគមចំនួន៥២បានចេញសេចក្តីថ្លែងការណ៍រួមមួយដោយប្រកាសបើកយុទ្ធនាការឈ្មោះថា ដោះលែងអ្នកទាំង៥ ចាប់ពីថ្ងៃទី៨ ខែសីហានេះទៅ ដើម្បីទាមទារឲ្យដោះលែងអ្នកកំពុងជាប់ឃុំទាំង៥រូបនោះ៕
