ជាថ្មីម្តងទៀត ជនរងគ្រោះទំនាស់ដីធ្លីសុំឲ្យសភាធ្វើអន្តរាគមន៍
- VOA Khmer
ប្រជាពលរដ្ឋរងគ្រោះមកពីសហគមន៍ផ្សេងៗនៅទូទាំងប្រទេសកម្ពុជាបានជំរុញសារជាថ្មីទៀតដល់រដ្ឋសភាជាតិឲ្យអន្តរាគមន៍ដោះស្រាយការរំលោភបំពាននានានិងបញ្ហាដីធ្លីរបស់ពួកគេ។ នៅក្នុងញ្ញត្តិមួយដែលផ្ញើជូនប្រធានរដ្ឋសភាលោកហេង សំរិន នៅព្រឹកថ្ងៃច័ន្ទនេះ ក្រុមបាតុករប្រមាណជា៣០០នាក់បានលើកឡើងថា ពួកខ្លួនកំពុងព្រួយបារម្ភនិងរងទុក្ខវេទនាយ៉ាងធ្ងន់ធ្ងរដោយសារការបណ្តេញចេញដោយបង្ខំ ការរឹបអូសយកដីធ្លីនៅតាមបណ្តាសហគមន៍ជាច្រើន។ ក្រុមអ្នកតវ៉ាបានស្នើឲ្យលោកហេង សំរិន«ធ្វើអន្តរាគមន៍ដល់រាជរដ្ឋាភិបាលដើម្បីបញ្ឈប់»សកម្មភាពខាងលើនិង«លើកស្ទួយលទ្ធិប្រជាធិបតេយ្យនិងការគោរពសិទ្ធិមនុស្ស»។ លោក គង់ សុឋានរិទ្ធជូនសេចក្តីរាយការណ៍ពីរាជធានីភ្នំពេញ៕