ដំណាលគ្នាដែលឥទ្ធិពលចិនងើបឡើង ហើយឥទ្ធិពលវៀតណាមដែលជាមិត្តរបស់កម្ពុជា ជាយូរឆ្នាំមកហើយ មានការធ្លាក់ចុះនោះ អ្នកវិភាគរំឭកជាមុនថា ឲ្យមេដឹកនាំនយោបាយកម្ពុជាមានការគិតគូរពីអនាគតកម្ពុជាក្រោមឥទ្ធិពលចិន។ លោកសង្កត់ធ្ងន់ថា កម្ពុជាមិនអាចបណ្តោយឲ្យបរទេសប្រើប្រាស់ស្ថានការណ៍កម្ពុជាធ្លាក់ចូលក្នុងបញ្ហា ដើម្បីលេបយកកម្ពុជាទេ។ នេះ ជាការអះអាងរបស់លោក បណ្ឌិត មាស នី អ្នកស្រាវជ្រាវ និងជាអ្នកវិភាគនយោបាយ ដែលបានថ្លែងក្នុងកម្មវិធី Hello VOA នៅថ្ងៃព្រហស្បតិ៍។ លោកបន្តថា អ្នកនយោបាយត្រូវពង្រឹងសេដ្ឋកិច្ចឲ្យខ្លាំងឡើង ហើយបញ្ឈប់ការឈ្លោះគ្នា ដូចបច្ចុប្បន្ន ដែលនាំឲ្យកម្ពុជាចុះទន់ខ្សោយ។
លោកប្រធានាធិបតី ស៊ី ជីងពីង នៃប្រទេសចិនគ្រោងនឹងបំពេញទស្សនកិច្ចនៅក្នុងប្រទេសកម្ពុជា នៅថ្ងៃទី១៣ ខែតុលា ឆ្នាំ២០១៦ បន្ទាប់ពីប្រធានសភាវៀតណាម បំពេញទស្សនកិច្ចនៅកម្ពុជាកាលពីថ្មីៗនេះ។
ដំណើរទស្សនកិច្ចរបស់មេដឹកនាំប្រទេសទាំងពីរកើតឡើងចំពេលដែលអ្នកនយោបាយកម្ពុជា មិនទាន់អាចងាកបែរទៅរកតុចរចានយោបាយ ហើយទុកឲ្យសភាដំណើរការទៅ ដោយមានគណបក្សប្រជាជនកម្ពុជាតែឯកឯង។
ទំនាក់ទំនងរវាងកម្ពុជានិងវៀតណាមចាប់ផ្តើមប្រែប្រួលខ្លាំងនៅពេលដែលប្រទេស ចិន ចាប់ផ្តើមប្តូរទស្សនកិច្ចចុះឡើងជាមួយកម្ពុជា ហើយជាពិសេសនៅពេលដែល ចិនផ្តល់ជំនួយចំនួន៦០០លានដុល្លារដល់កម្ពុជា។ លោក មាស នី ថា វៀតណាមអាចនឹងចាប់ផ្តើមយកបញ្ហាព្រំដែនដែលមានភាពផុយស្រួយ មកបង្ករឿងតាមព្រំដែន បើសិនជាកម្ពុជា ពិតជាដោះដៃពីវៀតណាមមែន។
កម្ពុជាធ្លាប់ជាមហាអំណាចដែរតាមប្រវត្តិសាស្ត្រ តែប្រទេសពីរដែលគេកើតក្រោយកម្ពុជា គឺវៀតណាមនិងថៃនោះ មានសេដ្ឋកិច្ចខ្ពស់ជាងយើង ដែលលោក មាស នី ទាញឲ្យមានការចាប់អារម្មណ៍ពីមេដឹកនយោបាយខ្មែរ៕
